[19]
Gutta rosaces. dats een ongemac dat men scelt de rose. ende men hevet oec met puustkinen int ansichte Men sal mingen met swinen smoute mele van ciceren. ende doeter toe sop van ouden rapen. ende der met des avonts smeren. Ende des morgens wel dwaen met warmen borne der in geminct si crumen van witten brode ¶ ¶ Een ander men sal mingen versch case met aysine ende dat salmer op striken ¶ Een ander men sal mingen met swinen smoute tsop van langer perteken ende met ruggen mele. ende dat leggen optie puusten ¶ Een ander doet lood smelten in enen yseren lepel ende roeret met enen stocke vander wedewinden die rode besien draget tote dat dlood al tasscen wert. dan suldi dat wel cleine malen in .1. mortier ende budelent dor enen budel. ende dat in den mortier blijft men maecht weder opt vier setten ende versmeltent wilt men. ende altoes roeren metten stocke tote hi verbernt tasscen. Ende die asscen suldi houden want si ontfaen cracht vanden lode. ende tstuc van den houde suldi werpen int lood ende verbernt tasscen. Dits goet op puusten. jn cankeren. in fistelen ende op zetere ende in ongemaken ¶ Een ander men sal pulveren borax. peper. met enioenne zope geminct ende gescuumt zeem. dits goet op swerte puusten ende sproeten die int ansichte risen. ¶ Een ander. men sal wijnsteen winden in een root coolblat ende netten in aysine. ende derna winden in stoppen genet in aysine. ende derna salment leggen ene lange wile onder bernende asscen. ende derna salment wringen. of disteleren dor ene pipe. Entie verscheit diere uut comt heet men oleum tartareum ende sijs goet iegen swerte plecken ende iegen
Auteursrechtelijk beschermd