|
| |
| |
| |
[1453]
Dit narvolghende sijn de pointen ende articulen, dewelke die van Gendt doen sullen den herdde gheduchten heere ende prinche Philipse, hertogh van Bourgognen, van Lotryke, van Brabant ende van Lymborch, grave van Vlaenderen, van Arthois, van Bourgognen, palatin van Henegouwe, van Hollandt, van Zeelandt ende van Namen, marcgrave des Heylichs Rijcs, heere van Vrieslandt, van Salines ende van Mechellen, nar den inhoudene van den payse, ghemaect tusschen den zelven, herdden gheduchten heere ende prinche, ende sijnder steede van Gendt, ghedaen in 't jaer M. CCCC. ende liij, den xxxten dach in Julio.
Philips by der Gracien Gods, hertogh van Bourgognen, van Lotryke, van Brabant ende van Limborch, grave van Vlaenderen, enz. Allen den gheenen, die nu sijn ende narmaels wezen sullen, alsoe als narderhandt by der gracien ons Heeren, wy victorye gehadt hebben in den strijt, die was voer Gavere, jegen die van onser steede van Gendt ende horen helperen, in 't maendaghe lestleden, xxiij dach in Julio, de selve van onser steede van Gendt up den xxvjten dach der selver maent, by ons gesendt hebben in ons logijs ende leger voer Gavere, hoire ghedeputeerde in groeten getale, om ons te biddene ende te versoukene, in alder oedtmoedicheeden, dat wy hebbende deernesse ende ontfarmenesse van hen ende van den armen volke, om te verhuedene veele meer groeter menschelyker bloetstorttinghe, ende de destructie ende verderffenesse van onser vorseyde steede van Gendt, onse gracie ende ghenaden an hem wilden kieren, ende hem vergheven hoir
| |
| |
mesdaden ende mesgrypen, ende de groete gebreken, die sy jeghen ons, onser hogheyt ende heerlijcheyt voortghekeert hebben ende ghedaen, segghende dat sy gheentsints de macht en hadden om alsulke eerlyke beteringhe te doene, als daer toe wel behoerde ende ghenouch ware, om de reparacie van haren vorseyden misgrype, ten ware dat onse gracie ende genade hen ghewillichlijc ende mildelijc geschiede, ons biddende ende presenterende veele saken ende dinghen te doene voer proffitelyke ende eerlyke beteringhe, naer huerer macht, ende oec te vulbringhene seker pointen, daer omme dit jeghewordighe orloghe begonnen es geweest, up dwelke wy beruert van ontfarmenessen ende dernessen sonder te willen letten oft rusten up de vorseyde huere ghebreke ende groete misgrypen, ende sonderlinghe up 't gheendt, dat in maendagh lestleeden alle de raedslieden, scepenen, dekenen ende andre van onser vorseyde steede met alle hueren hulperen getoghen waren ghewapender handt uut onser vorseider steede van Gendt ende ghecomen in stryde jeghen ons, hebben ontfanghen de selve geboden, ghelijc ende in der manieren, hier naer volghende:
Ierst, aengaende den makene ende vernieuwene van der wet, binnen der steede van Gendt, de vorseyde van Gendt bieden ende presenteeren ende sijn te vreden, dat in 't vorseyde vermaken van der vorseyde wet, men nu voortaene voortgaen sal, naer der vormen ende inhoudene van den previlegie van den coninc Philips, van den jare M. CCC. ende éen, al sonder dat de dekenen van den Neeringhen ende van der Weveryen, hem sullen mogen onderwinden van den vorseyden makene ende vernieuwene van der wet, noch van den keure, van den kiezers genoemt in 't vorseyde previlegie, noch dat sy sullen mogen noemen oft doen noemen de vor- | |
| |
