Kronyk van Vlaenderen

[1458]

Hier nar volghen up 't cortte, de manieren van der groeter blyder chieren, die de goede lieden van der poorteryen, neringhen, wyken ende andere goetwillende van der steede van Gend, ten plaetscen hier onder ghenoemt elc in 't sine, maecten ende daden ten blyden incommen van onsen voernoemden hardde gheduchten heere, 's avons, 's anderdaghs ende 's derddaghs, met vierne, costelijc te theerne ende andersins, ende emmer 't grosse, ende de meeste partye in alsoe varren als 't begrypelijc was om scriven.

Eerst, de goede lieden van der wet hadden ghedaen ter vermeeringhe van der blyder incomste van minen hardden gheduchten heere ghebieden, wat gheselscepe van neeringhe, wyken ofte ghebuerten 's avons nardblyde incomen van minen vorseiden gheduchten heere schoenst vieren, de straten verchieren ende ghenouchlijcst gheselschip ende staet houden soude, soude winnen twee silveren schalen, verwapent met der steede wapenen, weghende elke schale vj. onscen. Item; die 't daer nar best dade

[p. 233]

soude winnen twe silveren schalen verwapent als boven, weghende elc iiij. oncen. Item die 't daer nar best dade soude winnen eene schale, verwapent als voren, weghende vj. oncen.

Voert soe wat gheselschepe van buten oft van binnen, neringhen, wyken oft ghebuerten ghenouchelijcst up 't vorseide blyde incomen 's anders avonds, naer den avont hem incomen sijnde, esbatementen soude voor scepenenhuus in iij^c. verssen ende niet daer ondere, in iij^c ende L. veersen ende niet daer boven, in reynen, nieuwen welgestelden dichte, winnen soude eene silverin schale, verwapent als boven, weghende vj. oncen.

Item, die ghenouchlijcst esbatemente, sin hebbende, speelden, souden winnen eene silverin scale, verwapent als voren, weghende iiij oncen.

Item, soe wat gheselschepe ten blyden incomene van minen gheduchten heere, sijn figure netst toeghen ende doen soude, de stellagien met gordinen omhanghen, verdecken ende andersins bet verchieren, soude winnen eenen Leeu van v. schellinghen grooten.

Item, hilden heere ende wet, scepenen van bieeden banken, met datter ancleefde, haerlieder staet ende 't meel, in 't Scepenen-huus van der kuere, daer sy vierden met xiij. tortssen ende was voer 't Scepenenhuus gehanghen een groen laken, daer up dat ghehect waren de wapenen van minen gheduchten heere ende der steede an biede inden van mijns heeren wapenen, ende daer was ghespeelt ende ghesbatement alsoe hier ondre briedre gheseit es, ende voer 't vorseide Scepenenhuus stont een viercant vier al van heekene blocken xxx. voeten hoghe, tusschen vier yserin roeden.

Item, Mer Arnoudt van Gouy, riddere, heere van Auby ende hoghbailli van Gend, vierde in de Schelstrate vore sijn huus, met xiij. tortssen, drye stagien hoghe.

[p. 234]

Item, Lauwereins de Mach, ontfanghere-generael van Vlaenderen ende van Arthoys, vierde te sinen huus by sent Janskerke met xiij. tortssen boven sijn eerste poorte.

Item, in de Velstrate in 't huus met den twe Torren, te Pietre Sersimoens, vierden de goede lieden van der Poorteryen, van den Gulden van Onser Vrouwen te sente Claus, dat men heet der Poorters-gulde, in deser manieren, te wetene: met drye raden hooghe; up d'eerste rade xxiij tortssen; up de tweeste xxj. tortssen, in midden van diere hanghende eene starre met vj. tortssen; up de darde rade xij. tortssen, ende onder elc van dien drye raden hinc een grau laken, voor elc een beelde van Onser Vrouwen, staende in de divise van den vorseiden gulde, die de poorters costumelic draghen up hare habyten die sy jaerlijcs van den selven gulde maken. Boven dien waren in de drye upperste veinsteren uuthanghende drye crucen, elc met iiij. tortssen; ende elc van den twe Torren heeft een splete ter straten waert in, t' elker spleten stond eene tortsse; up de carthiellen tusschen de torren stonden twe tortssen ende up elc van den twe torren waren viij. tortssen, beloept t' samen C. ij. tortssen, ende vore de duere van den selven huus stont een groet vier, tusschen iiij. yzeren roeden; van fassielhoute xxx. voeten hoghe.

