|
| |
[1404]
Ian van Digion, oudste sone van den hertoghe Philips van Bourgoenien, na de doot van sinen vader, hy was hertoghe van Bourgoenien, ende naer de doot van vrouwe Magriete van Male, sijnder moeder, hy wart grave van Vlaenderen, van Artoys ende van Bourgoenien, palatin heere van Salines ende van Mechelen, ende hy was de xxviijte grave van Vlaenderen, ende hy regneerde omtrent xvj jaer. Hy quam cort naer paesschen in Vlaenderen, ende was alomme wel ende eerlyken ontfanghen, ende hy zwoer alomme in allen steden de privilegien, costumen, rechten ende wetten te houdene, ende te doen houden van den lande van Vlaenderen.
In 't jaer M. CCCC ende v. doen quam Thomas, hertoghe van Clarencen, broeder van den coninc Heinrijc van Inghelandt, met eender vlote wel van hondert schepen vul volcx van wapenen, ende hy arriveerde ter Mude voer de Sluus, ende de Inghelssche trocken in Cazandt, doende daer groete schade, sy roefden 't folc, verbarrenden de huuze, ende daer naer sy stormden up de Sluus, ende een Sluzenare schoet den amirael van den Ingels- | |
| |
schen doot, ende hiet de amirael, de grave van Pennebrouc. De hertoghe Jan van Bourgoenien, grave van Vlaenderen, ende die van Gendt, sy stelden hem om de Inghelsschen te wederstaene ende te bevechtene, mar de Inghelssche dat vernemende sy staken 't fier in Raemscappelle ende trocken t' schepe, ende alsoe te Inghelandt waert, mar al de Inghelssche quamen voer der Nieupoort lydende als omme 't huuswaert te treckene; een stierman, gehieten Wouter Janssoene, hy roefde den Inghelsschen de taeffele van den hoeghen outare van Sent Annen ter Mude, dewelke sy daer gheroeft hadden, ende oec vele anders goedts van haren roeve, dat zy ghemeent hadden in Inghelandt te voerene. In 't jaer M. CCCC. ende vij doen quam de hertoghe Jan van Bourgoenien in Sent Omars, met grooter heercracht van edelen lieden uut diversschen landen om te treckene vore Calays, ende dat te belegghene. Up den vijten dach in Novembre soe was buten Sent Omars montre ghedaen van den volke van wapenen, ende was in Sent Omars groete provandssce van busscen, blyen, springalen en anderen diversschen engienen ende oec van vytaillien. Binnen deser tijdt quamen diverssche brieven aen den hertoghe Jan van Bourgoenien van 's conincs weghe van Vrankeryke, bevelende dat niemant voer Calays trecken en soude, up de verbuerte van der galghen, ende achtervolghende den bevele van den coninc, up Sente Martensavont 's nuchtens, elc vertrac t'huuswaert daer hy behoerde, maer die van varren landen comen waren, ende groeten cost gedaen hadden, ende versedt hadden borghe
ende landt, ende hare pande te wets gheleit hadden, om hemlieden up te stellene ten dienste van den vorseiden hertoghe Jan, die waren rouwich ende droeve, ende up Sente Martinsnacht doen quamen de Inghelssche voer Sent Omars, ende sy roefden de Vosselaerstrate, ende trocken ten Predicaren, ende
| |
| |
sy wilden 't covent verbarren ende roeven, maer de broeders gaven hemlieden te drinken zeere goeden wijn, die hem de hertoghe Jan gegeven hadde, ende daden hem de beste chiere, die sy consten, ende hieromme lieten sy 't cloester staen, ende en mesdeden hemlieden niet, ende des andersdaghs 's nuchtens, omtrent den vieren, doen reden de Inghelssche 't huuswaert met haren roeve ende met haren ghevanghenen, te Calays, te Hoye, te Ghysen, te Mark, te Balighem ende te Sandtgate.
