Liber Magstri Avicenne

[21]

Van dropen willic u een deel bescriven Jn dropen of in ioocsele. eist dat die sake comt van bloede. men sal doen laten ter adren. Ende comt die sake van humoren men salse purgieren. Hier na salmen bade maken. ende doen int bad averone. savie alsene. ellecampane. sanctorie. Of men sal een bad maken daer men in sal doen sulfer ende sout. Men sal oec stoven met ellecampana. ende met scarper perteken ende maelrovie sanctorie. wegebrede. dockeblade die clessen dragen. hiermet sal men baden. Ende naden badene salmense smeren met witter zalven. mer men salse mingen in die vorseide dingen ¶ Nemt wortele van perteken .4. o. ende ellecampana. 1. o. dit suldi stoten ende gieten der op aysiin. ende latent also staen .8. dage ende derna sieden met swinen smoute tote dat die sope versoden siin. ende dan perssen dor enen doec. dits goede zalve iegen alrande drope. Ende .2. o. van deser zalven siin

[p. 83]

goet geminct met .1. o. witter zalven. ¶ Die meesters seggen dat alrande drope meest comt van salsum fleume. dats gesouten fleume. daer in hulpt zere dese zalve. Nemt calc ende gieter op borne ende roeret lange tote dat tcalc gesceden es ende dat vule water af gieten. ende doet in een out vat ende latet staen claren. ende dan suldi dat water afgieten in .1. ander vat. ende dat der onder gesonken es suldi werpen in .1. mortier ende doeter toe olien .1. luttel. ende van dien claren watere over wat uren. ende alst dicke gnouch es seldire in mingen quiczelver. Ende wacht dat gijt niet en smeret ane bleke apostemen. no an dyen. no an been. daer mochte ander ongemac toe trecken ¶ Dits oec goet. Nemt esscen hout dat out es ende droge ende cappet al in cleinen stucken. ende set enen pot altemale in die erde. ende der op suldi setten enen andren pot met vele gaetkinen. ende in dien uppersten pot suldi leggen vanden vorseiden houte. ende decten wel so datter geen doom uut en mach comen met leme ende met parts torten. ende omtrent den uppersten pot suldi groet vier maken. Ende dat uut dien potte lopet dat wert olie. ende so thout droger es so dolie beter es. Dese olie es goet iegen alrande drope. Ende dus mogedi olie maken van alrande houte