Vanden levene ons Heren

(1968)–Anoniem Levene ons Heren, Vanden– rechtenstatus


Vanden levene ons Heren [3027-3930]
[Folio 21rb]
hEt was ondere die ioden quamen Onsen here dat sie namen Met meneger geselscap 3030[regelnummer] Ende oec met groter bliscap Ane den cruce sine hieuen op Si maecten met hem alle haer spot Si namen yseren nagele saen Ende quamen tonsen here gegaen 3035[regelnummer] Si nichelden vaste sine voete Met groten naghelen vele onsoete Oec sloeghen si naghele in sine hande Die geperst hadden sere die bande Dat bloet ran al dat cruce tale 3040[regelnummer] Dat bequam den ioden wale Dat dat bloet sepelinghe ran Daer loech wel menich iode dan Nochtan en was daer man negeen Hine sach cliuen stappans den steen 3045[regelnummer] Daer dbloet op dat inde ran No daer en was niemen dies ontfermenisse nam In dit vernoey in desen sere Quam sijns dancs onse lieue here Die ioden en lietens hier omme niet 3050[regelnummer] Alsoe alst hen de duuel riet Si maecten haer scop ende haer sceren Op ihesuse lelic si geberen Nu warense coene ende bout Nv warense alle onmaten stout 3055[regelnummer] Al hadden sine nv te haren wille Ihesuse sine sueghen niet stille Onse here was sachte als een lamp In hem en was felheit no scamp Maer hi verdroech oetmoedelike 3060[regelnummer] Dat menne voerde onwerdelike Dit doechde hi om ons algader Onser alre euwelike vader tVee dieue hilt men daer geuaen Die met ihesuse gecruust waren saen
[Folio 21va]
3065[regelnummer] Eenen dief die te siere rechter hant Den anderen ter slinker al te hant Doe quam geloepen her pylatus Ende screef bouen hem aldus Waer omme ihesus ware geuaen 3070[regelnummer] Ende oec anden cruce gedaen Dit was die brief Dit was ihesus Der ioden coninc nazarenus Doe riepen die ioden saen Pylatus wat hebdi gedaen 3075[regelnummer] En scrijft niet dat hi es int lant Coninc. maer dat hijs hem onderwant Pylatus antwerde vele saen Dat ic screef nv latet staen Doe quamense alle ende wopen lot 3080[regelnummer] Om ihesus cleder al was hi got Ende met hem maectense haer spot Si waren onwerdich ende sot Doe riep elc iode al met sire cracht Man quite di seluen of du macht 3085[regelnummer] Of du best god dijn anxt es groet Quite di seluen van derre noet Du heefs soe vele vertuut gedaen Quite di vanden cruce saen En doedijt niet dat gi hier hoert 3090[regelnummer] Man wi seggen di bat voert Dan en weten wi niet man dat du best God. no gods sone. no heilich kerst In meneger manieren in meneger wijs Rampenerdense gode van paradijs 3095[regelnummer] Maer hi en antwerde hen niet en twint Hi was oetmoedich als .j. kint dIe dief die hinc ter slinkerhant Rampenerde ihesum al te hant In derre manieren in derre wijs 3100[regelnummer] Rampennerde hi ihesum van paradijs
[Folio 21vb]
Man du seits dattu god waers Hoe comt dattu hier dus veruaers Eest dijns willen eest dijns dancs Dattu hier met ons verhancs 3105[regelnummer] Du waers gewone te doen genade Soe wien. di quam te rade Helpe di seluen laet dandere staen Ende ons met di laet quite gaen Du die wilen miracule daets 3110[regelnummer] Nu eest tijt dattu di seluen beraets Nu soutu weten bestu god Quite di seluen sonder spod Nu heefstu noot quite di seluen saen Ocht ons metti wi sijn ontdaen 3115[regelnummer] Mi heeft wonder waertoe dattu laets Dattu dus di seluen haets Dattu di niet en quijts van derre noet Di ende ons. onse pine es groet Waertoe hancstu hier soe naect 3120[regelnummer] Man waertoe bestu soe verraect Dat ic di segge du swigs al stille Du gebeers al oft ware dijn wille Waerstu god ende heilich kerst Dat grote torment daer du in best 3125[regelnummer] Het soude te nieute werden saen Waert waer du liets ons quite gaen Men mach hier groet wonder sien Du seits du wists dat soude gescien Waer omme doechstu dan dit seer 3130[regelnummer] Ane di en gelouic nemmermeer dIt horde de dief ter rechter hant Ende antwerde sinen geselle te hant Geselle seit hi du best sod Dattu dus sprecs tot dinen god 3135[regelnummer] Ic ontrade dattu wel sere Dit arnen souts van onsen here