In 't selve jaer up Sente Clementsavent, soe was Lodewijc, de hertoghe van Orliens doot ghesleghen te Parijs, hy was eenich broeder van den coninc Karle van Vrankeryke; 't carnacion van desen vindi in dese drye latijnssche woorden: Contere braChIUM peCCatorIs. Up Sente Barbelendach in Decembre in 't selve jaer was dwater zeere groet te Brugghe wel xj daghen lanc, soe dat de lieden moesten woenen up hare solders', ende daer hare spyse berieden.
In 't jaer Ons Heeren M. CCCC ende viij up den xxiijten dach in April someghe poorters van Brugghe, dewelke zeere begheerden te hebbene de aministracie ende regement van der stede, te wetene, Clays de Soutere, Lievin Schotelare, Jan Bieze, ende Jan Bortoen, ende sy beloveden den hertoghe Jan, den vijten penninc van den jaerlijcschen incomene van der steede van Brugghe, ende sy deden bannen vj van den heerlijcsten poorters van Brugghe, dewelke dat regiment van Brugghe gehadt hadden binnen 's hertoghen Philips tyde, ierst Jan Camphin, Jan Hoenin, Clays Barbysan, Zeegher van den Walle, Victor van Artryke ende Pieteren de Smet, ende dese waren te Brugghe ter Hallen uutgheroupen ter presentien van den hertoghe Jan ghebannen, contrarye den prinche ende den lande van Vlaenderen, ende haerlieder goedt was gheconfiskierdt, ende gheleydt ter taflen van den grave van Vlaenderen.
| |
| |
In 't selve jaer doen was Jan van Beyeren, de elect bisschop van Ludeke, verjaght uute Ludeke, ende die van Ludeke coren eenen anderen bisschop, des heeren sone van Peruweys, ende Jan van Beyeren om dien lachter te wrekene, bat Jan van Bourgoenien, sinen neve, ende den grave Willemme van Hollandt, sinen broeder, omme hulpe ende om bistant met al haerlieder macht te willen by hem comen te Maestricht, in septembre, up Sent Teclendach. In 't selve jaer doen quamen hertoghe Jan van Bourgoenien ende grave Willem van Hollandt met groeter menichten van edelen volke tot up een schoene velt, tusschen Tongheren ende Ludeke, ende de Lukenaers dat vernemende lieten staen de siegie, die sy gehouden hadden voer Maestricht, braken up ende trocken in Ludeke, ende sy in Ludeke comen sijnde, daden luden de stormclocke, ende daden ghebieden up dlijf dat al dat stoc of staf draghen mochte uuttrecken soude, om te bevechtene Janne van Beyeren, den hertoghe Jan van Bourgoenien, den grave Willem van Hollandt, ende haren hulperen, ende sy ordineerden haren capiteyn, den goeden ouden heere van Peruweys, die gheerne belet hadde d'uutloepen van den comune, maer hy ne conste, ende alsoe trocken sy met eenen hope van xlvm Ludekenaers, Janne van Beyeren te ghemoete. De hertoghe Jan van Bourgoenien siende de groete fierheit van den Ludekers, hy ordineerde sijn scharen ende sijn bataillien, ende trac den Ludekers te ghemoete, dwelc coste menighen Bourguignoen, menighen Vlaminc, meenighen Hollandre, ende meenighen Heinuwier, want de Ludekers waren hittich, moedich ende zeere crachtich, soe dat Janne van Beyeren ende den sinen zeere campelic begonste te gane, nemar de grave van Namen, Robbrecht de Rouck, ende Inghelram de Borneville quamen met iiijc ghelaiven van achtre
| |
| |
slaende in de Ludekenaers, schoerden se ende braken hare bataillie, velden ze ter eerden ende versloughen se. Die van Ludeke hem siende gheschoffiert, vlouwen achter velde ende worder daer versleghen bet dan xxviijm mannen, ende daer bleef de goede oude heere van Peruweys versleghen, ende sijn sone de bisschop van Ludeke, ende meenich eedel man uut Ardanen, uut Buyllion ende uut den graveschepe van Loen; aldus Jan van Beyeren met den sinen hebbende vercreghen de victorye ende behouden 't felt, trac met sinen heere voer Ludeke, dewelke als sine saghen comen voer de stede, quamen uut oedmoedelijc biddende om gracie, ende presenteerden daer den hertoghe Jan de slotelen van der stede, die ze daer in gracien ontfinc, ende trac met sinen volke binder stede, ende dede sine baniere steken up de poorten, ende daer wordden onthoeft eene menichte van edelen, die hem contrarye ghesijn hadden, als de heere van Houffelijs ende andere. 'T carnacion van den strye staet begrepen in dit vers:
teCLa bonos CernIt, fLet LegIo, qUaM Leo sternIt.
