Liber Magstri Avicenne

[25]

Some lieden bloeden ten nese bi gewoenten. ende some werden si so bloedende dat mense niet gestelpen en can. ende bloeden altenen ten rechten nese gate ¶ Men salse doen laten ter hooft adren in den rechten op dat die tijt orlooft entie cracht vanden mensce. Ende bloet men te slinken nese gate. so salmen lat ter hooft adren in den slinken arm. Ende en cesseret niet so salmen nemen tsap van donderbart. van nachtscaden. gersten mele. dit suldi plaestren. Ende bloet hi ter rechter siden. so suldi tplaester leggen optie melte ane die slinker side. Ende bloet men ane die slinker side. so legt tplaester an die rechter side optie levere ¶ Een ander bloet men ane die rechter side. men sal venteuse bussen setten ane die rechter side optie levere sonder hicken metten ysere. dit trecket dbloet af. Bloet men ter slinker siden. men sal dat

[p. 96]

vorhooft enten hals bestriken met aysine. ende met andren couden dingen ¶ Ende sulke siin die bloeden bi gewoenten. dien salmen setten haer dyeten. ende men moetse wachten van vele etene ende van bonen. van erweten. van coyen vlesce. van herten. van hasen. van alre spisen die quaet es te verterne. Men salne wachten van roepene. van couden. van pinen. Hi sal eten wel verhaven broot ende suver van gruse. ende kiekenen. lammeren vleesch. velt hoendren ende diere gelike. Ende hi sal drinken claren wijn suver ende wit ¶ Een ander. men sal siins selfs bloet bernen. ende laten hem den rooc ontfaen ten nese Men sal oec parts hoeven bernen die men af stect ter smessen. ende deraf den rooc ontfaen ten nese