Vanden levene ons Heren

(1968)–Anoniem Levene ons Heren, Vanden– rechtenstatus


Vanden levene ons Heren [3931-4937] dIe hille staet in een dal In derre wijs als ic v seggen sal
[Folio 27rb]
Dauid die prophete ons orconde gheeft Dat die hille twe stade heeft 3935[regelnummer] Dene stat bouen. dandere onder steet Beide siinse stinckende ende leet Die onderste stat es iammerlike Alsoe sal sie wesen ewelike Daer es suchtinghe rouwe ende bitter seer 3940[regelnummer] Daer weent men ende crit emmermeer Daer es carminghe emmer ende hantgeslach Daer eist vroech ende spade altoes nacht Elc kaitijf roept al dat hi mach Twi werdic ie eylaes o wach 3945[regelnummer] Daer es onder vlamme ende vier so heet Dat elken kaitijf es ghereet Waer hi in enen iseren berch gedaen Hi gloeide ende smolte saen Bi dien viere staet ene beke 3950[regelnummer] So cout so swert so grueleke Half die zee waer sier in gedaen Sie veruorse te yse saen In dat vier dat daer es so heet Hanghen ketele wel ghereet 3955[regelnummer] Daer sonder inde kaitiuighe zielen In barren wallen ende wielen Ende in die coude swerte beke Tormenten zielen eweleke Die beke es bitter als venijn 3960[regelnummer] Hoe wee es hen dier inne sijn Nu sijn sie int hete vier Dan worpt mense in die beke onghier Dit torment dit bitter seer Doeghen daer die kaitiue emmermeer 3965[regelnummer] Nu wallense in dat pec ewelike Dan badense in die coude beke In dit vier in dese beke Sijn si sonder inde eweleke Daer bi es vele onghiers
[Folio 27va]
3970[regelnummer] So groet stanc so vele ondiers Padden slanghen sarpente draken Die sielen te verslindene si haken Die tote nv in dat pec wielen Ende daer tormenten sere hare zielen 3975[regelnummer] Die kaitiue die daer sijn verloren Roepen twi worden wi ye gheboren Sondeghe onsaleghe vermesamt lijf Dat crit vele lude elc caytijf Die slanghen ende die sarpenten 3980[regelnummer] Hebben in de helle dese renten Dat si den kaitiuen al in een Sughen dmarch wt haren been Daer bi es soe groten stanc So wl so better so stinkende cranc 3985[regelnummer] Dat tonghe vertellen niet en mach Die daer sijn criten nacht ende dach Daer woent in dat wl ondier Als die vissche int water hier Die zielen die daer in sijn 3990[regelnummer] In desen stanc in dit venijn Sie criten sie suchten al in een Dit lijf hebbense ende el negeen Niet lijf maer die bitter doet Die daer es sonder inde groet 3995[regelnummer] Dats emmer doet al sonder lijf Daer en leuet gheen caitijf Voert so sijnse vele onghedwelte V^c. hamere op aenbelte Die daer sonder inde slaen 4000[regelnummer] Dit horen si alle sonder waen Vroech ende spade nacht ende dach Daer crit men aylase o wach Voert eyst so donker ende so swart So stinkende gruelijc ende so hart 4005[regelnummer] Dat men donkerheit tasten mach Soe groet torment nie man en sach
[Folio 27vb]
In die dicke donkerhede In die swarte caitiuichede So crit elke siele ay lase caitijf 4010[regelnummer] Twi wardic ye vele sondich lijf Maer voert so ligghen drake fel Die sonder inde en doen niet el Maer laten vte hare kelen gaen Vlammen ende vier vele ongedaen 4015[regelnummer] Die vlamme es donker swert ende heet Sie es den sielen emmer gereet Inder felre draken kelen Sijn die caitiue ende emmer selen Daer sijn fornaeyse gloeyende heet 4020[regelnummer] Langhe diepe wijt ende heet Daer staen die duuele emmer gereet Ende worpen die zielen in dat heet Daer haer die siele pijnt tonsculene Dan beghennen die duuele tulene 4025[regelnummer] Ende hebben crauele vele gereet Vaste sware gloeiende heet Ende houden die caitiuighe sielen Hen waer beter dat sie wielen Beter arme daer en es nemmer raste 4030[regelnummer] No vroech no spade no dach no nachte Daer es torment ende bitter seer Sonder inde ende emmermeer Daer berret die moeder metten kinde Serichlike sonder inde 4035[regelnummer] Daer en claecht die moeder niet haer kint Elc te claghene genoech daer vint No de vader sinen sone Elc heeft daer genoech te doene Daer en swijcht men nemmer stille 4040[regelnummer] Daer sien die duuele haren wille Daer crit men daer sleet men die hande
[Folio 28ra]