In 't jaer Ons Heeren M. CCCC. ende xi de hertoghe Jan van Bourgoenien, ende grave van Vlaenderen, hy vergaderde groet volc van wapenen, ende hy onboet de Vlaminghe, dat sy souden met hem trecken willen jeghen sine viande, dewelke hem hilden in Vermendoys, ende hy gaf die van Brugghe weder hare banieren, die hemlieden sijn vader de hertoghe Philips ghenomen hadde, omme dat de ambachten jeghen de heeren niet vechten en souden, noch oec d'een jeghen d'andre, ghelijc de wevers jeghen de vleesschouwers, alsoe sy dickent ghedaen hadden. De Vlaminghe quamen ten ontbiedene van haren prinche, ende trocken met hem in 't landt van Vermendoys, te Mondidier ende te Haen, om te
| |
| |
bevechtene den hertoghe van Orliens, die hem doen in Haen hilt, mar als hy sach de moghentheyt van den hertoghe Jan van Bourgoenien ende van den Vlaminghen, hy vloe te Vrankeryke waert in uut Haen, met sinen eedelen, ende de Vlaminghen beclommen Haen ende wonnen de stede, roefden se ende staker 't fier in, ende keerden in Vlaenderen; ende die van Brugghe bleven voer Brugghe ligghende, tot dat de caellioette in den Braemberch af ware ghedaen, die Clays de Souter, ende Jan Bieze gheordineerdt hadden, men mochte in Brugghe nieuwers coren coepen dan in den Braemberch, ende van elken hoedt corens moeste men gheven ij Groeten Torn., ende dat hiet men Caellioette. Die van Brugghe laghen in Sente Baefs met tenten ende met pauwellioenen, ende someghe smale steeden met hem, als Dixmude, Sluus, Damme, Hoestende, Thorout, Blankenberghe, Oudenborch, Oestburch, Ardenburch, Monecsreede ende die van Houke, segghende dat sy hare wapenen niet en souden laten, noch hare banieren in Brugghe niet bringhen, vore dat 't calfvel gheschoerdt ware, ende te nieute ghedaen, dat Clais de Soutre ende Jan Bieze deden seghelen by fortsscen den lij dekenen van den ambachten van Brugghe, niet jeghenstaende dat sy niet weten en mochten wat in den chartre stont dien sy mochten bezeghelen; desen chartre was buten Brugghe brocht in Sente Baefs, daer die van Brugghe laghen, ende hy was daer in sticken gheschoert, ende elc deken trac daer sinen seghel af; de ambachten begheerden te hebbene haerlieder maendtgelt, dwelc hemlieden beloeft was, ende doen quamen sy in Brugghe ende daer naer waren ghebannen Jan Bieze ende someghe andere, die den vont vonden hadden van der caellioeten ende van den calfvelle.