seyde kiezers eenighe om die te nemene oft te kiezene in nieuwe scepenen oft rade, ende oec sullen sy hem engheensins onderwinden van den bewinde ende juridictien van der vorseyde wet, noch van den wijsdommen, die geschien sullen by den scepenen ende rade, noch jeghenwordich wezen in de camere van scepenen, als sy termineeren ende wyzen sullen de gedinghen voer hem hanghende, ende en sullen oec niet jeghenwordich sijn, als de vorseyde van der wet kiezen sullen de vorseyde iiij kiezers van der steede, noch letscel doen den selven van der wet in hore officien, ende up dat sy by versmiekinghe oft ombehoerlyken onderwyzene, oft by gheloeften te nemene hem vervordderden te doene procederen ten vorseyden makene van der wet, oft dat sy hen onderwinden vonnessen te wyzene oft te appointierene saken met de vorseyde scepenen, oft dat sy jeghenwordich wilden weezen te nemene de vorseyde iiij kiezers van der steede, oft beletten die van der wet in huere officie, in desen gevalle sullen de vorseyde dekenen ghepriveert werdden van de vorseyde officien van den dekenschepe, ende gehouden voer onable omme te wezene in wette, ende voort gepuniert naer den heessch van der saken; ende van nu voortan sal men voortvaren in 't vermaken van der wet naer d'inhouden van den vorseyden previlegie, nemende ende kiezende xxvj personen, eerbare ende nut wesende van
der vorseyde steede, sonder te aensiene die van der Weveryen en anderen ambachten, ende sonder dat die vorseyde viij kiezers moghen kiezen 't vorseyde getal van xxvj personen uut den drye leden van onser vorseyde steede van Gendt, mar in de macht van de vorseyde kiezers sal wezen te nemene ende te kiezene nar hueren goetdunkene 't vorseyde getal van xxvj personen van den eerbaersten ende oirboerlijcsten van der selver steede,
| |
| |
ende oec sal bliven in de macht van den ouden scepenen te kiezen de iiij goede eerbare mannen van der vorseyde stede weghen, sulke als sy bevinden sullen in huere consciencie om te doen den coze van den nieuwen scepenen ende Rade, sonder dat de vorseyde dekenen, noch andre hem des sullen moghen onderwinden, niet jeghenstaende alle costumen ende uzagien daer jeghen wezende; ende alsnu sijn te vreden de vorseyde van Gendt, dat sonder verbeiden halfhouste, de vorseyde wet vermaect werdde ende blive tot den vorseyden half houst naestcomende, ende dat zy blive tot halfhoust xiiijc. Liiij jaer.
Item, aengaende den poorterschepe van dien van Gendt, de selve van Gendt, alsoe wel ten vercryghene ende ten achtervolghene ende onderhoudene van haren poorteren ende poorterssen selen daer af ghebruyken ende uzeeren van nu voortan naer d'inhouden van hueren privilegien ende anders niet, niet jeghenstaende alle costumen ende uzagien ter contraryen; ende als van den bannen, die gheschien sullen te Gendt, de scepenen van Gendt en selen niet mogen, noch schuldich sijn van nu vortane te doene de vorseyde banne, sonder ottroy ende consent van minen vorseyden heere, den hertoghe oft van sinen bailli van Gendt; ende up dat de vorseyde bailli niet jeghewordich sijn en wilde met scepenen te doene de vorseyde banne, als hijs versocht sijn sal, scepenen van Gendt selen des clachte moghen doen minen vorseyden heere, wezende in 't landt, ende in sijnder absencien den lieden van sinen rade, om daer in te versiene alsoe 't behoeren sal, ende eest bevonden partyen gehoert, dat de vorseyde bailli in gebreke geweest heeft, hy sal ghepunieert werdden ende ghepriveert van sijnder officien ende een ander ghestelt in sijn steede, ende daer toe ghepunieert naer den heesch van der saken.
| |
| |
Item, van den voergheboden ende statuten, de vorseyde van Gendt en selen van nu voortan niet mogen noch sculdich sijn te makene eenighe voergheboden, statuten oft ordinancien, sonder den orlof oft octroy van minen vorseiden Heere, oft van sinen vorseiden bailli van Gendt, verclarende als niet ende van gheender weerdden die statuten, ordenancien ende voergheboden, die ghemaect gheweest hebben by scepenen van Gendt, sonder consent oft ottroy van minen vorseiden heere oft van sinen bailli van Gendt.
