[10]
Causon of terciana continua. dats een corts die altenen geduert met groter hitten tote dat men bekeert of stervet Die lieden sceldent die hitte of theete ongemac ¶ Hi comt van vorten humoren van binnen adren. alse van colera die heet es ende droge. Men bekeerter af opten oneffenen dach. opten .7. of opten .9. of opten .11. of opten .13. dach. Dicwile gevallet als men niet en bekeeret opten .7. dach. dat es vrese. op dat dorine bleec es die te voren root was. Ende oec eist tontsiene van frenesyen alsi bleec wert achter den .7. dach. die te voren root was. dats .1. teken dat nature opwert trect daerbi blijft si bleec ende dats die doot. Alse der orinen vele es ende dicke ende turbel root. dats een teken dat nature haer purgiert metter orinen van haren quaden humoren. ¶ Wet dat alle die werken ende alle die medicinen die ten andren cortse daer voren gescreven siin sal men tote desen doen. sonder datmen in den andren corts meer bloets moet laten ter adren dan in desen corts. Ende men moet couder dingen antieren dan in den andren corts. ende merder hope. ende couder water ¶ Dit siin die tekenen hoe dat men bekennen sal causon of terciana continua iegen cynocus. Die orine es rodere ende min vet dan in cynoco. Verstaet aldus. In cynoco es dorine root. ende in causon rodere ende dickere. entie puls hardere slaende. entie lichame es hetere ende bernender. ende heeft utermaten groten dorst. ende begert te drinkene altoes. Ende meest comt dese corts in colerine ende in heten tiden ende in heten landen
Auteursrechtelijk beschermd