In 't jaer Ons Heeren M. CCCC. ende xv soe beriedde
| |
| |
Henry de Lancastre, coninc van Inghelandt een groet vlot van schepen, vul lieden van wapenen, ende meest eedele lieden, ende in 't hende van Oustmaent hy arriveerde te Herfleur in Normandyen, ende hy ghecreech de steede, ende daer nar quam hy te Monstirvyleer, te Diepe, te Fechamp ende te Abbeville in Pontieu, niement hem wederstaende, ende hy ghecreech alle de sloten; ende in Octobre den xxvten dach soe quam hy tot Blangy, dit verhorende de heeren van Vrankeryke dat de coninc Heinrijc te Blangy lach, ende dat hy al d'landt conquesteerde sy vergaderden een groet heere van eedelen lieden van allen landen, ende trocken den coninc Heynrijc van Inghelandt te Blangy te ghemoete, daer was zeere ghevochten, ende gheviel daer eene de meeste bloedstortinghe van groeten moghenden ende eedelen princhen, die in twe hondert jaren in kerstenheede gheschiede, dwelc meest al toebrachte de hoeverdye van den princhen ende van den eedelen, die hare schutters ende hare knechten daden verby staen, ende verboden hem den Inghelsschen yet te mesdoene, want sy wilden se eedelec metten zweerden verwinnen; daer bleef versleghen in dien wijch de bloeme van Vrankeryke, van Brabant, van Vlaenderen, van Artoys ende van Henegauwe. Eerst bleef daer versleghen Anthonijs van Bourgoenien, hertoghe van Brabant; Philips van Bourgoenien, grave van Nevers, ghebroederen; de hertoghe van Bar; de hertoghe van Alenchoen; Lodewijc, de heere van Ghystelle, ende de kindere van Liedekerke; Mer Heinrijc ende Mer Philips, Mer Diederijc van den Heetvelde, Mer Ymbrecht van Kestergate, ende veele meer andere groete menichte van baenraetssen, ridderen ende schiltcnapen uut Vrankeryke, uut Brabant, uut Vlaenderen ende uut Henegauwe, ende uut veele meer anderen landen, ende daer bleven oec ghevanghen groete meenichte van prin- | |
| |
chen ende eedelen lieden, ende in Inghelant ghevoerdt in vanghenessen. Als de hertoghe van Orliens ende sijn twe broeders, de grave van Angolume ende de
bastardt van Orliens, de grave de Dunoys, de grave van Vendosme, de hertoghe van Borbon, de heere van Rodscelaer, ende meer andere groete meenichte van eedelen van allen landen bedessyde 's gheberchts; ende aldus vacht te Blangy seeghe ende victorie Heinrijc van Lanchastre, coninc van Inghelandt, met vjm mannen jeghen al de bloemen van Vrankeryke, op Sente Crispijns- ende Crispiniaensdach, waer aff 't carnacioen men vinden mach in dit narvolghende vers:
franCos CrIspInI MaCtat reX angLIe bLangI.
In 't jaer Ons Heeren M. CCCC. ende xvj, doen wan de heere van Lilledam Parijs, op den xijten dach in Wedemaent, in den name van den hertoghe van Bourgoenien, ende was in Parijs zeere ghevochten, ende al dat gherekent was met den Dalfin dat was doot ghesleghen, meest up den selven xijten dach; ierst, vore 't palays van den coninc was doot ghesleghen de conestable van Vrankeryke, de grave Bernardt van Arminiac, de cardinael van Baer, de bisschop van Parijs, de bisschop van Laun, de bisschop van Evereux, de bisschop van Constans, de abdt van Sent Denijs, de abdt van Juvael, ende de cancellier van Parijs, ende met hem de ardsschebisschop van Riemen. Daer bleven up den selven sondach bet dan iiijc eedele versleghen binnen Parijs, die de heere van Lilledam met sinen Borgongioens doot slouch, ende sijn roup was: Tue tout, tue tout! Op den woensdach daer na, doen rezen op, Aleyn de Chartier, oem van den prevoest van Parijs, de heere van Rivieres, de borchgrave van Narboene, de hofmeester van den grave van Arminac, ende vele andere edele, ende qua- | |