[Folio 22ra]
Dat machtu sien an sijn gelaet Dat niet en es om sine mesdaet Hi es suete dat hi swicht stille 3140[regelnummer] Daer bi wetic dat het es sijn wille Dat hi met ons dus es verdaen Dat heeft hi al om dat gedaen Dat hi wilt te sinen wille Breken rouen donreine hille 3145[regelnummer] Geselle ic seg di oppenbaer Ic wilt oec weten ouerwaer Dat hi dese pine heeft vercoren Om siin volc dat es verloren Ic ende du hebben mesdaen 3150[regelnummer] Die onwet hebben gedaen Met groten rechte waren wi geuaen Wet es. dat wi dus sijn verdaen Wi minden alle ledichede In ons was alle onsuuerhede 3155[regelnummer] Dien wi mochten daden wi quaet In ons beiden was ouerdaet Bedie dat men ons dus vent Recht es dat wi dogen torment Recht es dat wi siin verdaen 3160[regelnummer] Dat en sate niet wel liet men ons gaen Maer mi ontfarmt dese man Inden welken niemen venden en can Sonde mesprijs no dorperhede Onmate noch behagelhede 3165[regelnummer] Houerde felheit no scamp Maer al dat selue dat in een lamp Mi ontfermt meer sine pine Dan de dine of dan de mine Die hi hier doghet sonder plecht 3170[regelnummer] Sonder verdiente ende sonder recht Maer dat heeft mi herde vertroest Datter omme sal siin verloest Menege ziele die es in de helle
[Folio 22rb]
Die sere heeft haren onwille 3175[regelnummer] Geselle wi waren beide fier In ons was prijs ende groet dangier Dat mach ons rouwen vele sere Dit weet algader onse here Gheselle en wetti selue wel 3180[regelnummer] Dat wi en geerden niet el Dan stelen ende liegen Wijf ende oec man bedrieghen Die dit iaecht eest man eest knecht Dat es vonnesse ende recht 3185[regelnummer] Dat menne iaghe ende va Dat men anden cruce sla Dese sonden berouwen mi Vele sere dat seggic di Dats mi berouwet dat dunct mi goet 3190[regelnummer] Inne weet geselle oft du oec doet Nu salic bidden desen man Met al mire herten dat ic can Dat hi gehore mine tale Want hi es god dat wetic wale 3195[regelnummer] Ay god seit hi geweldich here Mine sonden rouwen mi sere Al hancstu met ons dieuen hier Du en waers dief no pantenier Geweldich god dattu hier hancs 3200[regelnummer] Dat es dijn wille dat es dijn dancs Dijn oetmoedichede es soe groet Dattu doechs dese bitter doet Ane dat cruce om onsen wille Ende om de ghene die sijn in de helle 3205[regelnummer] Ay god geweldich here mijn Ochtic dorste soe coene sijn Dat ic di ghenade bade Hoe gerne quamic di te rade Ochtic mochte die hande mijn 3210[regelnummer] Ontbenden hoe saen ic soude sijn Gevallen voer dine voete here
[Folio 22va]
Want mine sonden rouwen mi sere Ghi sijt genadich ende soe goet So wat dat enich man mesdoet 3215[regelnummer] Berouwes hem wilt hijs af staen Here gi vergheuet hem saen Here mine sonden rouwen mi Ic wilre afstaen dat seggic di Ochtu noeyt miracule dades 3220[regelnummer] Dattu mi nv saen berades Ic aensie die wile dat mijn lijf int Soe node benic in dit tormint Oetmoedich god van hemelrike Dine pine doegs om arme ende rike 3225[regelnummer] Ghehore mi in derre noet Mijn herte cliuet ic ben doet Here gehore die bede mijn Doer oetmoet so biddix di Die in sonden es beuaen 3230[regelnummer] Wilt hijs berouwenesse hebben saen Wilt hijs afstaen comt hijs te rade Dat gi hem selt doen genade Ghi sijt god marien sone Ghi selt sijn eer heden noene 3235[regelnummer] Met groter bliscap inden trone Met uwen vrienden die sijn so scone Dies biddic di geweldich kerst Gedincke mijns al daer du best Dat daer moete die siele mijn 3240[regelnummer] Met di sijn dies biddic di Dat daer heden mine siele Metten inghel sente michiele gOd onse here horde al toe Hoe en die man anbedde doe 3245[regelnummer] Geselle ic segdi al oppenbaer Ende oec al ouer waer Gewarich biechtere so bestu Om tgroet berouwenisse dattu hefs nv
[Folio 22vb]