Daer sucht men daer criselen de tande Daer sijn de duuele alle stout Gierich wreet fel ende bout 4045[regelnummer] Daer en helpt haue no gout Die daer siin sijn emmer out Daer es emmer hongher ende dorst Den kinde en hulpt niet der moeder borst Daer es die doet ewelike sonder lijf 4050[regelnummer] Daer crit men aylase caitijf Die daer siin siin emmer cranc Hare beste werelt es wle stanc Wat magic segghen der hellen sede Daer es sonder inde caitiuichede 4055[regelnummer] Dat orcont die ewangeliste Diet vernam ende wel wiste Dat elke siele die daer sijn sal Sal hebben ewelec ongheual Dit seit ons sinte gregorijs 4060[regelnummer] Diere aue condich was ende wijs Dat daer elke siele sal ontfaen Loen. daer ieghen si heeft gedaen Dit seit die boec oec eist waer Dat elker sielen lichame daer 4065[regelnummer] Sal met haer sijn in dit seer Sonder inde ende emmermeer Dat orcont ons sinte augustijn Dat dien caitiuen die daer siin Langher duncket .j. halue wile daer 4070[regelnummer] Dan ons hier .v^c. jaer Dit torment ende al dit seer Sal daer wesen emmermeer Dit sal al doghen sonder inde Elc die gode niet en minde 4075[regelnummer] Die ieghen wet hebben gedaen Ende te rade niet hebben gegaen So wie tachterst wert verwonnen In mesdaet als in hoeft sonden
[Folio 28rb]
Ende dies berouwenesse niet en heeft 4080[regelnummer] Al die wile dat hi leeft Al dit seer sal hi hebben swaer Ic wilt wel segghen ouer waer Dat en sal sijn coninc no graue Dat hem mach helpen sine haue 4085[regelnummer] Maer verdinct hijs in dit lijf Hi en sal niet siin ewelijc caitijf No ionc no out no arm no rike Verdinct hijs hi en sal daer ewelike Man ende wijf leec ende clerke 4090[regelnummer] Elc sal daer hebben na sine werke dIet in sine herte venden can Hier mach hi nemen boken an Dat ene halue wile daer Es langher dan hier .v^c. iaer 4095[regelnummer] Hier omme souden wi alle waken Hoe wi dat mochten gheraken Te doene. dat ons die felle draken In hare kele niet en saken Wi souden pensen in dit lijf hier 4100[regelnummer] Om dit gloeyende vier Hoe daer die moeder metten kinde Berrent. ewelike sonder inde Elc soude dinken ionc ende out Om die beke die es so cout 4105[regelnummer] Die swert es dicke als venijn Hoe wee es hen die daer in sijn Om die fornayse souden wi dinken Ende om die daer in sinken Om die ketele die daer in wallen 4110[regelnummer] Om die caitiue die daer in vallen Wi souden pensen om dien stanc Die so wl es ende so cranc Wi souden vleien manlike Onsen here van hemelrike 4115[regelnummer] Als wi verscieden dat onse siele
[Folio 28va]
In dat hete pec niet en wiele Ende wi moesten sijn so wijs Dat wi verdienden dat paradijs Dies moeten wi verdienen een ieghelike 4120[regelnummer] Dies onne ons god van hemelrike DIe onderste stat hebdi gehoert Vander hillen nv hort voert Die onderste stat es sonder gront Maer dat doet ons sinte pouwels cont 4125[regelnummer] Dat die stat die bouen staet Es ganser nochtan essie quaet Binnen dier stat ende daer nae En sceen nie sonne no mane Al en es sie niet so iammerlike 4130[regelnummer] Als donderste si es gruelike Daer eist donker ende swert Daer eist fel ende hert Daer en es bliscap no spel no sanc Daer es onghewormte ende wle stanc 4135[regelnummer] Wat mochtic segghen hier af meer Daer es vernoey torment ende seer Alle die ghene die daer sijn Verdrinken daer in dat venijn Hen dunct dat si nemmermeer 4140[regelnummer] En mochten comen in meerder seer Nochtan so eist men dan niet Ieghen dat seer dat onder gesciet BOuen in desen menderen sere Waren die dienden onsen here 4145[regelnummer] Patriarken ons heren vrient Propheten die hem hadden gedient In dese stat waren si alle gader Dochter moeder sone ende vader Alle die waren gheboren 4150[regelnummer] Die moesten wesen hier verloren Propheten menic ihesus vrient Die hem hier hadden gedient Dandere die oec onwettich waren Si voeren onder meneghe scaren
[Folio 28vb]
4155[regelnummer] Die doe daer bleuen ende noch sijn Alse onse here loeste de vriende sijn Ghehoert hebdi der hellen stade Die beide sijn wl ende quade Hort voert hoe ihesus daer toe quam 4160[regelnummer] Datti sine vrient loeste ende nam IHesus was int graf geleit Al soe alsic vore hebbe geseit Drie ridderen laghen vele wale Daer op gewapent datmen niet en stale 4165[regelnummer] Sine lichame lach int graf vele stille Siin gheest hi quam voer die hille Als hi voer die hille quam Een cruce in sine hant hi nam Hi stiet die porte dat si boech 4170[regelnummer] Ende dat si in stucken vloech Die claerheit sloech tote inden gront Daer ihesus voer die porte stont Daer nie licht en quam no meer en sal Nu quam daer claerheit ouer al 4175[regelnummer] Die duuele alle in onmacht lagen Alse die grote claerheit sagen ADam hi was deerste man Die ihesus comste bekinde dan Als adam die claerheit siet 4180[regelnummer] Hi sprac op hi en lette niet Ende riep wel lude wle hille Du sals hebben dinen onwille Ic sie tkint dat es geboren Om de ghene die waren verloren 4185[regelnummer] Van marien om onsen wille Nu saltu siin berouet wle hille Doe riep adam tonsen here Here seit hi hebt lof ende ere Willecome ons allen sijt 4190[regelnummer] Ghi sijt comen ter goeder tijt Ic ben hier .v^c. jaer
