Acarides ende lombrici siin wormen die in den lichame wassen. ende siin comen van grover spisen die node verteert Si wassen some in die cleine darmen aldus upperst. entie heet men lombrici. ende siin lange wormen. Ende som wassensi in die grote darmen onder den navel. entie heten acarides. ende si siin vander grootten dat cauwarden
[pagina 101]
[p. 101]
zaet es. ende siin wit ende plat ende si eten vele. ende alsi niet en eten so gevoelt men bijtsel ende snidinge onder den navel. Ende some wassen si in die nederste darmen int fundament. ende dat siin smale wormekine ende diere es vele. ende siin wit ende cleine als .1. draet. ende die pine es gelijc den uppersten. Die in die middel van den lichame liggen die sterven node ende si wassen van fleumen ¶ Jegen alle worme. Nemt sanctorie .1. lb. ende .4. o. campsaets. lupini .1. s. o. ende evene .2. o. Dit sal men stoten ende zieden. het doet sterven alle maniere van wormen ¶ Galienus seit dat men neme de scorsse van mali granati ende stopse ende zietse in wine ende drinket. dit doet sterven alle maniere van wormen ¶ Dyascorides seit. dat been vander hielen vanden stier goet es gebernt ende gepulvert ende gedronken met zeme. het doet sterven alle maniere van wormen ¶ Nemt lupine amani. dit siin benen vander zee. averone. sanctonica dit suldi stoten ende mingen metter gallen van den stiere. ende plaesteret optie stede daer de pine es. Ende geeft hem drinken yeralogodion met regen watere dat es best Wet dat alle bitende dingen goet siin iegen de wormen want het doetse sterven
Auteursrechtelijk beschermd