Wes in hoghen ende niet en claghe 3250[regelnummer] Du salt heden desen daghe Met mi sijn int paradijs Dat seggic di nv blide sijs Te goeder tijt waerdi geboren Dat ghi ten trone selt sijn vercoren 3255[regelnummer] Hadde v geselle aldus gedaen So waer hi met ons beiden saen An di geselle mach menich man Nemen dicwile boeken an Dattu soe vele quaets hefs gedaen 3260[regelnummer] Ende du soe salich best so saen Inne mach nimmeer seggen te di Soe sere steken die naghele mi Mijn adem cort mijn herte es seer Onse here en seide nemmeer 3265[regelnummer] Dat dus die dief sijn sonden lijdde Dat was omtrent middachtide dOe quam maria onse vrouwe Met groten sere met bitteren rouwe Ende dewangeliste sinte jan 3270[regelnummer] Quam met als een serich man Daer ihesus anden cruce hinc Al was hi god ewelic coninc Maria claghede vele sere Gode onsen lieuen here 3275[regelnummer] Inder manieren in derre wijs So groette se haer kint van paradijs Lieue kint twi hancstu hier Du en waers dief no pantenier Lieue kint wie was soe bout 3280[regelnummer] So fel so fier so quaet so stout Dat hi di an dit cruce hinc Ia en bestu een ewelijc coninc Lieue mochtet yet gescien Dat mijn oghen mochten di sien 3285[regelnummer] Vanden cruce verloest
[Folio 23ra]
Ia en bestu alder werelt troest Lieue kint du hancs hier als .j. dief Ic hadde di vtermaten lief Ic sie dijn doet ic sie dijn inde 3290[regelnummer] So rouwech en was nie moeder van kinde Gabriel hi troeste my Lieue. als hi boedscapde dy Maer segghen hi mi dies niet en woude Datmen di dus crucen soude 3295[regelnummer] Ic maecte mi hoghelijc ende blide Als hi di boedscapde in dien tide Dies en gewaechde hi niet en twint Hiettijt hem vele lieue kint Lieue here als ic di droech 3300[regelnummer] Dicke speeldic ende loech Dat ic daer toe was vercoren Dattu van mi wouds sijn geboren Nu benic een dat serichste wijf Die nie ter werelt ontfinc lijf 3305[regelnummer] Als ic di droech vele lieue kint Met alden lieden wasic gemint Wie sal mi nv doen goet ende ere Als du doet best lieue here Al hadstu mi daer toe vercoren 3310[regelnummer] Dattu van mi wods sijn geboren Ic was een v dienst wijf Du daeds mi groet eere al mijn lijf Ic horde dicke gabriele Dinen bode ende inghele vele 3315[regelnummer] Die wijsde ende troeste mi Lieue here dat was om di Als du waers jonc du en waers niet fel Mi bequam sere wel dijn spel Dies du en dades negeen dinc el 3320[regelnummer] Maer minen wille daetstu wel Hadstu hongher ofte dorst Lieue ic gaf di mine borst
[Folio 23rb]
Suete here als du mochs gaen Dat ic di biet was saen ghedaen 3325[regelnummer] Nu en hetic v dinc nemmermeer Ic sie di steruen dats mi groet seer Dies gedinct mi lieue here Dat ic met rouwe no met sere Nie en was beuaen als ic di droech 3330[regelnummer] Maer dicke speeldic ende loech Lieue kint als ic van di gelach Hoe wel icx mi behaghen mach Dan en haddic rouwe no seer Salic di spreken nemmermeer 3335[regelnummer] Nenic wanic dats mi groet seer Du hads gesproken waric comen eer Lieue kint du en hads niet .ij. jaer So maecte die coninc herodes maer Dat hi di gerne soude verslaen 3340[regelnummer] Doen vloechtic di in egypten saen Nu en canic di gehulpen niet So wat tormente dat di gesciet Oemoedich here ewelic coninc Nu eest waer ende ic onderuint 3345[regelnummer] Lieue kint als du laegs bi mi Dicke helsdic ende custe di Salic alsoe doen nemmermere Segge mi ic bids di lieue here Dat symeon die oude man 3350[regelnummer] Mi seide vore den tempel dan Maria moeder maghet ionvrouwe Du salt noch hebben bitteren rouwe Van dinen kinde dat gi hier siet Lieue kint nv eest gesciet 3355[regelnummer] Al droeghic di du waers mijn here Du daets mi nochtan emmer ere Geweldich here oetmoedich kint En haddic di niet so sere gemint Soe en haddic niet so bitter seer 3360[regelnummer] Salic di cussen nemmermeer
[Folio 23va]