[Folio 29ra]
Al seidic meer ic seide waer Vele cort gebonden lieue here Wel iammerlike met groten sere 4195[regelnummer] Om mine mesdaet om v gebod Dat ic brac want gi waert god Om de grote ghierichede mine Hebbic gedoegt grote pine Ic beet den appel stillekine 4200[regelnummer] Dat bebic gearent dats mi in scine Niet ic allene maer oec al v maghe Die hier doen meneghe claghe Ende elc man die nie was geboren Es om minen wille verloren 4205[regelnummer] Here gi wet al dat gesciet Ia en wetti wel wiet mi riet DOe quam noe die maecte de arke Ende was blide ende riep starke Willecome lieue here 4210[regelnummer] Nu benic quite van desen sere DOe quam gelopen abraham Als hi ons heren comst vernam Ende riep willecome vader mijn Nu salic int paradijs sijn 4215[regelnummer] Doe quam jacob ende sine .xij. sonen Si waren blide ende coene Ende riepen alle willecome lieue troest Willecome wi sijn verloest Doe quam gelopen moeyses 4220[regelnummer] Ende was so blide algader des Ende en mochs hem onthouden niet Hi loech sere als hi ihesuse siet Doe quam die coninc dauid gegaen Ende viel op ihesus voete saen 4225[regelnummer] Ende riep sere lude ic nie en sach Te minen behoef soe bliden dach Binnen dien dat dese bliscap was Doe riep vele lude ysayas
[Folio 29rb]
Nu is volwlt mine prophetie 4230[regelnummer] Dies hebbe danc die maghet marie Ende ihesus haer lieue kint Dat mine scrifture es waer bekint Doe quam ysayas ende loth Ende daniel ende iacob 4235[regelnummer] Ende riepen here nv eest wel waer Dat gelof es worden waer Daer na quam malachiel Iheremias ende iezechiel Ende al ons heren vrient 4240[regelnummer] Die hem oeyt hadden gedient Meneghe blide geselscap Die om sine comst hadden bliscap Doe quamen sie met menegher scaren Ieghen ihesus comst gevaren 4245[regelnummer] Ende dancten alle onsen here Dat hise verloest hadde van dien sere Alse ihesus dus heeft vertroest Sine vriende ende verloest Hi begroetese soete ende wale 4250[regelnummer] Ende seide hen allen dese tale Lieue vrient hebt minen verde Ic ben v vader ende v herde Lieue vrient om uwen wille Hebic gedaen sere minen onwille 4255[regelnummer] Om v torment dat gi hadt groet Hebic gesmaect die bitter doet Ende om de gene die siin ende selen Ic en weet hoe sijt mi lonen selen Dat gi mi oeyt hebt gemint 4260[regelnummer] Dat seldi nv hebben bekint Nu comet alle vele scone Met mi bouen inden trone Daer sijt met mi ewelike In dat soete hemelrike 4265[regelnummer] Als ihesus dit hadde geseit Elke ziele op sine voete leit
[Folio 29va]
Ende weenden alle vele sere Van bliscapen die seide onse here Elc nam anderen bider hant 4270[regelnummer] Ende volgden ihesuse al te hant Singhende hoghelike aldus Sanctus sanctus sanctus dominus Dies moeten wi hier alle verdienen Dat wise moeten horen ende sien 4275[regelnummer] Die met ihesuse singhen dan Dies moete verdienen wijf ende man DIe duuele alle in onmacht lagen Van ihesus claerheit als sise sagen Als hen dit licht begonste ontgaen 4280[regelnummer] Si stonden op vele sere ontdaen Deen nam stake ende brander Dandere craule de derde tangen Doe riepense alle wi sijn ontdaen Volghen wi onser priden saen 4285[regelnummer] Die duuele riepen alle gemene Wach wach onse hille blijft allene Volgewi volgewi al te hant Slaen wi aen onse pride onse hant Si waren bitter alse galle 4290[regelnummer] Si loeyden caeyinden vele sere alle Ende liepen alle vele sere Na die heilighen na onsen here Daer riep elc duuel al dat hi can Achter ihesus zielen dan 4295[regelnummer] Quade liede ontbeit ons saen Ontbeit ocht wi selen v verslaen Vermarret achter wi volgen v Wi selen v steendoet slaen nv Si liepen hen halp niet 4300[regelnummer] Elc was serich als hi dit siet Ende die meester duuel was Als hi van loepene moede was Hi seide gesellen staet al stille Laet mi nv doen al minen wille 4305[regelnummer] Mi wondert herde wat manne dit es
[Folio 29vb]
