Kronyk van Vlaenderen

[1194]

Bouwin van Henegauwe van sijns wijfs weeghe Magriete van Elzaten 's graven Philips sustere, hy was de xviij^e grave van Vlaenderen, omtrent vier jaer; Margriete sijn wijf verlevende hem bet dan een jaer. De coninc Philips van Vrankeryke, die hadde te wive de dueghdelyke Elyzabet 's graven Philips nichte van Elzaten, sijnder suster dochtere, die soe hadde by Boudene van Henegauwe, nu grave van Vlaenderen. Dese salighe coninginne was ghestorven de wyle, dat de coninc Philips haer man was in Suryen ende te Akers; de coninc in Vrankeryke comen sijnde op den Kerstdach, soe hadde hy gheordineert eene feeste tot der welker hy ontboden hadde sijn ghenoeten, ende sijn heeren, ende oec den grave Bouwin van Henegauwe, sinen zwieer, ende de coninc sittende ter taeffelen maecte jeghen eenen yeghelyken goede blye chiere, sonder alleene jeghen den vorseiden grave Bouwin, sinen zwier, van wien dat hy altoes d'aensichte kierde, als hy hem toesprac. Bouwin wart peynsende van voerledene saken, hoe dat hy meer toe hadde gheweest Philipse van Elzaten, sinen zwaghere, dan den coninc Philips van Vrankeryke, die nochtans sijnder dochter hadde te wive, ende hieromme beduchtede hy hem quaedts, als waeromme dat hy hem heymelijc stal, uut 'sconincx palayse, sonder orlof te nemene,

[p. 111]

ende trac in Vlaenderen, ontboet sine eedele, ende al sinen raedt van Vlaenderen ende van Henegauwe, hemlieden ghevende te kennene, hoe hy uut Parijs gheschieden was, ende hoe dat hy zeere perplex ende beschaemt ware, ende waeromme dat hy beduchte dat de coninc vergramt ware, bat sinen lieden hier op om raedt ende avijs. Daer wart finalijc gesloten dat twee abdden souden trecken tot den coninc, metgaders den ardtsschen bisschop van Riemen, dat waren de abdt van Cameroen ende de abdt van Sent Amandts; mar de abdt van Cameroen soude proponeeren voer den coninc dlast, dat sy hadden van den grave Bouwin, ende dat dede hy in zulker wijs dat de coninc Philips van Vrankeryke, ende sinen raedt wel content ende ghepayt waren, ende daer was verhaelt hoe Arye, Sent Omars, dlandt van Ghysene ende van Bonen, dat in tyden voerleden Westvlaenderen hiet, soude sijn ende bliven verschieden van den lande van Vlaenderen, ende dat besitten soude Lodewijc, des conincx Philips sone, die hy hadde, by der coninginen Elizabet, Bouwens van Henegauwe dochtere. Men sendde den ardtsschen bisschop van Riemen, ende den bisschop van Atrecht tot den grave Bouwin, in Vlaenderen, om dese sticken voer oghen te legghene, ende hy wasser wel in ghevredt, ende hy trac met den vorseiden bisschoppen te Parijs, tot den coninc, ende hy dede hem manschip van Oestvlaenderen. Dese Bouwin hadde twe sonen, by Margrieten, sinen wive, Boudene van Mons ende Heinric van Eyngau, ende wordden bieede keysers van Constantinobelen ende van Grieken, d'een naer den anderen; ende sy hadden oec twe dochteren, de eerste was abdesse te Miessenen, ende de andere was de goede coninginne Elizabet, Sente Lodewijcs, coninc van Vrankeryke, groetvrauwe. Ende als Bouwin omtrent vier jaer gheregiert hadde Vlaenderen, in groeten payse, doen

[p. 112]

staerf hy, ende Margriete regierde Vlaenderen daer naer, omtrent een jaer, ende soe staerf te Brugghe, ende leeght begraven te Sent Donnaes in den noortcoer, ende de twe heersschappyen Vlaenderen ende Henegauwe quamen toe den oudste sone Bouwine van Mons, dewelke te wive hadde Marien, 's graven Heinrijcs dochtere van Sampaengien, die hy hadde by des conincx Lodewijcs de Goedertieren dochtere.