Nenic niet dat wetic wel Want die ioden siin so fel Sagense mi comen te di Si souden saen trainen mi 3365[regelnummer] Dat loefdic gherne lietmen di gaen Dat men mi trainde saen Lieue kint en es dit iammer groet Dat ic di die bitter doet Sie gedogen voer mi 3370[regelnummer] Ende inne dar lude clagen di Met rechte clagic dijn seer Kint en gewinnic nemmermeer Inne dar om di lude suchten Dat die ioden horen mochten 3375[regelnummer] Also wel mochtic swigen stille Als claghen lieue dinen onwille Swighen arme hoe mochtic swigen Kint en wanic meer gecrigen Dorstic di lieue comen so bi 3380[regelnummer] Dat ic die voete taste van di Dat mi die ioden niet en saghen Hoe sere soudic di dan clagen Mochtic tasten die naghele groet Die di bringhen toter doet 3385[regelnummer] Die di steken in die voete Al dorentore vele onsoete Tasten. och erme ofticse taste Wat holpt si staen soe vaste Si sijn so lanc so swaer so groet 3390[regelnummer] Sie bringhen dine herte ter doet Lieue minne nv en magic nemmeer Spreken om dit grote seer Dat in mi es om dinen wille Mijn herte ontsinct mi al swigic stille 3395[regelnummer] Nochtan lieue kint dorstic gaen Tote di ende bi di staen Clagen tvernoey dat di es gedaen
[Folio 23vb]
Soe soude mijn herte sonder waen Te haer seluen weder comen saen 3400[regelnummer] Nenic en dert niet ane gaen Saegmen mi men soude mi vaen Men soude mi crucen sonder waen Dit loefdic vele gerne saen Wildemen di nv laten gaen 3405[regelnummer] Dorstic nemmer sijn so bout Dat ic de ioden dus sie so stout Geloefdic seluer ofte gout Dat sie mi hinghen an dit hout So menic lieue dat si di lieten gaen 3410[regelnummer] Vanden cruce saen En wilden si oec dit niet ontfaen Dat si quite di lieten gaen So wildic wesen sonder waen Anden cruce met di verdaen 3415[regelnummer] Ende oec met di hedemeer Moeste deilen al mijn seer Lieue minne du swijchs al stille Hoe sere hefstu dinen onwille Mochstu spreken ende gaen 3420[regelnummer] Hoe soete soudstu antwerden saen Dinen noet die ic dus sere claghe Ende al lieue kint dat ic di vraghe Nu en moegdi antwerden no spreken Dat doen die naghele die .v. steken 3425[regelnummer] Lieue kint dies gedincket mi Dat drie coninghe omme di Quamen van verren di sien Ende sie tot bethleem gien Ende daden offerande menichfout 3430[regelnummer] Mirre wieroec ende gout Doe wasic blide als dat geschiede Nv es mijn herte al of si briede Lieue minne hoe swert es dijn mont Hoe groet torment heefstu becont 3435[regelnummer] Hoe bebloet siin dine hande
[Folio 24ra]
Hoe stijf siin dine witte tande Hoe siin dijn hande ende dine voete Doergaet genichelt vele onsoete Hoe sepelinghe rent dijn bloet daer wt 3440[regelnummer] Ute diere witter huut Lieue minne twi seidic dit Ic seide dine huut ware wit Al wasse wit si es nv swert Vele stijf cout donker ende hert 3445[regelnummer] Lieue minne gheweldich here Met groten rechte clagic di sere Hoe valu siin die leppen dine Die hem dicke voegden an de mine Waer siin die claer ogen geuaren 3450[regelnummer] Die claer als een carbonkel waren Lieue minne saelt nemmermeer gescien Dat sie op mi selen sien Stijf siin dijn vinghere ende dijn hande Gelu siin dijn witte tande 3455[regelnummer] Lieue here lieue minne Dat wanic wel in minen sinne Dorstic di nemmer comen so bi Di souts te saechter sijn ende mi Dese naghele nichelen di so sere 3460[regelnummer] Hoe mach v saechte siin lieue here Du en mach spreken horen no sien Noch du en caens der doet niet ontvlien Lieue here du waers soe scone Nu hebdi ene scarpe crone 3465[regelnummer] Die di perst die di torment Datter bloet sepelinghe vte rent Al dattu doechs al dat di deert Gaet mi so na ter herten wert Soe rouwich es si datmen v doet 3470[regelnummer] Dat sie met rechte mach wenen bloet Men seit so salt doen emmermeer Daer ogen daer lief daer hant ende seer Al en der di niet tasten mine hant
[Folio 24rb]