Die der hem onderwinden des Hi en dunct mi geen eerdts man Ic sal hem vraghen wat hi can Twi hi dus sinen wille 4310[regelnummer] Heeft ghedaen in onse hille Hoe hi ons allen heeft veruert Sonder wapen ende sonder swert Lachter heeft hi ons gedaen Wiet es willic hem vraghen saen 4315[regelnummer] Hi dunct mi condich ende fier Sonder orlof quam hi hier Doen riep die duuel tonsen here Horstut du does mi grote onere Dattu sonder orlof quames 4320[regelnummer] Te mire hillen ende du names Mine zielen die metti gaen Ghi selse weder gheuen saen Al haddise noch also verre geleit Geefse weder eer enich sceit 4325[regelnummer] Als dit die duuel hadde geseit Ihesus sprac ten sielen ontbeit Ic wille antwerden desen quaet Die mi dus toe sprect sonder raet Duuel seit hi. doe dat ic wille 4330[regelnummer] Niet narre en comt ons staet al stille Dat ic quam voer dine hille Dat was mijns dancs ende mijn wille Het en besteet oec niet te mi Dat ix orlof name an di 4335[regelnummer] Du en maegs mi verbieden niet Dat ic an dine porte stiet Du waers wilen claer ende scone Met mi bouen inden trone Ic ben dijn god ic ben dijn here 4340[regelnummer] Ic werp di in desen bitteren sere Om dine grote behagelhede Warpic di in dese serichede Here seit hi en cans gelouen niet Gi wet algader dat gesciet 4345[regelnummer] Ghi segt waer ic was wilen scone
[Folio 30ra]
Met v bouen inden trone Ic was behaghel ende fier Daer om benic in de helle hier Nu hebdi mi verbolghen sere 4350[regelnummer] Dat gi mi doet dese grote onere Dat gi dus reyne roeft mijn rike Dat daer en blijft no arm no rike Dat ghi mi nemt den seluen man Dien ic metten appel wan 4355[regelnummer] Dat ghi mi al de ghene roeft Die ghi mi selue hadt geloeft Wat goeder rechtien es hi dan Die sijn gelof niet houden en can Al sidi god gi doet onwet 4360[regelnummer] Ghi ontoet dat gi hadt geset Gi roeft mi dies al oppenbare Dat ic hebbe ghehadt .v^c. iare Als adam die bi v staet Hadde ghedaen sijns wijfs raet 4365[regelnummer] Soe dadi van hem uwen wille Ende worptene saen in mine hille Daer hi siin soude emmermeer In mijn torment in mijn seer Niet hi allene maer alle gemene 4370[regelnummer] Man ende wijf groet ende clene Nu brecti dat ghi hadt geset Gi doet onredene gi doet onwet iHesus onse here antwerde gheeft Als die duuel geseit heeft 4375[regelnummer] Duuel seit hi ic horde dine tale Dies willic di antwerden wale Ic ben god van hemelrike Ic gesciep al erterike Ic makede den nacht ende den dach 4380[regelnummer] Ic maecte al dat lijf hebben mach Ic maecte water ende vier Daer na maectic alle dier Ic was ende emmer wesen sal
[Folio 30rb]
Ic maecte den hemel ende ertrike al 4385[regelnummer] Alsic al dit hadde gemaect Het dochte mi vele wel geraect Doe peinsdic bi mi seluen hier Du salt noch maken een dier Dat dier so maectic techterst dan 4390[regelnummer] Dat dier dat was die man Den man haddic so gemint Met mi soe was hi wel bekint Ic maectene na die vorme mijn Also als noch alle manne siin 4395[regelnummer] Dien seluen man hietic adam Daer hi sliep sine ene rebbe ic nam Van dire rebben maectic een wijf Ende hietse eua ende gaf haer lijf Desen wiue ende desen man 4400[regelnummer] Gauic saen verstannesse dan Heerscap gauic hen oppenbare Ouer alle die diere die waren Ende al dat was op deerde mijn Soude te haren gebode siin 4405[regelnummer] Eene scone stad haddic gemaect Vele bequame ende wel geraect Binnen der stad soe waest so goet Dire binnen hadde sinen voet Hem dochte dat hi nemmermeer 4410[regelnummer] En mochte siin in enich seer Alre hande bome settic daer in Die bome bloeyen nacht ende dach Soe soeten stad nie man en sach Daer en quam reghen no went 4415[regelnummer] Daer riket emmer als pument In midden was een scoen prieel Emmer groene altoes geheel Soe soeten stad no oec soe scone En sach nie man onder den trone 4420[regelnummer] Daer wies vrucht van alre wijs Die stad was deertsche paradijs Alle die noeyt waren geboren Waren hier omme alle verloren Dit was dijn raet lede viant
[Folio 30va]
