Liber Magstri Avicenne

[36]

Hjer sul di horen waermet dat men ripen sal hete humoren. Sirupus acetosus. sirupus violaceus. oxisacar. Dit purgiert hete humoren. dyaprumis. Dese purgieren heet bloet. cassia fistula. electuarium catolicum ¶ Dese purgieren

[p. 113]

coude humoren. oximel simplex. oximel dureticum ¶ Dese dranc rijpt alle coude humoren int hooft. in die levere in de milte. in de borst. in de mage in de lendenen ende in alle die leden. Es die zieke arm ende ne genen cost doen en mach. so es hem dit zere goet. Nemt apie ende tsaet. venkel ende tsaet. persiin ende tsaet. sermontene. scarpe perteke. scorsse vanden esch. elne. savie. ende wilde savie. dit es goet in lieden dranke ¶ Aysiin purgiert fleume ende viscose humoren ¶ Alse ghi purgieren selt coude humoren. so nemt yera pigra ende aysiin elx .2. dr. Ende dits goet geminct in enen toge wijns alse men opstaet ¶ Een ander Nemt electuarium de succo rosarum ende aysiin elcs .2. dr. dit salmen mingen ende drinkent met enen toge wijns alse dander ¶ Een ander Nemt esule senie elx .1. s. siseyn beide gepulvert ende gedronken enen toge te male met wine. dit purgiert fleume ende melancolie ¶ Een ander Nemt scorsse vander wortelen van den vlieder ende stootse ende nemet tsop daer af. ende wiin elx even vele .1. eydop vol ende minget met benedicta ende gevet drinken. Ende esulen salmen oec geven .1. scr. geminct met andren dingen ¶ Ende wet dat men den genen die onder .25. jaer out siin. dat men hen min geven moet dan die ouder siin. om die verscheit die in hen meer es dan in ouden lieden. Ende wet dat men alle medicinen geven moet iegen dat die lieden starc siin ¶ Ghi moet weten dat in heten tiden die humoren lichteliker purgieren dan in couden tiden. Ende wet alse gi medicinen geeft te drinkene. dat men wandelen sal achter huse ende niet liggen. want het

[p. 114]

werct teer ¶ Ende alse men herde medicinen geven wilt alse broot. so mach mense geven in die dageraet. ende der op een luttel slapen. want hen werct niet so haestelike alse dat men drinct ¶ Dit purgeert alle humoren bi hen selven. stomaticum laxativum. daer af geeft men .3. dr. ten meesten of men saelt geven met .1. toge wijns Turbith purgeert fleume ende meest in de wonden der lieden ende in die zenewen. men saels purgieren .1. dr. in .2. dr. benedicten ende beide mingen in enen toge wiins