|
| |
[1127]
Willem, burggrave van Ypere ende heere van Loe regierde Vlaenderen omtrent x weeken, Bouwijn Hapkin ende de goede Karle waren sine rechtzwiers, maer Willem was een half let voerdere dan Karle, want de oude Robbrecht de Vrieze hadde twe sonen, den jonghen Robbrecht ende eenen Philips. Dese Philips hadde eene dochtere, die vrouwe was van Loe ende die was moeder van desen vorseiden Willem, ende aldus blijct dat dese Willem, met rechte soude ghesijn hebben grave van Vlaenderen. Het gheviel dat omtrent half marte Mer Servaes van Praet ende de andere edele die de burch ende meer andere plaetsen omleyt hadden, dat sy de vorseide burch ende schepenenhuus by crachte wonnen, ende dit merkende Mer Lambrecht Van Straten, ende sijn broeder de proofst Bertolf, ende haerlieder suster kindere Wintry en Ysac, by eender donkerder nacht, sy aventuerdent ende daelden van Sent Donnaskerke, in de plaetse Malberch, ende vloen behendelyke wech uut Brugghe. De proofst, die vloe te Watene, in den cloester, ende Ysaac vloe t'Arenborch, in Sent Jans abdye, ende hy gaf den cloester over alle sijn goet ende alle sijn landt, op dat hy mochte muenic sijn, ende hy wart daer innne ghecleedt, mar Lambrecht Van Straten wart buten Brugghe bekent, ghevanghen, ende in Brug- | |
| |
ghe ghebrocht voer Mer Servase Van Praet, dewelke haestelinghe ontboet Willem van Loe, ende Willem in Brugghe comen sijnde, beval dat men in midden van der burch bringhen soude eene vlieschbanc, ende dat men daer Lambrechte Van Straten soude afhouden sine twe voeten, ende sine twe handen, ende den lichame drye waerf sleepen, omtrent de burch, ende dat ghedaen, men sleeptene tot onder de galghe, ende daer was hy ghehanghen; ende bleeffer dootghesleghen boven op Sent Donnaskerke bet dan drye hondert van Bosschardts lieden, vrienden, ende maghen, ende van sinen hulperen. De gheene, die laghen noch op den steen, ende op de loeve sy saghen hoe Lambrecht ghejusticiert was, ende sunderlinghe sijn sone
Bosschaerdt Van Straten, hy seide tot sinen ghesellen: ‘Elc poghe om sijn beste; onse hoefden sijn wech, mijn oem den proofst, mijn vader es doot, alsoe ghi wet ende sacht, ende de twe starcste Wintri ende Ysaac sijn ghevloen; onse vytaillie stinct, onse broed es vuchtich, ende wy en hebben waer by levene.’ Op Sente Benedictusnacht soe waest zeer donkere, ende bet dan lxxx ghesellen, metgaders Bosscharde Van Straten, ende Mer Inghelram van Essene ghinghen ter plaetsen Malberch uute, ende ontginghen, maer niet alle, want Willem van Loe vant de someghe by Ricelle ende hy dedse setten op 't pellorin te Ricelle drye daghen lanc, achter een, sonder eten ende sonder drinken, ende men werpse, met vortten appelen, met slyke, ende met stronte, ende ten vierden daghe waren sy al naect gesliept ter galghen ende ghehanghen. Een riddere Mer Herman Yserin quam rydende van Hesdin te Arye, ende daer hoerde hy segghen dat Ysaac ware t'Arenborch, te Sent Janscloester. Hy dede Ysaac vanghen, ende zeere pinen, ende hy lyede, dat hy op den dach als de goede grave Karle doot ghesleghen was ende vermordt, hy selve
| |
| |
metter hant slouch bet dan xxv lieden doot, ende daer omme Mer Herman Yserin ontboet Willem Van Loe, te Arye, ende sende hem 't verlyden van Yzaac; Yzaac comende voer Willemme van Loe, den regent van Vlaenderen, vraghde hem wye de princhipaelste waren in de conspiracie, dat men den goeden grave Karele dooden soude. Ysac seide: ‘Ic sal u segghen de waerhede, want ic wiet wel, dat ik sterven moet, wet dat Mer Guy Van Steenvoorde, de casteleyn van Cassele, metgaders minen oem den proofst, Lambrechte, minen oem, Yngheramme van Hessen, Bosschaerde Van Straten, ende sijn broeders, ende ic, hielden onsen raedt te Ypere in Sente Martinskerke, ende daer wart by ons ghesloten, dat wy in beghintsele van der vastene, als de grave Karle alleene te Sente Donnas ter kerken comen soude, dat wine dan doot souden slaen, ende oec sinen aelmoesenier Tammarde, ende ic gaf den raedt dat men al de officiers, ende de schepenen oec doot slaen soude, dat mi jammerlyke leed es.’ Doen vraghde hem Willem Van Loe, de regent van Vlaenderen, voort, oft hy niet en wiste waer de proofst sijn oem ware. Isac seide, dat hy meende dat hy te Watene ware. Doen beval Willem van Looe, den provoest van Arye, dat men Ysacke met peerden sliepen soude, al Aryen dore, ende op alle houken van den straten naect met roeden slaen, ende daer naer bringhen ter marct, ende hem daer handen ende voeten affhauwen, ende dan binden onder sine oxcellen, ende alsoe tot onder de galge sliepen, onthoefden ende den buuc aen de galge hanghen. Willem van Looe, regent van Vlaenderen, trac van daer tot Watene, daer hy met groeter behendicheyt ghecreech den proofst van Sent Donnas, Bertolf van Straten, ende wildene voeren t'Ypere, doen badt Bertolf de proofst dat hy om penitencie te doenc, vore sine mesdact ende vore sine