Item, als van der kennessen van den officiers, die Mijn Heere segt hem toebehoerende, de vorseide van Gendt hebben gheconsentheert, dat de selve kennesse in allen saken crimineel ende civil, annopende den vorseiden officiers ter causen van hueren officyen, ende van 't gheent des daer aen cleeft ende aencleven mach, sal wezen ende toebehoeren minen voorseiden Heere alleene ende voer al. Ende oft ghevallet dat de vorseide officiers onder 't decscelle van hueren officien aennemen arrest oft angrepen kennesse up de warachtighe poorteren van Gendt ende andersins, ende in anderen saken, dan die verclaert zijn in 't privilegie van den Grave Guwy, de vorseide bailli van Gendt sal ghecommitteert sijn ende macht hebben van Mijns Heeren weeghen, hier up de clachte van die van Gendt te appointierene te ordinerene ende te bedwinghene de vorseide officiers om weder te stellene ende te latene de vorseide kennessen scepenen van Gendt, naer huer vorseide privilegie, ende dat hy bevinden sal, partyen ghehoert sijnde, dat schuldich es te gheschiene van redenen weghen, ende up dat de voorseide bailli gebreckelijc wordde bevonden, soe sullen scepenen clachte moghen doen daer overe Minen Heere, is hy in 't landt, ende in sijn absencie den vorseiden lieden van sinen rade,
| |
| |
ende Mijn Heere ende de liede van sinen rade sullen daer inne versien alsoe 't behoeren sal, ende eest bevonden dat de vorseide officiers ghebreckelijc gheweest hebben, sy sullen ghepriveert werdden van hueren officieren, ende andre in huere steede gestelt, ende ghecorrigiert ende geprivieert werdden, naer de groette van der saken.
Item, als van der kennissen van den mesgripen ende mesdaden ghedaen oft voortghekiert by poorters van Gendt, accorderen zy: eest, dat iemant warachtich poorter zijnde doet oft perpetreert eenighe mesdaet, uutghenomen vrye steeden van wette, de mesdadighe, warachtighe poorters ende poorterssen wesende, sullen mogen kiezen ghetracteert te wezene, ter causen van hueren mesdaden voer scepenen van Gendt, oft in de juredictie van daer de sake gevallen ware, sonder dat nochtans de vorseide van Gendt sullen moghen te hemwaerts trecken de kennesse van den mesdaden, noch van den mesdadighen met wien eenighe van hemlieden warachtighe poorters geweest sullen hebben, alwaer 't alsoe dat de princhipael mesdoenre haerlieder poorter ware, ende en sullen gheene kennesse hebben sonder alleenlijc van den poorters, die de mesdaet ghedaen sullen hebben, uutghedaen de vrye steeden van wette, ghelijc vorseit is.
Item, aengaende den placaten ende beslotene brieven van die van Gendt, die sy scriven aen de officiers van Minen Heere ende andre, sy sullen van nu voortan hemlieden beneden scriven sonder te scriven oft te setten in de margie oft boven in 't hooft, ende sullen hem daer in regulen ghelijc den anderen drye leeden van Vlaenderen ende niet anders.
Item, sy bieden dat sy hoer Hooftmannen, Scepenen ende Dekenen met den gheenen, die comen sullen voer Minen Heere oft voer Minen Heere van Chaerloes, zinen
| |
| |
sone om ghenade te roupene, sullen doen bringhen hoir banieren ende die presentheeren Minen Heere, ende sullen hem die overgheven om sinen wille daer mede te doene, in tieken ende eensdeels van der reparacien van der mesdaet, die die van Gendt ghedaen hebben, in 't heffen ende draghen van den banieren jeghen hem.
Item, als van den Witte Caproens, noch andre lieden van ghelyker condicien, de vorseide van Gendt en sullen niet meer ghebruyken te hebbene de vorseide Witte Caproenen, noch andre liede van ghelyker condicien, onder wat namen sy moghen wezen ghenoemt, ende daer aff sy voertijdts by quader costumen upgestelt, jeghen redenen, sy hebben gheuzeert onder 't decsel van te executeerne haerlieder vonnessen ende andre exploite ende bevelen, welke costume es ende sal zijn te nieute ghedaen ende afgheleghen, maer om die execucien van den vorseiden vonnessen ende andre exploiten van justicien alsoe te doene, ende die behoeren sullen ghedaen te sine in sulker wijs, ende by der manieren alsoe 't behoeren sal, mijn vorseide Heere om dat te doene sal daer toe stellen ende ordineeren sinen bailli van Gendt.