| |
men voer de herberghe van den heere van Lyledam ende de Borgongioens worddens gheware, ende quamen tieghen, soe dat daer bleven van den Armyngacs versleghen, bet dan hondert ende lx eedele mannen, dewelke up de bastiellie gheleghen hadden van 's conincx ende 's dolfins weeghe; omtrent Alderheylighe-messe quam de hertoghe Jan van Borgoenien in Parijs, daer hem veele eeren ende weerdichheden ghedaen was. Binnen den selven jare doen quam de hertoghe Jan in Vlaenderen, ende hy trac te Calays tot den coninc Heinrijc van Inghelandt om te tracterene met hem omme pays tusschen den Inghelsschen ende de Vlaminghen, soe dat de comanschepe tusschen biede de landen mochte regneeren, ende elc vry d'een tot den anderen trecken. In 't selve jaer ende tsjaers daer naer waren in Vlanderen veele brantstichters, lieden uut alle landen van diversschen talen,
als Brabanters, Hollanders, Inghelssche ende Heynuwiers, ende sy verbarrenden veele dorpen ende steeden in Vlaenderen, als Poperinghen, Werveke, Roesselaere, Dixmude, Oudenburch, Brugghe, ende oec in anderen plaetscen, ende deze waren ghehuerdt alsoe sy verkenden, diere aff ghevanghen waren, ende daeromme ghejusticieert, van den hertoghe van Orliens, die in Inghelandt ghevanghen lach, in wraken van dat de hertoghe Jan, sinen vader, den hertoghe van Orliens te Parijs, hadde ghedaen dootslaen, want hy, die ghevanghen lach en conste hem anders niet ghewreken.
In 't jaer Ons Heeren M. CCCC ende xx omtrent den ingaene van Mey quam de hertoghe Jan van Brabandt in Bruessele, met groeter meenichten ghewapents volcs uut den Duutsschen lande, ende met hemlieden ballinghe, ende viande 's lands van Brabant, die alsdoen den hertoghe Jan hadden te beliedene, als de heere van Heinsberghe, de grave van Blankenhem, de heere van
| |
| |
Bueren, de proofst van Aken, de grave van Muers ende groete meenichte eedelre lieden van den Ryne ende van Overmaze, ende dit al by den toedoene van eenighe uut Brabandt ende van Bruessele, die den hertoghe Jan vorseidt soe gheregiert hadden, als dat hy Hollant ende Zieelandt, ende andere sloten in Brabant, uut sinen handen gheworpen hadde ende verset, ende al by den quaden regimente van desen inboernen personen, dewelke daeromme by der stadt van Bruessele, by rade ende avyze van den Ruwaert van Brabant, den grave Philips van Sempol, des vorseiden hertoghen Jans broedere, ende oec by den staten van Brabant ghebannen waren, te wetene: de heere van Assche, Willem van Assche, 's heeren broeder vorseidt, Mer Jan van Coudenberghe, Mer Everardt Tserclaes; Jan van Gremberghen, heere van A ende van Hoghestein; Cornelijs, sijn broedere; Reyneere Mours; Janne ende Robbrecht van Assche, ghebroederen; Costin van A; Jan, Heinrijc ende Willem, gehieten Cluetinc, ghebroederen; Jan Taye van Helwyte; Wouter, Jan ende Willem, gehieten Pipenpoy, ghebroederen; Jan Taye van Gaesbeke; Gheldolf van Coudenberghe, Fs Willems; Jan Tserarndts; Dieric de Loeze; Jaspar ende Melcior van Arkenen, ghebroederen; Jan van Yedeghem; Jan de Weert. Dese eedele mannen, heeren ende schiltcnapen, ende meer anderen van haren medepleghers wyperde ende spijtte zeere, dat sy aldus de someghe van hemlieden ghebannen waren, peinsden om dit met den hertoghe, haren heere, te wrekene up de steede van Bruessele, te wetene, op den grave Philips van Sempol, ende op de notable ende insetene van der vorseide steede, ende daeromme brachten sy den vorseiden hertoghe, haren heere, met hemlieden in de stede met groeter meenichten ghewapens volcs, dwelc den vorseiden Rewaert ende oec den insetenen van