Die pine die du doechs al te hant 3475[regelnummer] Die doegic lieue dat seggic di Al dijn vernoy es binnen mi Lieue minne du waers so vroet Ic wane dine doet betekent goet Bloeme du wets al dat gesciet 3480[regelnummer] En waert niet waer du en doges dit niet Du hefs selue dese doet vercoren Om diin volc dat es verloren Bloeme dit heeft mi vertroest Datter bi sal siin verloest 3485[regelnummer] Meneghe siele die moest in de hille Hier bi wetic dat het es dijn wille Bloeme hoe mochtic serich sijn Ic droech di ter herten mijn Bi di selen die siin verloren 3490[regelnummer] Van eerst werden gheboren Aey adam vele sondich man Waertoe waerstu so gierich dan Dattu braecs mijns kins gebod Die was dijn here ende dijn god 3495[regelnummer] Ay adam dat mijn lieue kint Dy ende dandere soe heft gemint Dat hi doecht dese better doet Om dinen wille dats iammer groet Iammer arme wat seggic nv 3500[regelnummer] Lieue bloeme en belgt niet v. De grote rouwe dede seggen mi Dienic doege lieue om di Ic soude seggen dine doet Es alder werelt bliscap groet 3505[regelnummer] Dine doet sal dine creature Quiten uten helschen were Lieue bloeme lieue minne Ic sie dijn hoeft ende dinen kinne Vallen op dijn scouderen nv 3510[regelnummer] Lieue minne wat gedoechstu Lieue minne nv en magic nemmeer
[Folio 24va]
Di claghen v wel better seer Dat doe ic om dinen wille Die maecht maria swech al stille 3515[regelnummer] sEnte jan ewangeliste Die bi haer stont, als hi dit wiste Dat maria claghede onsen here Die stont ende weende vele sere Hi seide maria moeder maegt 3520[regelnummer] Weest blide ende niet en claegt Dat gi daer toe waert vercoren Dat dese here wilde van di sijn geboren Maria gi waert ter goeder tijt Geboren dat gi moeder sijt 3525[regelnummer] Dies heren die sal te sinen wille Breken rouen donreine hille Vrouwe suicht ende sijt nv blide Gi selt sien in corten tide Dat alle onse vriende die sijn verloren 3530[regelnummer] Ten euschen paradise selen comen Gi sijt alder werelt vrouwe Laet wesen desen bitteren rouwe En dogede ihesus niet dit bitter seer Ziele en worde blide nemmermeer 3535[regelnummer] Nu selen onse vriende ende onse mage Sonder twiuel eer iij. daghe Blide siin inden hoghen trone Met groter bliscap vele scone Daer selen sie wesen euwelike 3540[regelnummer] Metten inghelen hoghelike Maria en meslaet v niet V kint het weet al dat gesciet Laet v. wenen ende swijcht al stille Dit doecht hi om die sijn in de hille 3545[regelnummer] Lieue vrouwe suuer maecht Dit grote seer dat gi hier claecht Sal menegen ledegen vander doet Die nv sijn in pine groet
[Folio 24vb]
Ghi sijt porte van paradijs 3550[regelnummer] Gi sijt soe vroet ende soe wijs Troest gi v seluen lieue vrouwe Laet bliuen desen bitteren rouwe Mi doet leede v grote seer Sente jan hi en seide nemmeer 3555[regelnummer] iHesus onse lieue here hi hoerde al toe Hoe en sijn moeder clagede doe Ende hoe de goede sinte jan Siere moeder troest al daer hi can Als hi dit horde ende sach 3560[regelnummer] Sprac hi soe hi oetmoedelecst mach Lieue moeder suete vrouwe Ic hanghe hier met groten rouwe Al hangic an dese cruce hier Ic en was dief no pantenier 3565[regelnummer] Gisternauont wasic gesocht Ende verraden ende vercocht Doen gheselde men mi onsaechte sere Die ioden al wasic haer here Lieue moeder en meslaet v niet 3570[regelnummer] Dit torment dat ghi hier siet Dogic om der gheender wille Die nv barren in die hille Ia en heuet v jan niet geseit Die hier bi v staet en screyt 3575[regelnummer] Waer omme ic doge dese bitter doet Daer na sal comen die bliscap groet Lieue moeder lieue trouwe Alder werelt moeder ende vrouwe Nu saelt mijn volc hebben bekint 3580[regelnummer] Dat ict met trouwen hebbe gemint Dat ic om hem dit seer desen noet Gesmake. ende dese bitter doet Moeder en mach niet meer tedi Spreken. mijn herte ontsincket mi 3585[regelnummer] Ane di moeder nemic orlof Die di eert hebben minen lof Die di weerdt die di doet eere
[Folio 25ra]