Item, Jan Utenhove, watergrave van Vlaenderen, vierde te sinen huus in de Schelstrate met xiij. tortssen, drye stagien hooghe.

Item, meester Joerijs de Bul, secretaris mijns gheduchts heeren, vierde voer sijn huus beneden den Sandtberghe, met xxvj. tortssen, iij. stagien hooge, voren behanghen met peersschen ende zwartten lakene.

Item, Symoen Betten, up de Hoghepoort vierde voer sijn huus met vj. tortssen.

Item, Jan van Sycleer up de Hoghepoort vierde voer

[p. 235]

sijn huus ende up sinen torre met xij. tortsschen, ende den ghevel ende den torre behanghen met papieren lantheerne, verwapent met der divizen van minen gheduchten heere, dwelc zeer schoene lichte ende 't huus voren behanghen met groenen lakenen ende daer up mijns gheduchts heeren wapenen van schilderyen zeer costelijc ghewracht.

Item, Juerijs Drabbe vore Scepenenhuus van der Kuere vierde voer sijn huus met xiij tortssen.

Item, meester Gillijs Papal, vierde voer sijn huus up de Hoghepoort met drye tortssen.

Item, Clays Van der Sickelen vierde voer sijn huus in de selve strate met v. tortssen.

Item, Pietre Van der Sickelen vierde voer sijn huus in de selve strate met v. tortssen.

Item, Pauwels Pinghel vierde voer sijn huus, by sente Michielskerke, met vij. tortssen.

Item, Joes Van der Muelen in de Veltstrate vierde voer sijn huus met vj. tortssen.

Item, Anthonijs Maes vierde voer sijn huus up de Vorderpoorte by der Minnenbrugghen met vj. tortssen, ende daer voren gehanghen een blau laken.

Item, de Prinche ende 't gheselschip van der Gulde van der Rethoryken, gehieten 't gheselschip van der Fonteynen, vierden 's barbiers vore Scepenenhuus van der Kuere met vij. tortssen, ende 't huus voren behanghen met blauwen lakenen.

Item, Pietre Hueribloc vierde voer sijn huus up de Vyschmarct, met xiij. tortssen, drye stagien hooge, 't huus voren behanghen met swartten ende grauwen lakenen, daer up gehicht de wapenen van minen gheduchten heere, ende een silverin Sent Andriescruce, stale ende viersteenen daer up gesaidt, sparken uutworpende.

[p. 236]

Item, Pietre Beys vierde te sinen huus in de Houburch met vj. tortssen.

Item, Lievin Van der Pale vierde voer sijn huus in de Drabstrate met xiij. tortssen.

Item, Jan van Melle, Joerijssone, in de selve strate, vierde voer sijn huus met xlvj. tortssen, drye stagien hooge, ende de vierde up den tsop van den huus, elke tortsse bewonden met groenen vincoerde.

Item, voer dlatoenen beelde van Onser Vrouwen, staende up de Hooghbrugghe, vierden de ghebuers met iij. tortssen.

Item, de munters mijns gheduchts heeren van sijnder steede van Gend vierden vore Nuwenborch up de Hooghpoort met xxix. tortssen, drye stagien hooge, 't huus voren behanghen met zwartten lakenen, daer up gehecht de wapenen van minen gheduchten heere ende der munteneeren wapenen vorseit, zeer rykelic ghewrocht van schilderyen.