| |
| |
Bruessele niet wel en ghenoughde, ende versaghen hem bedectelyke, ende berieden hem wat hem te doene stont; de raedt ghedrouch dat men 't comuyn soude doen comen ter marct, ende hemlieden versien van wapenen, alsoe sy daden, ende omtrent der middernacht men trac op 't hof van Brabandt, daer de vorseide hertoghe Jan noch by hem hadde dese vorseide heeren in sijn camere, by hem te rade, ende by den Rewaert wordden sy daer meest al ghevanghen, die daer doen waren ende beneden bracht in 't schepenen-huus, ende daer gheleyt in vanghenessen, ende de hertoghe Jan was by den Rewaert, sinen broeder, ghesekert uut sinen hove niet te vertreckene, ende daer naer trac men van herberghe te herberghen, ende men vinc alle de heeren, die met den hertoghe comen waren, ende de knechten was bevolen up haer lijf, dat sy uut hueren herberghen eenen voet niet setten en souden, mar bliven al stille bedect in huus, ende men nam hemlieden hare paerden ende al haerlieder harnassch, ende dat was al ghecomfischierdt ende verbuerdt jeghen den Rewaert van Brabandt. Dese heeren aldus ghevanghen sijnde, men leid se ter examen ende wordden ghepijnt, ende sy verkendden ende verlijdden dat sy dese Rijnssche ende Duutssche heeren ghebeden hadden, met den hertoghe Jan van Brabant in sijn steede van Bruessele te comene, om hem te helpen corrigieren eenighe die hem rebel waren; sy verkenden dat sy meenden binnen der steede van Bruessele inghenomen te hebbene de marct ende 't schepenhuus, ende Senter Claus torre, om de storme te slane ende dan te roupene: Alle tolle ende assyzen aff! om daer met donnozel commuyn aen hemlieden te treekene, ende dat sy in meeninghe waren doot te slane de notable ende de wyze van der steede, de contrarie van haerlieder upsette waren, by den welken dat sy ghebannen waren,
| |
| |
princhipalijc Mer Janne ende Mer Wouteren Van den Heetvelde, ghebroederen; Mer Wouteren Van der Noet; Der Janne de Froyere; Gheerde Pipenpoy; Janne van Dyeghem; Der Janne van Coudenberghe, achter de Halle; Janne Rolibuc, ende voort alle de gheene, die haers opstels contrarye hadden willen sijn, ende hieromme wordden een ghedeel ridderen ende eedele schiltcnapen by den Rewaert Philipse, den grave van Sempol, ende by den drye staten 's lands van Brabandt ghecondampneert te onthoefdene, ende waren corts daer naer onthoeft, om dese mueyterye ende verraedschip, ierst Mer Jan van Coudenberghe, ridder; Mer Everaert Tserclaes, ruddere; Der Heinrijc Cluetinc; Eduwaert de Hertoghe; Scockart; Heinrijc de Hertoghe; Willem van Mons; Wouter Pipenpoy; Her Jan de Leeu; Jan Tserarndts; Her Jan de Leeu; Her Jan Cluetinc; Her Willem Cluetinc; Jan de Weert; Diederijc de Loeze; Gheerlijc van Ghemert; Mer Everaert Boete ende noch meer andere, ende deese waren alle inboerne van der steede van Bruessele, maer de vremde uutlandtssche heeren, ridderen, ende schiltknapen naer dat sy eenen langhen tijt ghevanghen hadden gheleghen, soe wordden sy by den Ruwaert ende by den staten van den lande van Brabant ontsleghen, op condicie dat sy moesten sweeren ten heylighen, nemmermeer op 't dlandt van Brabant noch op de steede van Bruessele wapenen te draghene, noch viant te sine, ende hier aff moeste elc gheven seghel ende brieve; de heere van Heinsberghe en was in dit verbant niet begrepen, want hy was verzworen ende trouweloes ontgaen wech sijnder strate, boven dat hy gesekert ende ghesworen hadde ten heylighen weeder in te comene t' eenen genoemden daghe, maer hy slouch sijn trouwe ende sinen eedt voer niet, ende hy bleef wech.
