Kronyk van Vlaenderen

[p. 105]

[1440]

Dits de maniere van der eeren ende reverencien, die die van Brugghe daden minen gheduchten heere, den prinche, als over heerlyke beteringhe, vore de mesdaet by hemlieden gheperpetreert, in 't vorseide orloghe jeghen de hoecheit van minen vorseiden gheduchten heere ende prinche.

Sondaghs naer noene, up den xj^ten dach in Decembre, in 't jaer xiiij^c ende xl., quam mijn harde gheduchte heere, de hertoghe van Bourgoenien, grave van Vlaenderen, enz. uut sijnder steede van den Damme, ende met hem verselschipt de hertoghe van Orliens, dewelke riet neffens sijnder syden, de graven van Stampes, ende van Nevers, de jonker van Cleve, de grave van Muers, ende meer andre groete heeren, in groeter menichten, ende comende up een schoen breedt veldt tusschen Male ende Brugghe, omtrent een quaert van eender milen van der selver steede van Brugghe, aldaer vant mijn vorseide gheduchte heere alle de processyen van al den kerken van Brugghe, die daer hilden al stille met crucen ende met vanen, sonder cnielen, maer de processien van Sent Donas, die hilden hem noch binnen der steede van Brugghe. Up 't vorseide veldt, naest den processien voernoemt, waren die van der wet van Brugghe vercleedt met haren pareercleederen, de deekenen ende de hooftmannen der selver steede wel tot den ghetale, midts haren cnapen, van M. personen, dewelke alle samentlijc, uutghedaen de processyen, hemlieden voughden up hare knyen, als sy saghen de comste van minen vorseiden gheduchten heere, hare handen hebbende geleyt te gadre, bloedts hooves ende barvoedt, ende daden toghen ende segghen by eenen pensionaryze van der vorseider steede, ierst in franssoyze, ende daer naer in

[p. 106]

vlaemssche, dat sy bekenden groetelijc mesdaen hebbende jeghen de hogheyt van minen vorseiden hardden gheduchten heere ende prinche, ende dat by al den ghemeenen buyke van der vorseider steede van Brugghe, roupende ende biddende onderdanichlyken om ghenade, ende omme ontfarmicheyt, ende dat hem soude willen ghelieven hemlieden te verghevene de conspiracie ende wedersporicheyt by den vorseiden van Brugghe in voerledene tyden ghedaen ende gheperpetreert, ende doen gaven sy overe minen vorseiden hardden gheduchten heere de slotelen van al den poorten van der steede van Brugghe, om hem daer mede te doene sine gheliefte, versoukende ende oedtmoedelijc biddende dat hy by sijnder ontfarmegher ghoederthierenheyt wilde comen binnen sijnder steede van Brugghe, sy ende al 't ghemeene van der steede soudene hardde blydelyken ende met ghenouchten ontfanghen, alsoe 't wel behoerde t' syre hoegheyt, ende sy baden minen vorseiden heere, den hertoghe van Orliens ende mijnder gheduchter vrouwen, der princherssen dat sy wilden bidden minen hardden gheduchten heere ende prinche voer die van Brugghe, dwelc sy terstont daden ende rechtevoert mijn hardde gheduchte heere beval den souverain van Vlaenderen, de vorseide sloteten te aenverdene, dwelc hy dede ende leidse vore hem up sijn pardt, ende alsoe voerde hy ze voer minen hardden gheduchten heere ende prinche tot in mijns heeren hoff, ende mijn vorseide hardde gheduchte heere vergaf hemlieden al haren mesdaet, versoukende an hemlieden, dat sy van nu voertan sijn goede, ghetrouwe ondersaten wilden sijn ende bliven, hy soude hemlieden een goet, ghetrouwe heere ende prinche sijn, behouden dies dat sy gehouden worden te volcomene de sentencie by hem hier te voren gegeven; ende dat gheseit sijnde, sy rie-

[p. 107]

pen: Noël! noël! noël! Ende es te wetene, dat de Boeveryepoorte, daer mijn vorseide hardde gheduchte heere ende prinche ten daghe van de commocien ende wedersporicheeden laestwaerf uutriedt sal sijn ende bliven vermedtst ende ghesloten, ende oec es te wetene, dat alle de gheene, die aldus daden den voetval voer minen hardden gheduchten heere, dat het waren van den notabelsten, eerbaersten ende rijcsten van der vorseider steede van Brugghe.