Item, als van der beroupinghen van saken ende ghedinghen ingheleyt ende hanghende vore de wetten ende andere officiers van der steeden ende casselryen van Oudenarde, Cortryke, ende van den graveschepe ende lande van Aelst, van den lande van Waes, ende van den Vier ambachten, dewelke steeden, casselryen ende landen, mijn vorseiden heere wilt dat soe weezen ende bliven t' eeuwelyken daghe in aller saken vry ende exempt van der macht ende casselryen van Gendt, om der redenen wille gheseeght ende gheallegiert van der zyden Mijns Heeren, enz. De vorseide van Gendt sijn te vreden dat die selve steeden, casselryen ende landen bliven in sulken state, als sy jeghenwordich zijn, sonder dat iet
| |
| |
daer in ghedaen oft voortghekeert werdde van nieus ter eender zyden oft ter andere, duerende den tijdt ende terme van eenen halven jare, te rekenen van den daghe, dat de vorseide van Gendt ghedaen sullen hebben 't ghent dat sy gehouden sijn te doene minen vorseiden Heere, om de eerlyke beteringhe, den welken tijdt hanghende ende soe men ierst moghen sal, soe sal in dese materye geappointiert ende geordineert werdden by vriendelyken weghe oft van justicien, alsoe hier naer geavizeert sal werdden, ende daer mede Mijn Heere ende die van Gendt te vredén sullen sijn, sonder nochtans dat in dese sake die van Gendt hemlieden sullen moghen behelpen metter gracien ende remissien, die Mijn Heere hemlieden doen sal van haren mesdaden ende mesgrypen, noch dat de selve gracie hemlieden moghe proffyteeren noch minen vorseiden heere achterdeel draghen, aengaende den saken van den steeden ende casselryen van Curtryke, Oudenarde, Dendremonde, Aelst, Biervliet, den lande van Waes, ende van Vierambachten, daer aff hier voren mencie gemaect es, ende sullen die van Gendt ten surpluze bliven in sulc recht als sy daer inne jeghewordichlijc hebben ende sculdich sijn te hebbene.
Item, als van der eerlyker beteringhen, sy bieden dat huer Hooftmannen ende de raedslieden van den Hooftmannen, oec de Scepenen van der ouder wet ende van der nieuwere, ende oec mede alle de Deekenen ende andere van den poorteren ende inwoenenden van Gendt, tot den getalc van iim. mannen ten minsten, comen sullen voer Minen Heere oft Minen Heere van Charloes, sinen sone, eene halve mile buten der steeden van Gendt, te sulken daghe, als Minen Heere gelieven sal te ordineeren, te weten: de Hooftmannen ende raedslieden al naect in huer hemden ende nedercleederen, ende alle d'andere bloedtshooves ende ontgordt, ende sullen hem
| |
| |
alle stellen up hare knien voer Minen Heere oft Minen Heere van Charloes, ende wesende in den staet vorseit, sullen sy segghen oft doen segghen by den mondt van eenighe van hemlieden in walsscher tale, dat sy valsschelijc ende qualijc ende als wedersporighe ende overhoirighe ende aennemende groetelijc jeghen minen vorseiden heere, sijnre hoocheyt ende eerlicheit, hemlieden upgestelt hebben in wapenen, Hooftmannen gemaect, Minen Heere ende sinen lieden upgeloepen ende hebben hem gedaen veele angripinghen ende weghen van faite, dat hemlieden lieedt es, ende sullen daer aff versouken in al der oedtmoedicheeden gracie ende ghenade an Minen Heere, ende dit ghedaen alle de voorghenoemde van Gendt te gadre met eender stemmen, sullen genade roupen aen Minen Heere, ende hem versouken genade, gracie ende mizericordie.
Item, als van der drye poorten te wetene: de twe poorten van de voorseide steede d'eene gehieten de Persellepoorte, d'andere de Overpoorte, doer welke ij poorten die van Gend ghinghen an bieeden zyden van der Schelden om Oudenarde te beleggene, ende d'ander gehieten de Hospitaelpoorte, die es over de syde te Waes waert; daer die van Gendt uuttrocken om te gane tot Repelmonde ende up te loepene Minen Heere ende sijn volc van wapenen, de vorseide van Gendt bieden ende sijn te vreden, dat de vorseide twe poorten, daer die van Gend doertrocken omme te belegghene Oudenarde, dwelc was up eenen donresdach naer Paesschen, in 't jaer lij, sullen sijn ende bliven gesloten euwelijc ende t' allen daghe, t'elken donresdaghe in elke weke van den jare, in sulker wijs dat doer die selve ij poorten die gesloten sullen zijn, so vorseit is, men niemant en sal mogen den vorseiden donresdach, in elke weke van den jare, dore laten incomen noch uutlyden van der vor- | |
| |
seide steede, ende sijn oec te vreden dat de andre poorte gehieten de Hospitaelpoorte in euwelyker memorien sal bliven gesloten ende ghemuert ende t' allen daghen ghecondampneert, sonder die ummermeer open te moghen doen, noch doer te laten incomen oft uutlyden in de vorseide steede, het en zy by der goeder gelieften van minen vorseiden heere oft sinen narcomers, Graven oft Gravinnen van Vlaenderen.
