Liber Magstri Avicenne

[20]

Serpigo es een ongemac dat men heet zeter ende jnpigo. Ende wet dat dese .2. ongemake comen van heter materien ende siin bernde ende zere gevarwt Nochtan es tusscen dese .2. ongemake ondersceet. want zeter verwandelt vander ere stat op dandre ende gaet vorwert ende achterwert ende hi bedruct die stede al omtrent ¶ Single es van grover materien ende en es niet so root gevarwet ende het gaet meer alomme die stede vander ere steden ter andere ende besittet. Dese .2. specien siin vanden geslachte van laserien ende van morfea. en ware dat si comen van couder materien. ende zeter ende single comen van heeter materien die al te heet es. want die stede vanden zetere ende vander singlen es verbernende met ioocsele ende ru ¶ Men sal ierst doen laten ter adren met .1. vliemen. Ende dien dongemac houdt ende het hem verbaert in vele steden an den lichame en geneest nemmermeer ¶ Dus suldi van buten werken optie stede

[p. 81]

Gi sult stoten scarpe perteke den wortel met starken aysine ende dat der op plaesteren Een ander Minget witte zalve ende zepe te gadere dat die zieke niet en wete. dit doet men om te genesene serpigo. ende jnpigo. ¶ Een ander. doet swinen smout. terbentine quiczilver. ende tsop van scarper perteken tegadere zieden. Dit doet genesen ¶ Men sal oec zieden tsop van scarper perteken met swinen smoute tote dat sop versoden si. dan salment af doen ende doenre in terbentine. Dits goet jegen zeter. single. morfea. ende dwitte ende tswerte ende trode ¶ Een ander Nem gans smout. apie sop ende ziedet tot dat sop versoden si. dan nemt wit zeem ende mele van wieroke ende minget metten gans smoute ende doeter in tarwen bloeme .1. luttel. dit salmen mingen. dits sonderlinge goet iegen zeter ¶ Een ander. Nemt scarpe perteke. grisecom. scabiose. dese suldi stoten ende gieter op starken aysiin ende latet also staen .4. dage ende opten .5. dach doet te viere smout ende doeter in die vorseide cruden. ende doet zieden tote die aysiin versoden si. ende derna perssen dor een cleet. Dit es goede salve iegen drope. ende rudecheit ende op puusten vanden ansichte ende men saelt smeren tilike ende spade. Men saelt dwaen met sape van grisecom. Ende men saelt oec met warmen watere wasscen. Ende men salne wachten van spisen die te vele gesouten si ende van al te heten dingen. want dese maken swert bloet ende verbernt ¶ Wet dat bussen onder den kin geset hulpen zere iegen puusten int ansichte. Ende men sal ierst die materie ripen. ende derna purgieren met medicinen die verbernt bloet purgieren. Men sal oec sniden die adre die tranen brinct ten ogen. ¶ Men sal oec weten dat alle die werken die ten zetere behoren. die behoren ten ansichte. ende iegen lazerie ende drope ende salsum fleume

[p. 82]

¶ Men sal oec nemen ene tange met tween bladen dorgaet. ende gelauwen tfel ende tfleesch tusscen de tange. ende dor die gate suldi steken ene grote elsene. ende trecken der dore .1. snoer also men doet enen parde. ende dit salmen lange dragen. want hets sonderlinge goet iegen die ogen. ende iegen puustkine int ansichte ende iegen lasers ansichte. Ende wet dat pusoene gemaect van grisecom van bornagien. van brionien. die siin sonderlinge goet in allen vorten bloede ende verbernt Men sal altoes drinken van aristologien of tsap van scarper perteken