4425[regelnummer] Dat ixe in de hille hadde gesant Onwert drake haddic ghewilt Ic hadde dese vaert al gestilt Dattu dus worues mine creature Al gader in die helle sure 4430[regelnummer] Ic ghehinghes het was voorsien Dat dit aldus moeste gescien Dat dus adam den appel beet Daer meneghe siele om heeft groet leet Die daer bliuen in de onderste hille 4435[regelnummer] Al hebben mine vriende haren wille Wie quaet al dunket di te vroech Het dunct mi tijt ende lanc genoech Dat dine hille al gader sakede Mine creaturen die ic makede 4440[regelnummer] Dat die onreyne hille swelgen soude Al mijn volc ionghe ende oude Dies si swalch volcs soe vele Riepic minen inghel gabriele Ende loed hem ene blide boedscap 4445[regelnummer] Ic sendene te nazareth in die stat Ic hiet hem dat hi niet en ware lat Ende hi marien seide dat Dat ic wilde van hare sijn geboren Om mijn volc dat ware verloren 4450[regelnummer] Dus wildic werden vleeschelijk man Ane mine moeder marien dan Ende dus quitic mine creaturen Daer met. dat wert mi sere te suren Die in de helle waren verloren 4455[regelnummer] Worden bi marien geboren Het en hadde geholpen niet en twint En hadde mijn doet daer na niet geint Ende vercoren selue mine doet Als ic hebbe met groter noet 4460[regelnummer] Ende na mine doet hadde verloest Mine vriende ende vertroest Quade viant nv eist gesciet Alsoe als gijt selue siet Al en dunket v niet goet 4465[regelnummer] Ic hebbe gegeuen vleesch ende bloet
[Folio 30vb]
Mijns selfs lichame om haren wille Dus quiticse alle vander hillen In derre manieren in derre wijs Salic mine vriende int paradijs 4470[regelnummer] Setten. dat hen es gereet Viant al waert di lief ofte leet Ic ben saechte suete gemate In mi es emmer karitate Ic wille nv setten mine vrient 4475[regelnummer] Die mi wel hebben gedient Bouen met mi inden trone Sonder inde vele scone Quaet viant hebdi gehort Wat wildi mi nv seggen vort 4480[regelnummer] DIe duuel seit sint dat gi lijt Dat gi sachte here oemoedich sijt Quitet mi van desen betteren sere Al benic dieuel leue here Doe antwerde onse here ihesus 4485[regelnummer] Quaet du sals enden aldus Hier vte en comstu nemmermeer Maer blijf in dit bitter seer Trecket alle saen achterwert Ic hete v dat gi ons niet en deert 4490[regelnummer] Daer help wenen doet minen wille Gaet weder in die wl hille Stappans daer ihesus dit hadde geseit Elc duuel vliet ende sere screit Sie stonden serich ende veruert 4495[regelnummer] Ende stouen saen ter hellen wert Ihesus nam sine vriende te hant Elc nam anderen metter hant Hi leiddese met hem inden trone Singhende alle vele scone 4500[regelnummer] Daer singhen si noch hoghelike Sonder inde euwelike Dat wi moeten singhen met hen Dies onne ons god segt alle Amen dOe quam die sondach vele saen 4505[regelnummer] Dat ihesus wilde ane gaen Dat siin lichame daer hi leit
[Folio 31ra]
Verrees als men dit hadde geseit Alse siin gheest vander hillen quam Daer hi sine vrient vte nam 4510[regelnummer] Inder dagheraet vele saen Doe quam ihesus ghegaen Daer sijn lichame lach int graf Drie ridderen en scieden niet daer af Maer lagen daer gewapent wale 4515[regelnummer] Datmen den lichame niet en stale Die geest nam den groten steen Die wit was als yuorenbeen Daer met gedect was dat graf Den steen dede hi bi siden af 4520[regelnummer] Siin gheest voer inden lichame dan Ihesus wert weder leuende man Eer ihesus vten graue geet Daer hi in gewonden was dat cleet Dat nam hi ende wendet ouer een 4525[regelnummer] Ende leit gewonden op den steen Dit was al inder dagheraet Dat ihesus vten graue gaet Met vele inghelen hoghelike Daer sie wesen ewelike 4530[regelnummer] Dats die ridderen en wisten twint Aldus verrees marien kint dOe quamen die marien saen Eer die sonne begonst opgaen Deen was maria magdalene 4535[regelnummer] Die vanden sonden was so rene Dandere twee die sere scrouwen Waren susteren onser vrouwen Dese vrouwen brachten salue soete Ende wilden saluen ihesus voete 4540[regelnummer] Ende sine hande ende alle sijn wonden Ochsie die gewapende niet en vonden Dese marien geselden hen Met harre dierre specien Ende gaen onblide ten graue voert 4545[regelnummer] Om die ridderen sere verdoert Doen seide der marien ene
[Folio 31rb]