Item, aengaende der restitucien, schaden ende achterdeelle toecomen minen vorseiden heere om der vermindertheden van sijnre domaynen in sinen lande van Vlaenderen ende van Henegouwe by den toedoene van den orloghe; de vorseide van Gend sullen om dese sake vergaderen met den anderen leden ende t' samen overdraghen ende avizeeren ende eenighen vondt souken, om te consentheerne 't gheent, dat genouch sal sijn ende daer mede mijn vorseide heere te vreden sal mogen wesen.
Item, om de proffytelike beteringhe bieden de vorseide van Gendt, dat alsoe verre de vorseide leden overdraghen ende eens wordden met den vorseiden van Gend, eenighe redelyke dinghen daer mede mijn vorseide heere te vreden zy, voer vergeldinghe van den vorseiden schaden ende achterdeele daer aff in 't voergaende article mencie gemaect es; de vorseide proffitelyke beteringhe sal wesen ijc m. gulden Ryders, ende up dat de vorseide leden niet en accordeeren ende appointieren om de vorseide restitucie van den vorseiden schaden, by manieren dat mijn vorseide heere te vreden zy; in desen gevalle, de vorseide beteringhe sal wesen van iijc m. gulden Ryders.
Item, om de meerdere reparacie ende om de reparacie ende edificien van veele kerken ghedestrueert in Vlaenderen, sonderlinghe de kerke van Repelmonde, om up- | |
| |
gaende crucen te makene, ende epitaphien, fondacien van messen ter vorseide plaetsen van Repelmonde ende eldere, daer 't minen vorseiden heere ghelieven sal, de vorseide van Gendt bieden minen vorseiden heere te betalene Lm gulden Ryders.
Item, als van den pointen ende articulen, die gepasseert waren te Gend by den gedeputeerden van der vorseide steede met minen heere den Bisschop van Dornike ende andere Raedsliede van minen vorseiden heere, aengaende diverssche clachten doen gedaen van der zyde van minen vorseiden heere, de welke articulen sijn getiekent met den hantiekene van meester Janne Rijm, meester Gillijs Papal ende meester Pieter Goetghebuer, de vorseide van Gend sijn te vreden, dat de gheene van den vorseiden articulen, die niet begrepen en sijn noch geappointiert hier boven, ende de welke mijn vorseide heere sal willen aennemen, sullen by dien van Gend dankelijc geconsenteert werdden, alsoe sy hebben gepasseert geweest ende ghetiekent by den vorseiden clerken van der vorseide stede van Gend, ende want de vorseide van Gend van allen voirscreven pointen met minen vorseiden heere overcomen zijn ende veraccordeert, soe heeft de selve mijn gheducht heere sonderlinghe om de eere ende weerdicheit van Gode, onsen scheppere, hebbende oec ontfarmenesse ende deernessen van sijnder vorseide stad van Gend, ende van sinen volke daer inne woenende, van sijnder rechter wetentheyt ende vulcomelyker macht den selven van sijnder steede van Gend, ende die daer in woenen, soo wel Hooftmannen, Raden, als andere van wat state oft condicien dat sy zijn, die hem ghedient hebben in wapeninghe in 't stic van den vorseiden orloghe, ende met hem partye gehouden te deser tijdt, ghelijc vorseit is jeghen hem ende sinen ondersaten, heeft quyt geschouden, vergheven ende te
| |
| |
nieute ghedaen alle huere ghebreken, mesdaden ende mesgripen tot eeuwelyken daghe, sonder emmermeer hen oft den eenen van hem met rechte oft andersins daer omme te porrene, niet alleene oec van criminelen saken ende civilen, mar van allen saken engheene daer uut gheschieden, ende tot desen heeft mijn gheducht heere wederroupen alle bannen, die die van Gend ghedaen hebben binnen den porrene ende beroerten van deser orloghe.
