Kronyk van Vlaenderen

[1214]

Thomas van Savoyen behuwede 't graveschip aen vrouwe Johannen, Bouwin 's keysers dochtre van Constantinoble, ende deze Thomas was de xxj^te grave

[p. 132]

van Vlaenderen, ende hy regneerde omtrent xiiij jaer. Dese Thomas was paysivelic, vredelic, ende goederthiere, ende zeere mindere met elken; hy en hadde by Johannen, sijnder gheselneden gheen kindere; zy waren omtrent xiij jaer te samen in huwelyke, ende hare quamen barrende cortsscen, waer aff dat soe staerf in 't jaer Ons Heeren M. CC. ende xliiij, omtrent Onser Vrouwendach Lichtmesse; soe staerf te Rycelle ende was begraven by Ferrante, haren iersten man, in haren cloester te Markette. Beide de graveschepen Vlaenderen en Henegauwe bedeghen op Magrieten, harer sustre, dewelke was de joncste dochtre van den keyser Bouwin; dese Magriete hadde te manne Willemme van Dampier. Nu als vrouwe Johanne ghestorven was, die van Vlaenderen besorghden Thomas van Savoyen eene somme van penninghen, ende daer met schiet hy van Vlaenderen, ende trac te sinen lande waert van Savoyen.