Hi sal int paradijs wesen here Die di vleiet hi es vroet ende wijs 3590[regelnummer] Want du best porte van paradijs So wie sal in hemelrike Eest pape eest leec. arm oft rike Metten inghelen blide sijn Dat selen doen die gebode dijn 3595[regelnummer] Dit leen lieue moeder dit geuic di Dattu heefs ghehoert van mi eNde du jan getrouwe vrient Die mi dicke wel heefs gedient Mire moeder beuelic di 3600[regelnummer] Alsoe lief als du hefs mi Te comen bouen inden trone Ende daer met mi te sine scone Eere mire moeder met al dire cracht Nem ware te hare al dattu macht 3605[regelnummer] Doet haer te eren al dine machte Dan saltu leuen ewelike sachte Gi sijt beide suuer ende maecht V. geselscap mi wel behaecht Ian ic segdi ouer waer 3610[regelnummer] Sekerlike ende oppenbaer Soe wie mire moeder doet ere Hi sal int paradijs sijn here Met siere moeder in derre wijs Beualse ihesus van paradijs 3615[regelnummer] Soe wiet es eist man eist wijf Hi sal hebben dewelike lijf Hier ane souden wi alle leren Dese vrouwe souden wi alle eren Die dus die goede sinte jan 3620[regelnummer] In siere hoeden ontfinc dan Ia en hordi niet wat onse here seide Wat hi vore sinte janne leide Dat niemen en soude sijn so wijs Die quame int paradijs 3625[regelnummer] Hi en dade der maghet van hemelrike Eere. ende lof een yeghelike
[Folio 25rb]
hEt was noene doe god onse here Gaf enen roep lude ende sere Sijn torment ende sijn anxt was groet 3630[regelnummer] Die naghele stakene ter doet Hi suchte hi beuede hem was onsachte Sijns selfs inde hoepte hi ende wachte Daer hi inden anxt groet was Met rechte was hi worden las 3635[regelnummer] Sijn herte cloef ende ontsanc Die bitter doet hem herde dwanc Doe sprac ihesus wel iammerlike Dese tale ende wel oetmoedelike Ay seit hi hoe sere dat mi nv dorst 3640[regelnummer] Te drinckene dat mi nv sere lust Hoe gherne soudic drincken Mijn herte wilt mi ontsincken Als hi dit seide die ioden alle Brachten edic geminct met gallen 3645[regelnummer] Ende maecten daer af enen dranc Die wel bitter was ende cranc Als dese dranc geminct was Sie brachtene ihesu die hinc wel las Ende settene hem an sinen mont 3650[regelnummer] Daer hi vele dorstich stont Die galle dranc ihesus onse vader Ende seide hets ghedaen algader Als dese felheit was ghedaen Doe sprac hi dese tale saen 3655[regelnummer] Vader seit hi vanden trone Die mi ane marien scone Sondes. daer ic was geboren Om te quitene die sijn verloren Wat laetstu mi in desen noet 3660[regelnummer] Soe langhe. mine pine es groet Hoe gedoechstut lieue here Dat ic soe langhe in desen sere Ben beuaen des biddic di Dattu saen gheefs inde mi 3665[regelnummer] Lieue vader ontferme v mijns
[Folio 25va]
Oec biddic v ontferme v sijns Die mi nichelden in desen sere Ic vergheeft hen lieue here Die mi hebben dus verraden 3670[regelnummer] Ic vergheeft hen algader In dien dat sie aldus selen doen Die ieghen dandere selen mesdoen Vader ic beuele di te hant Minen gheest in dine hant 3675[regelnummer] Ic bidde v dat gien moet ontfaen Als hi wtgheet nv vele saen Als ihesus dit ghesprac Sine soete herte gaf enen crac Sine aderen scorden siin hals brac 3680[regelnummer] Die bitter doet hem stappans stac Daer versterf die menschede Maer niet sine godlijchede Dat wi weten ouer waer algader Dat was heilich gheest sone ende vader 3685[regelnummer] aLse dus versceden was onse here Die erde beuede stappans sere Donker wert ouer al Die bossche beueden ende ertrike al Die sonne liet haer scinen staen 3690[regelnummer] Die stene clouen alle saen Al die werelt werts geware Die ioden wordens alle in vare Die bome droegden alle na ende verre Haer scinen liet elke sterre 3695[regelnummer] Die gordine die inden tempel hinc Scorde. stappans ende elke dinc Wisselden te diere wilen haer nature Sine doet vernam elke creature Ay hier ane souden wi alle leren 3700[regelnummer] Te desen souden wi ons bekeren Onsen here souden wi eren Sine werdicheit souden wi meeren Dit was onse here deuwelike vader
[Folio 25vb]