Dat was die soete magdalene Hoe selen wi den steen bringhen af Die so wacht die leit opt graf 4550[regelnummer] Wy siin wijf van rouwen cranc Ende die steen es swaer ende lanc Si ghingen voert ic seg v hoe Die ridderen vondense slapende doe Als magdalene tgraf binnen siet 4555[regelnummer] Ihesus lichame si niet en siet Sie keerde haer omme ende herde screit Ende heeft den anderen tween geseit Sie suchten alle drie te hant Deen nam dandere metter hant 4560[regelnummer] Sie gingen alle drie saen daer Tgraf besien oft ware waer Als elke maria tgraf binnen siet Si en vondenen daer liggende niet Maer een ionghelinc wit ende scone 4565[regelnummer] Dat was die inghel vanden trone Dinghel seit hen ouer waer Dat ihesus ware verresen daer Ghi vrouwen seit hi en meslaet v niet Hebbes bliscap dies ghi hier siet 4570[regelnummer] ihesuse dien gi sueket nv Hi es verresen dat seggic v Weset hoghelijc ende blide Gi selten sien in corten tide Swicht stille ende niet en screit 4575[regelnummer] Ihesus die in dit graf was geleit Hi es worden leuende vander doet Inden trone es bliscap groet Suete vrouwen en sijt niet veruert Keert alle drie achter wert 4580[regelnummer] Ende doet sinen iongeren maer Dat hi verresen es ouerwaer Segghet petrem nameleke Ende sinte ianne sekerleke Sueket sine iongeren algader 4585[regelnummer] Segt hen dat verresen es haer vader
[Folio 31va]
Dat si hem troesten ende siin blide Si selenne sien in corten tide Nu eyst vonden dat es gescreuen Ihesus heeft weder ontfaen leuen 4590[regelnummer] Soete vrouwen ic ben een bode Van ihesuse den hogen gode Doet mijn gebod ende mine tale Keert weder ende doese vele wale Als dit dinghel heeft geseit 4595[regelnummer] Elke maria vele herde screit Van bliscapen. si en letten niet Si daden dat hen dinghel hiet Sie liepen alle drie hoghelike Te gadere ende vele sekerlike 4600[regelnummer] Daer sie dapostolen wisten dan Elke loept al dat sie can Die soete maria magdalene Liep wllike voer dandere allene Alsie toten iongeren quamen 4605[regelnummer] Grote bliscap dat si namen Sie riepen vele lude hort alle hort Hort alle boedscap die te v behort Al wasic wijf besondicht sere Ic bringhe nieumare van onsen here 4610[regelnummer] Ihesus es verresen nv Ouer waer soe seggict v Ihesus heeft leuen ontfaen Hi es verresen sonder waen Ic was ten graue al daer hi lach 4615[regelnummer] Ic en vants niet no en horde no en sach Sonder sinen inghel vandic daer Diet mi seide al ouer waer Dat ihesus leuende worden ware Hi hiet mi dat ict v dade mare 4620[regelnummer] Doe quamen die twee marien saen Vele moede daer gegaen Ende seiden toten iongeren daer Al dat dese vrouwe seit dat was waer
[Folio 31vb]
Heren geloeuet dat dese vrouwe segt 4625[regelnummer] Int graf daer ihesus was gelegt Daer en vonden wijs binnen niet Daer es grote bliscap gesciet Dinghel hiet dat wijt v daden maer Dat wijt v seiden oppenbaer 4630[regelnummer] Ende u peter ende jan Dat wijt v seiden nameleke dan Dat ihesus ware verresen nv Dinghel hiet ons segghen .v. Als dit die vrouwen hadden geseit 4635[regelnummer] Den apostolen ouer waerheit Stappans peter ende jan Die vore mochte vore ran Ende alle de apostolen hant in hant Alle gemeyne al te hant 4640[regelnummer] Alsie daer quamen sie en vonden niet Dat cleet dat ihesus daer liet Daer hi in was gewonden Anderen lichame si niet en vonden Elc der iongeren tgraf binnen siet 4645[regelnummer] Si sagen ouer al si en vonden niet Sine vonden lichame el negeen Maer dat cleet dat lach opten steen Soeten roke als een pument Elc iongere dies genoech daer vent 4650[regelnummer] Als dit algader was gesciet Ende sie ihesum en vonden niet Sie keerden saen alle achterwert Om die ioden waren sie veruert Selc was daer die twiuelde sere 4655[regelnummer] Hoe dus verresen mochte siin onse here Hoe hi gelouen soude so saen Dien hi ter doet sach verslaen Dat was allene sinte thomas Die dus in groten twiuel was 4660[regelnummer] Dandere apostolen en geloefden el niet Dan dus met gode was gesciet
[Folio 32ra]
Risen ende leuen te sinen wille Dit geloefden sie lude ende stille Daer si wech gaen alle gemene 4665[regelnummer] Daer bleef maria magdalene Suchtende wenende op dat graf Ende seide si en salre niet sceden af So en saghe ihesum haren here Dien wiltsie vleyen ende doen ere 4670[regelnummer] Daer bleefse liggende al in een Dicwile sach sie inden steen Oft sie yet saghe si begeerde sere Ihesum haren lieuen here Sie viel op deerde si dede haer bede 4675[regelnummer] Suete bedinghe maria dede Dat sie moeste in corten tide Ihesum sien ende werden blide Hoert hier grote minlijchede Daer maria magdalene dede 4680[regelnummer] Op ihesus graf bleef allene Die van haren sonden was rene Daer alle sine apostolen waren Die alle van vare thuus wert waren Als maria lach in desen sere 4685[regelnummer] Ende dus wachte ihesum haren here Hi en lette niet een halue wile dan So baerde hare een scone man Die man ihesus vanden trone Hi quam bloeyende harde scone 4690[regelnummer] Maria wert verueert vele sere Ende riep vele lude sidi dat lieue here Die v seluen hebdt verloest Sidi dat so benic getroest Sidi dat gheweldich man 4695[regelnummer] Die mi vergauet mine sonden dan Als ic tot v quam te rade Sidi dit die mi daet genade Sidi dit ihesus marien sone