| |
| |
sonden, soude moghen gaen tot Ypere baervoedt, ende lesen devotelyke sijn oracien ende ghetyden, Gode biddende, door sijn ontfarmicheyt, ende by der verdienten sijnder heyliger ende bitterer passien, die hy om alle sondaren te verlossene liedt, op den heylighen vrydach, dat hy sijnre sonden, ende sijndere mesdaet ontfarmen wilde, dwelc hem Willem consentheerde; als sy t'Ypere quamen, de proofst Bertholf const kume gestaen op sine bieene, om dat sijn voeten soe ghevleghen waren van baervoedt te gane. Willem van Looe, de regent, nam raedt hoe men den proofst verwysen soude, mar om dat hy was een kerckelic prelaet, daeromme en wilden sy van hem gheene oppenbare justicie doen van onthoefden, of van te marteliene sine leden, ende oec om dat hy hadde ix milen ghegaen baervoedt, daeromme was hy al levende ghenaydt in eenen coehuyt, ende by nachte onder sijn oxcelle eene coorde ghebonden, ende also in eenen bosch aen eenen boem ghehanghen. Ten vierden daghe men vant hem doot ende was te Sente Martins, t'Ypere ghevoerdt, ende daer begraven. Voort waren t'Ypere ghewroucht Mer Guy van Steenvoorde, ende x canoneken van Sente Martins, die mede gheweest waren, in den raedt daer ghesloten was de mordt van den goeden grave Karle, ende daeromme dede de regent van Vlaenderen, Willem van Looe, den vorseiden Mer Guy van Steenvoerde, t'Ypere onthoefden, ende de voorseide x canoneken legghen haer leven lanc, in den karkere te borre ende te brocde, daer aff dat de vive waren, ghevoerdt te Therenbourch, ende d'ander vive te Dornike. Bosschardt van Straten vloe ten Eechoute, in Brugghe, met sinen cnape, ende daer was hy omtrent vier daghe lanc, in een canonics camere; sijn cnape ende hy namen elc een slupplijs ende daden hem scheren groote crunen, ghelijc canoneken, ende ghinghen alsoe om te gane
| |
| |
te Brabant waert, ende als sy op 't veer quamen in den boodt, om over te schepene, wat dat men den boedt stac, hy en wilde niet van lande; in 't schip was een man, die Bosscharde kende, ende hy seide: ‘Sonder twiffel, wy en moghen niet van lande om de sonde van desen mordenare Bosscharde Van Straten.’ Bosschard zeere gheschoffiert van den woerden, die de man op hem sprac, hy liep wech wat dat hy mochte, ende quam ten dardden daghe te Rycelle, daer hy drye oems hadde sijnder moeder broeders, te wetene: Hughe, heere van Haluwijn, Barnardt, heere van Robays, ende Olyvier, de heere van Boudues. Hy quam ter rechter maeltijdt, ende by ghevalle daer sy alle drye ter maltijdt saten, ende Bosschardt met hemlieden etende, hy seyde hemlieden dat hy wilde trecken in Cypers, ende bat hemlieden om ghelt te lienene, op sijn landt, ende op sine huuzen. Dese heeren sendden om den bailli van Ricelle ende om den Casteleyn; de bailli quam haestelyke ende vinc Bosschaerde, ende leeddene in 't castiel, ende ontboedt Willem, den regent van Vlaenderen, dewelke comen sijnde, dede Bosscharde stellen in 't pillorijn, daer mene bewarp met alderhande vulnessen, ende ten vierden daghe was hy achter Rycelle ghesliept, ende van danen ter galghen. Daer was hy naect op een wiel ghebonden, ende sijn lichame met hueneghe bestreken, ende boven hem was ghestelt eene yserine traelgie, om dat hem de raven noch de voghelen niet picken en souden, mar dat hem de horsselen, byeden, ende vlieghen souden moghen stekene ende stralen, ende aldus sittende leefde hy vj daghen lanc. Coenraerdt sijn cnape siende dat sijn meester ghevanghen was, hy liep wech woenen in Ardenen, ende daer viel hy in eene beeke ende verdranc. Inghelram van Essene hy woende te Mens, op den Rijn, ende hy gherochte te twistene, jeghen eenen poorter van
| |
| |
Mens, wondene in de borst, soe dat hy starf, ende Mer Inghelram wart ghevanghen, ende in eenen sack ghesteken, in den Rijn gheworpen ende verdronken.
|
|
Auteursrechtvrij