Die hem seluen hier in algader 3705[regelnummer] Brachte. om die waren verloren Dese doet hadde hi vercoren Dit dogede hi om enen iegeliken Die enege god van hemelrike Dit mach wel weten man ende wijf 3710[regelnummer] Daer deen om den anderen geeft sijn lijf Als om ons dede onse here Die wi met rechte vleien ende eere alse pylatus dit bokin sach Dat hem wisselde die dach 3715[regelnummer] Ende ouer al elke creature Wisselde haers selfs nature Ende dat die stene clouen saen Ende die sonne liet haer scinen staen Dat het doncker wert ouer al 3720[regelnummer] Dat bossche beuede ende dal Als pylatus horde ende sach Hi riep wel lude ay lase o wach Men mach wel sien ende kinnen hier Dat dese man en was niet pantenier 3725[regelnummer] Wat hebben wi alle kaitiue gedaen Twi hebben wi desen man verdaen Men mach wel an dit bokin sien Dat hi wiste al dat soude gescien Hi was godssone sonder waen 3730[regelnummer] Dat doet hi ons bekinnen saen Wie es so dul ende soe sod Hine mach wel weten hi es god, Waert te doene dat es gedaen Doer mi en worde hi niet verdaen 3735[regelnummer] tEr vespertijt quamen si saen Die joden te pylatuse gegaen Ende seiden pylatus lieue here Wi bidden v doet ons allen ere Hoert ons tale dies bidden wi .v. 3740[regelnummer] Wat wi willen segghen v Hier comt margen een hoechtide Dat wi alle souden sijn blide
[Folio 26ra]
Laet ons afdoen dese dieue Ende desen man soe doedj ons lieue 3745[regelnummer] [P]Ylatus antwerde dit louic wel Die ioden stappans en doen niet el Maer gaderen hem alle saen Ende quamen te caluarien gegaen Daer ihesus anden cruce hinc 3750[regelnummer] Versceden hort ontfermelike dinc Twee dieue die bi hem hinghen daer Leueden noch al oppenbaer Te hen beiden quam een iode gegaen Ende brac haerrer beider been saen 3755[regelnummer] Ons heren been en brac hi niet Dien hi doet verstoruen siet Doe quam longius gegaen Met enen scarpen spere saen Ende stac dat spere in onsen here 3760[regelnummer] Die was gewont ende wondene mere Vter wonden quam gegaen Water ende bloet vele saen Daer dat water ende dat bloet ran Opten steen dat hi cloef dan 3765[regelnummer] Alsoe als yeue dat ierste wijf Van adams siden ontfinc lijf Alsoe wert de heilighe kerke geboren Van ihesus siden die was verloren Om dat dat water ende dat bloet ran 3770[regelnummer] Wt ons heren siden dan Om dat es daer water geminct Ende wijn daer men messe nie sinct Longius hi en lette niet Alsoe als pylatus hiet 3775[regelnummer] Hi quam te hen allen drien geuaren Die anden cruce verdaen waren Hi nam alle drie die crucen saen Ende heffese vter erden saen Die crucen bleuen liggende op derde 3780[regelnummer] Longius hi ginc sire verde Daer bleef liggende ihesus op derde
[Folio 26rb]
Al doet ende vele onwerde bInnen der stat was een goet man Die ioseph hiet inden tide dan 3785[regelnummer] Al was hi iode. vroech ende spade Badt hi gode stillekine genade Hi nam dat in groten sere Dat men dus werde gode onsen here Die ioseph hi quam gegaen 3790[regelnummer] Pylatuse viel hi te voeten saen Ende seide pylatus lieue vrient Dicke hebdi mi wel gedient Ocht gi mi liet hoe gherne ic name Die hem god hiet dies mans lichame 3795[regelnummer] Pylatus seide dit louic wel Wi sijn gevriende al badi el Wildi margen wildi nv Al te gadere hebtene .v. Ioseph was blide hi en lette niet 3800[regelnummer] Als hem dit pylatus hiet Nichodemus was oec een goet man Ende quam met ioseppe gelopen dan Doe quamen saen dese twee manne Tote den ewangeliste sinte ianne 3805[regelnummer] Ende tonser vrouwen sente marien Eere coninginne vrien Si seiden dat hen pylatus dede dese ere Dat hi hen den lichame van onsen here Hadde gegheuen te haren wille 3810[regelnummer] Als si dit horden si sweghen stille Blide was maria ende sinte jan Nichodemus ende ioseph dan Ende ginghen alle viere saen Daer ihesus lach anden cruce verdaen 3815[regelnummer] Als daer dese geselscap quam Ioseph in sine hant ene tanghe nam Die tanghe was suuer ende rene Als daer toe hoerde ende clene Die naghele die stac in ihesus voete 3820[regelnummer] Die trac hi ute vele soete
[Folio 26va]