Item, noch dat gheestelyke noch weerlyke persoenen gehouden sijn en sullen te betalene pachten, cheinsen, renten, huushueren ende al waert soe dat daer aff yemant van den persoenen vervolch deden voer wette, soe en sal men den eenen, noch den anderen gheven noch nemen, also varre als de schult noopt gerezen ende ghedaen sijnde binnen den tyde van desen orloghe. Welken pais besegelt ende ghesloten wart tusschen minen vorseiden heere ende de vorseide van Gend, xxx daghe in julio xiiijc Liij jaer, in mijns gheduchts heeren logijs vore 't casteel van Gavere, ter presencien van minen voerseiden gheduchten Heere ende Princhen ende by hem daer staende de hardde dorluchtighe princhen ende heeren: Karle van Bourgognen, Grave van Charloys; Jan van Bourgognen, Grave van Stampes; mijn heere Adolf van Cleve ende Van der Merken, heere van Ravesteyn; mijn heere Jan van Portingale; mijn heere Tybaut van Lutsenbourch, heere van Fiennes; mijn heere Anthonijs, bastardt van Bourgognen; mijn heere Jacop van Lutsenbourch; mijn heere Tybaut de Nuefchasteel, heere van Blammont ende marschalc van Bourgognen; mijn heere Pietre de Beffermont, heere van Charny; mijn heere Jan van Crouwy; mijn heere Glaude de Montagu, heere van Chouchys; mijn heere Jan de Nuefchasteel, heere van Montagny; mijn heere Jan van Lannoy;
| |
| |
mijn heere Jan van Lutsenbourch, bastart van sent Poel, heere van Haubordijn; mijn heere Symoen van Allaing, heere van Montargny; mijn heere Karle, heere van Rotsschefort; mijn heere Pietre, heere van Goux, ridders; ende Bertram Van der Breckeryen, sciltcnape. Ende over die van Gendt: mijn heere de prelaet van Dronghen, mijn heere de prioer van der Sartruezen by Gendt; broeder Jacop Ruebs; her Bouwin van Fossues, alias Van Nevele, religieus van sente Baefs, by Ghend; meester Jan Moraen, meester Jan van der Heecken, Jan de Raedts, Anthonijs Sersanders, Jan Van den Moere, Jan van den Poule ende Willem Pottier.
's Maendaghs xxx in Hoymaent, soe quam mijn gheduchte heere ende prinche met al sinen volke van wapenen voer Gend, tot Leederberch, buten sinte Lievinspoorte, verwachtende die van Gendt, de welke uutquamen om te doene den voetval naer inhouden van den payze, enz. Ierst quamen de Capiteynen, Raedslieden ende bieede de Deekenen, in haer lijnwaet, bloetshoefs ende barvoet, ende alle de andre Schepenen van bieeden banken, Deekenen, Ghezworenen van allen neeringhen ende van den wyken van der weveryen, ende meer andre notable poorters ende inzetene van der vorseide steede van Gendt, tot den ghetale van dusent personen ende aldaer daden zy den voetval voer minen hardden gheduchten heere ende prinche, ghelijc ende in der manieren dat den pays inhoudt ende begrijpt, ghevende over in den handen van minen vorseiden hardden gheduchten heere alle haerlieder banieren van al den drye leeden van der steede van Gendt, omme daer mede minen vorseiden hardden gheduchten heere te doene alle sijn gheliefte, ende hem biddende oetmoedelijc om sijn gracie met sulken woerden als boven in den brief van den payse verhaelt staen, ende dat ghedaen, mijn geduchte heere vergaeft hem- | |
| |
lieden zeere minentlijc, segghende in franssoyse: ‘Weest ons vortane goede ghetrouwe liede, wy sullen u een goet ghetrouwe heere sijn.’ Ende dit aldus ghedaen mijn gheduchten heere vertrac weder te Gavere waert ende van daer te Oudenarde, ende die van Gend trocken met groeter vrouden ende blijsschepen weder in Gend, lovende ende dankende Gode van den payse, ende in t' huus waert comen soe viel van der brugghen voer sente Lievinspoorte in 't water een Jan Bruinbaert, steedehoudere van den deken van der weveryen, ende verdranc terstont, toesiende alle den volke, dat daer ghinc ende stont.
Up sente Pietersdach, ingaende oughst, soe quamen lancs der Schelden te Gendt ghevloedt groote meenichte van verdronkene lieden, alsoe sy voer Gavere in 't water spronghen ende alsoe verdronken, dwelc zeer deerlijc was om sien; ende by dien men dede buten sente Lievinspoorte maken een stakijts, daer de doode lichamen jeghen bleven rustende, ende daer waren gheordineert lieden die se uutvisschten ende aldaer in eenen meersch begroeven, want sy waren soe ontschepen van den watre ende soe gheswollen dat menre eenen niet bekennen en conste, hoewel dat elc souken quam sinen vriendt onder dat verdronkene volc.
|
|
Auteursrechtvrij