De keyser Zeeghemondt cort naer dat hy keyser van
| |
| |
Roeme ghecoren was, hy sendde boden an allen heeren van Kerstenheeden, bieede an 't gheestelyke ende an 't weerlyke, dat sy souden willen comen oft uuterlic ghelaste ambassaden sendden in de steede van Pyzen, omme eendrachticheyt te makene in de heylighe kerke, ende dat scisme ende gheschil van der heyligher kerken, omme de twe pauzen, dwelke xxx jaer lanc gheduert hadde, te nieute te doene. In 't jaer Ons Heeren M. CCCC ende viij de heeren, biede gheestelijc ende weerlijc van allen conincryken comen sijnde, in de steede van Pyzen ter consilien generael, sloten ende concludeerden by ghemeenen accoerde ende by der gracien van den heylighen gheest dat men bieede de pauzen afdoen soude ende verlaten, ende de cardinalen van biede de pauzen, die daer ter concilien comen waren coren eendrachtichlijc eenen freremeneur, gehieten meester Pieter van Candie, ende hy was een groet doctor in theologyen, ende in sine consecratie was hy gehieten, Alexander de Vte van dien name. In 't jaer M. CCCC ende x, ende Alexander paus ghesijn hadde omtrent een jaer, hy wart vergheven, ende starf in de steede van Bouloingien, op den Sinxendach; de cardinalen, die doen te Bouloingien waren sy ghingen in 't conclave, ende sy coren den cardinael van Bouloingien, Baltazar de Caliga, gheboren van Napels, ende was in sine consecracie, ghenaemt Jan de xxiij van diere namen. In 't jaer Ons Heeren M. CCCC ende xiiij doen rees een groet gheruchte ende eene groete clachte van desen paus Jan, van sinen quaden regemente ende vuylen levene; dit verhoerende de keyser Zeeghemondt, hy dede houden eene generale concilie te Constans, op den Rijn, ende daer was eene inquisicie ghedaen op 's paus Jans onutte bestier ende onreynen levene, als waeromme dat wart verlaten ende afghedaen, ende was in vanghenesse gheleit, in 't castiel te
| |
| |
Schaffenhuuzen, ende de cardinalen die in de conscilie waren, die coren eenen Romeyn, cardinael, ghenaemdt Odo de Columpna, ende in sine consecracie was hy ghehieten Martin de Ve van dien name, ende hy was ghecoren, in 't jaer M. CCCC ende xvij.
In 't jaer Ons Heeren M. CCCC ende xix waren vergadert te Monstreu ou Faut-Yoene, de Dalfin, Karle van Valoys, ende Jan hertoghe van Bourgoenien, grave van Vlaenderen, etc.; ende Jan, hertoghe van Bourgoenien, daer comen sijnde te 's Dalfins ontbiedenen, op vast gheliede ende ghestadighen peys ghevesticht, by hieede ende daer op dat heylighe sacrament ontfanghen hebbende te gadre, comende deselve hertoghe Jan van Bourgoenien met zeere luttel lieden van sinen edelen, bloet van alle wapenen, als die hem gheens quaets en bemoede, wart daer in 't vorseide Monstreau up de brugghe ter presentien van den Dalfin verradelyken, daer hy vore den Dalfin knielde bloedts hovets van achtre vermordt, ende met eender haetschen 't hoevet ghecloeft van den prevoest van Parijs, Tanegwy du Chasteel, Philipse Joesken ende meer anderen, ende worpene van der brugghen neder ghelierst, ghespoert ende ghecleedt, ende daer bleef hy ligghende up den cant van den watre, op den xten dach in Septembre, ende d'incarnacion van desen hebdi in elc van desen twe versen:
IMpIe deLphIne, CVr oCCVbVIt Leo per te?
fIt Leo MaCtatVs fICtIVa paCe LIgatVs.
ende naer, dat hertoghe Jan van Bourgoengien sus deerlyken ende verradelyken vermoerdt was, soe quamen alle sine landen ende signouryen up Philipse, den grave van Charloes, sinen sone.
|
|
Auteursrechtvrij