Ende die in sine hande staken dan Die trac hi ute soe hi best can Doe quam ioseph ende nychodemus Al dus ontnichelt was ihesus 3825[regelnummer] Ende onse vrouwe ende sinte jan Die namen onsen here dan Ende hieuene vanden cruce sachte Dese viere daden al hare machte Onse vrouwe begonste te wenen onsachte 3830[regelnummer] Ende wert van rouwen harde onmachte Sie wranc haer hande ende suchte sere Sie clagede iammerlike onsen here Haer was wee ende vele onsachte Sie droechde ihesus wonden sachte 3835[regelnummer] Doen sprac maria onse moeder ende vrouwe Met groten sere met bitteren rouwe Mijn herte droech di lieue here Wat wonder eest al suchtic sere Doen nam maria balseme soete 3840[regelnummer] Ende saluede die wonden an sine voete Ende in sine hande ende in sine side Dit dedse gherne al wasse onblide Doe namse ene witte dwele Die sinte ian daer bi hilt gerne 3845[regelnummer] Ende wonden daer in onsen here Wel suuerlike met groten sere Ioseph hadde des nachts gewaket Ende hadde een scoen graf gemaket In enen witten merbelsteen 3850[regelnummer] Alsoe clare als een yvorijnbeen Dat graf was in enen lochtene dan Daer en quam wijf no man Doe quam ioseph ende dandere man Onse vrouwe ende sinte ian 3855[regelnummer] Dese viere namen onsen here Ende leidene in een graf wenende sere Doe namense enen groten steen
[Folio 26vb]
Die swaer was claer als yuorbeen Ende leidenne op dat graf ende recht 3860[regelnummer] Dese daden ihesuse al sijn recht Als dese viere dit hadden gedaen Si namen an ihesuse orlof saen Ende hadden claghen vele groet Om onsen here die daer lach doet 3865[regelnummer] Als sie waren in dese claghe Het was spade in goeden vriendaghe sAterdaechs tilike saen Doe quamen vele ioden gegaen Te pylatuse die in sine hant 3870[regelnummer] Al die voegdie hadde int lant Doe sprac een iode pylatus here Hort onse tale doet ons ere Dese man die wi hier hebben doet Dus gedane wijs in derre noet 3875[regelnummer] Die hier anden cruce es verdaen Dies hi onse wet verkeerde saen Lieue here men doet ons verstaen Dat hi seide daer hi stont geuaen Dat hi derdages risen woude 3880[regelnummer] Ende weder leuen soude Lieue here of ghijt gebiet Gerne baden wi v of gijt riet Dat gi dadet hoeden sijn graf Sone souden wi twint sorgen daer af 3885[regelnummer] Want hi was een bedecket man Comen sine iongheren dan Ende stelene soe siin wi ontdaen Here doet sijn graf hoeden saen Dat comt ons wel in onsen moede 3890[regelnummer] Riset hi dat sal sijn sonder hoede Comet dus alst oec wel mach So en sagen wi nie soe droeuen dach Mogenne sine iongeren vte stelen Ende mogen siet ons verhelen 3895[regelnummer] Soe selen sie seggen verre ende bi
[Folio 27ra]
Dat hi dus verresen si Dan sal ons die rouwe deren meer Danne wi hadden laten gaen eer Pylatus antwerde den ioden saen 3900[regelnummer] Waeromme souden wi hier omme sijn ontaen Hebt orlof ende sueket dien gi wilt Dese vrese heb ic v saen gestilt Doet wapenen ridderen die gi wilt Felle ende starke soe hebdi gestilt 3905[regelnummer] Doe se ligghen op sijn graf Dat sie niet en sceden daer af Soe comt dat die derde dach leden si Desen orlof hebt van mi Die ioden quamen alle gemene 3910[regelnummer] Ionghe ende oude groet ende clene Ende riepen here gi segt wale Ons becomt wel uwe tale Hebt groten danc ende lof Dat gi ons gheeft desen lof 3915[regelnummer] Die ioden en daden saen niet el Maer wapenden .iij. ridderen wel Ende leidense op ons heren graf Daer sie niet en scieden af Maer als die derde dach leden ware 3920[regelnummer] So soudense sijn sonder vare Nu laghen iij. gewapende man Ende hoedden ons heren graf dan Dat sine iongheren niet en quamen Ende dat sijs niet en namen 3925[regelnummer] Ende sie niet en maecten mare Dat ihesus verresen ware Ons heren passie hebdi gehoert Sine op verrisenesse hort nv voert Tierst hort hoe hi brac de hille 3930[regelnummer] Ende sine vrient loeste te sinen wille

Vorige Volgende

Vanden levene ons Heren

Vanden levene ons Heren [3027-3930]

Over het gehele werk

auteurs