Liber Magstri Avicenne

[34]

Antrax es ene gevenijnde aposteme. ende hi heeft .4. manieren. antrax carbunculus. bonum. malanum. lebon. dese aposteme comt vanden bloede vander melancolien ende van coleren ende van fleumen. Galienus seit. so wat ziecheiden die met vele humoren geminct es. dat si quader te genesene es. dan die mer van enen humore comende en es ¶ Antrax heet men die bloeme int vleesch. ende sulke bloeme es bleec som rooet. sulc swart na diere humoren ende na der steden. Daer die materie vergadert es gevoelt men grote swerheit. alse of lood daer gehangen ware. ende dats om die grote swerheit van melancolien. Ende wast dese bloeme an die hant. so dunct hem alse of .1. corre stonde optie hant. ende dat doet melancolie meest. In den beginne alst porret dan eist also cleine alse .1. vitse of mindre. ende es boven swert. Ende waer dat antrax riset in den lichame daer gevoelt die zieke swerheit omtrent trike vander herten. ende daer omme es die redene datmen antrax

[p. 109]

niet wederslaen en sal ¶ Men sal int begin ane die selve zide. ende staet antrax boven ane den lichame. so en salmen boven niet laten om die redene dat die gevenijnde materie mochte comen ten edelen leden ende dan therte bederven mochte. Mer men sal altoes laten bi der stede. Ende sijnt kindren so salmen hen venteuse bussen setten of stellen so men alder naest mach. want in surgien en eist niet georloft die kindren te latene onder .14. iaer. No in al te couden tiden. no in te heten tiden. no die walgen ¶ Es antrax out. men sal alle dage geven triacle met lauwen wine. ende vander selver triacle salmen doen op antrax. Es die triacle gerecht ende antrax gerecht. so salse genesen. binnen .18. dagen stervet antrax ¶ Wrivet brunelle tusscen .2. tiechlen al ontwe ende legse daer op. het doetse scoren ¶ Een ander. Nemt den doder vanden eye al rou. ende doeter toe also vele souts. ende plaestert der op. Onder dusgedane plaester so baert hem antrax swert. ende opten andren dach noch meer swert. ende en vergaet niet vor den .9. dach. ende hi scoort opten .10. dach so salre bloetachtech etter uut comen ¶ Een ander. Nemt dat in de vige es ende also vele souts. dit geplaestert scoort die bloeme. Een ander. Nemt asscen van wijngerthoute ende olie ende zeem. dit geplaestert scoort die bloeme ¶ Men en sal antrax niet sniden hi en si gesworen .10. dage. dan mach mense coenlike sniden met ere scaren. Dan nemt tsap vander apien ende ziedet met zeme ende minget in tarwen bloeme. dit suvert tgat ¶ Een ander ziedet die wortel vander lelyen ende dan stootse ende legse der op. dit sacht ende geneest. So doet oec papple ende alsene gesoden ende gewreven ende der op geleit ¶ Ende

[p. 110]

stampt linaria ende legget der op. dit scoort antrax ende geneest. So doet oec die stront vanden mensce. Die stront vanden mensce es genatuert droge ende heet