[Folio 32rb]
Die gereet sijt altoes te doene 4700[regelnummer] Elken kerstine vwe genade Die op v roept eest vroech eest spade Sidi de ghene die hadt vercoren De doet om die waren verloren Ende daer met hebt verloest 4705[regelnummer] Sidi dit gheweldich troest dOe sprac ihesus maria swich stille Ic ben ihesus ic heb de hille Te broken. ende verloest mine vrient Die mi wilen wel hebben gedient 4710[regelnummer] Segt minen iongeren dit algader Dattu mi sprakes ic ben haer vader Ic ben diin god ic ben dijn here Mi heefstu begert vele sere Maria du waers een sondich wijf 4715[regelnummer] Nu es met mi so wert dijn lijf Dattu mi tierst sages allene Soe minnic di suete magdalene Ganc ende segt minen vrienden Die mi dicke wale dienden 4720[regelnummer] Segt minen iongheren dit algader Dattu mi spraecs Ic ben haer vader Segt petrem hem doe ic aflaet Van sinen sonden van siere mesdaet Dat hi driwerf lochende mijns 4725[regelnummer] Gisternacht dies hi ontsach sijns Segghe dat hem vergheuen si Ende dat hi coenlike come te mi Maria viel op ihesus voete Ende cussese vele soete 4730[regelnummer] Sie sciet hoghelike saen van gode Ende dede wel sine gebode aLs sie dit geseide waest sondach Dat wi nv heten paesdach Dat ihesus hem marien baerde 4735[regelnummer] Dat si sijn oprisenesse maerde
[Folio 32va]
Sinen apostolen na ende wide Die boec ghebiet dat wi sijn blide Dien daghe selen wi met recht doen ere Daer in dus verrees onse here 4740[regelnummer] IHesus onse here van paradijs Baerde hem saen in menegher wijs Sinen apostolen sinen vrienden Die hem vleiden ende dienden Die oetmoedeghe here en leet niet lanc 4745[regelnummer] Met hen at hi ende dranc Met hen was hi soete ende sachte xl. daghe ende xl. nachte Als leden waren xl. daghe Ihesus onse here quam tsinen magen 4750[regelnummer] Te bethanie oetmoedelike sDonderdaechs in die cruce weke Daer hi met sinen iongheren sat Ende met hen dranc ende at Met siere hant hise benedide 4755[regelnummer] Ende predicte hen ende makese blide Stappans als hi dit hadde ghedaen Si staen vander tafelen saen Si en waren niet te sat in scine Noch oec dronken van sterken wine 4760[regelnummer] Si daden daer toe al haren sen Ter tafelen dat ihesus seide hen Ihesus nemt orlof vele scone Want hi wilt varen inden trone Daer sine iongheren ieghewerdich waren 4765[regelnummer] Ene claerheit begonde baren Ene wolke quam onder hen daer Die soe scone was ende so claer Die wolke gaf so claren scijn Hen wonderde wat dat mochte sijn 4770[regelnummer] Metter claerheit voer vele scone Ihesus onse here inden hoghen trone Daer die claerheit ihesum draecht Elc die daer was met oeghen saecht Als onse here quam toten trone 4775[regelnummer] Daer die inghele in sijn scone Alle dinghele die daer waren
[Folio 32vb]
Quamen ieghen hem gheuaren En songhen alle blidelike aldus Sanctus sanctus sanctus dominus 4780[regelnummer] Daer es noch die here van hemelrike Ende sal wesen ewelike Dat weet hi al dat men doet Eer ment gepenst eyst quaet eist goet Daer sal hi sitten tot di male 4785[regelnummer] Clare blide scone ende wale Dat hi hier tale tot ons sal comen Elken na sine werke doemen Het en es pape no leec no wijf no man Die de wile seggen can 4790[regelnummer] Die nie in boeke gescreuen sach Weltijt het sal wesen doemsdach Maer sonder twiuel die dach sal comen Dat ihesus ons allen sal doemen Hi sal comen als god ende here 4795[regelnummer] Dan selen wi ons vruchten sere Als dit sal siin selen wi beuen Ende dingle oec het es gescreuen Daer sal hi leeken ende clerken Elken lonen van sinen werken 4800[regelnummer] Dat tonghe ne geene geseggen mach Hoe gruelijc sal wesen doemsdach Al dat es sal dan beuen sware Dan sal vallen sonne ende mane Alle die siin leuende ofte doet 4805[regelnummer] Selen risen ende siin te derre noet Ieghen dat si hier hebben gedaen Selen sie daer den loen ontfaen Daer comen in derre wijs Onse here van paradijs 4810[regelnummer] Als hi anden cruce stont Ende sal ons doen cont Wat hi doechde doer onsen wille Van vruchte selen wi swigen stille Dan sal ihesus van paradijs 4815[regelnummer] Ten sonderen seggen in derre wijs Hort na mi vele quade honde Die vonden sijt in hoeftsonde
