[27]
Ljentiria es een menisoen daer die spise al geheel dor den lichame gaet al onverteert also mense eet so comtse beneden dore. Ene redene es dattie mage entie darmen also glat siin van limeger fleumen. dat de spise al geheel dore slekert. Ene ander redene es dat nature gene macht en heeft haer spise te verteerne Die derde redene es. dat die cracht van den onthoudene es te cranc. Die vierde redene es dat die mage entie darmen gewont siin van scarpen humoren ¶ Comt die faute van glatheiden van viscoser fleumen. dit siin die tekenen. Men heeft swerheit in die mage. ende dat men rupsent es suur ende dat men in die digesten ziet es als puuds gerad. Men sal ierst purgieren. dan sal men .1. hinne zieden ende snidense in stucken dan nem polipodium .3. o. dat siin wortelen van vaerne dat op eyken wast ende coloquintide .1. o. Men sal drinken dit sap. want het purgiert die materie alse van viscoser fleumen. Ende men sal hem geven dese latuwarien. dyamastic. trifera magna. dyacitonitem calidum. ende costum. of welc men wilt van desen. Ende men salse nutten met wine. of met watere daer yser in es gebluscht daer men messe of scaren maect. Ende haer dyete moet siin geordineert alsoet es in discentiria. met comine. met groffels naglen. cubeben waren oec goet. want dese .3. stelpen ende starken ¶ Comt lientiria van crancheiden vanden onthoudene. dat kent bi der spisen dat si met haesten dore gaet in de selve varwe ende in de selve roke metten digesten ¶ Nemt bemersts zaet belde zaet. soffraen. balaustia elx .2.
Auteursrechtelijk beschermd