[Folio 33ra]
Gaet van mi int ewelike vier In dien stanc in dat wle ondier 4820[regelnummer] Hebt dat torment ewelike Quade serpente iammerlike Gaet vollike in dat bitter seer Ende woenet daer in emmermeer Gaet te dien draken in die hille 4825[regelnummer] Daer gi emmer selt in quellen Gaet caytiue sondeghe zielen In dat pec wallen ende wielen Sijt daer ewelike seit onse here Hij sal die worpen in desen sere 4830[regelnummer] Die ieghen hem hebben mesdaen Die te rade niet en sijn gegaen Die hier doen sinen onwille Si selen berren in die hille Dat seit die boec al oppenbaer 4835[regelnummer] Ic wilt oec segghen ouer waer Dat elc lichame metter sielen sine Sal barren in die helsche pine Hierom souden wi onsen vader Dienen ende vleien alle gader 4840[regelnummer] Die wile dat wi siin in desen liue Dat wi niet en werden caytiue Dies moete wi alle verdienen hier Dat ons bescermt moet sijn dat vier Ende dat torment ende alle die sere 4845[regelnummer] Dies moete ons onnen onse here dAn sal ihesus te siere rechter hant Die saleghe setten al te hant Ende sal segghen. ghebenedide Mine kinder weest alle blide 4850[regelnummer] Ende sal op heffen sine hant Ende salse segghenen al te hant Dan sal hi segghen lieue vrient Mi hebdi oeyt wel ghedient Ic wille v leiden vele scone 4855[regelnummer] Met mi bouen inden trone
[Folio 33rb]
Ghi waket dicke om minen wille Mi daeddi eere lude ende stille Ghi saecht gerne minen bode Gi hielt vele wel mine gebode 4860[regelnummer] Gi ghinct ter kerken vroech ende spade Gi ginct ten pape dicke te rade Ter goedertijt waerdi geboren Met mi so sidi alle vercoren Mine kinder gebenedide 4865[regelnummer] Gi horet gherne al v getide Den armen stondi dicke bi Dat gi hen daet dat daeddi mi Gi waert oetmoedich ende gemate Gi hadt trouwe ende caritate 4870[regelnummer] In v was trouwe in alle tijt Daer om willic dat gi sijt Sonder inde int eusche rike Hier bouen in mijn hemelrike Siele ende lichame willic dat si 4875[regelnummer] Int hoghe paradijs met mi Daer es die bliscap emmer groet Daer es dat lijf sonder doet Daer en wert men nemmer out Daer singhen dingle menichfout 4880[regelnummer] Daer en es rouwe noch oec seer Daer es men blide emmermeer Daer en eist te heet no te cout Daer es bliscap menichfout Die willic dat v gereet si 4885[regelnummer] Daer willic v allen setten bi mi Daer heeft elke ziele haren wille Daer en swijcht men nemmer stille Daer singt men emmer aldus Sanctus sanctus sanctus dominus 4890[regelnummer] Lieue kinder daer willic v Setten an mine side nv Daer sal v lichame ende v siele Ewelike singhen met sinte machiele
[Folio 33va]
In derre manieren in derre wijs 4895[regelnummer] Sal onse here van paradijs Te doemsdaghe tote ons comen Na sine gewerke elken doemen Daer moeten wi redene geuen saen Van dien dat wi hebben gedaen 4900[regelnummer] Nu moeten wi dan die ghewerke Doen. man ende wijf. leec ende clerke Dat wi moeten siin met hem Ewelike in dat hoghe iherusalem IC wille v segghen ouer waer 4905[regelnummer] Sekerlike ende oppenbaer Soe waer vrouwe in arbeite geet Ende sie desen boec int huus weet Heefsijs geloeue sonder waen Si sal saechte hebben saen 4910[regelnummer] Ende die vrucht die sie bringen sal Sal siin rechtinghe hebben al Soe wie oec geloue heeft des Soe wat huse daer dese boec in es Daer en mach tempeest no plage 4915[regelnummer] Slaen. no bi nachte no bi daghe Oec es dit waer godweit Int huus daer dese boec in leit Soe wie daer binnen es Sijt dies seker ende ghewes 4920[regelnummer] Dat nemmer en versterft Haestelinghe no en bederft Ende alle die ghene die gode minnen Ende hier toe legghen hare sinne Diere eerst toe legt eist man eist wijf 4925[regelnummer] God gheue hen allen ewelijc lijf Ende die clerc die dese rime maecte Dier om pensde ende waecte Ende de ghene die screef dit werc Was hi pape was hi clerc 4930[regelnummer] Gode ende onser vrouwen teeren
[Folio 33vb]
Datter tfolc an moeste leeren Sonder inde moeten hare sielen Metten inghel sinte michele Rusten inden hoghen trone 4935[regelnummer] Met allen heylighen vele scone Onser alre zielen oec met hen Sprect alle te gader Amen .Deo gratias. Gode segghen wi lof. Ende den hemelschen here daer of Dit was gheint in jaersauende toetinghen. Int jaer ons heren als men screef M. CCCC. ende xxxviij.

Vanden levene ons Heren

Vanden levene ons Heren [3931-4937]

Over het gehele werk

auteurs