[1093]
Robbrecht de Jonghe Vrieze, Robbrechs sone, was de xijte grave van Vlaenderen, hy hadde te wive Clemencien, de dochtere van den edelen grave van Bourgoenien, ende hy hadde by hare twe sonen, den vromen ridder Bouwen Hapkin, ende eenen Willem, die jonc starf, ende was te Sente Bertins begraven. Deze grave Robbrecht was te Sardenay, ende te Antiochien met Godevarde van Buyllion, daer hy veele prys ende yeeren behaelde, want hy verslouch vele princhen der Sarrazyne, als amirale ende coninghen, daer waren in die reyse versleghen wel hondert dusent ende lx dusent Sarrasinen; hy halp beclemmen Jeruzalem met Godefroite ende winnen; en in 't wederkieren uut Suryen te Vlaenderen waert, hem waert ghegeven Sent Joerijs aerm. Ter tijdt, dat hy voer in Suryen, ordinerende 't regement van Vlaenderen, in sijn absencie, stelde den proefst van Sent Donaes te sine cansellier in Vlaenderen, ende den seghel van Vlaenderen te draghene; op eenen tijdt meenende te rydene te Parijs, by den coninc, comende by Damartijn sturtte van sinen perde, ende waert daer soe ghequetst van dien valle dat hy zeere cort daer naer starf, ende wart ghevoerdt te Sente Vedast, te Atrecht, ende daer begraven op Sente Barbelen avont, in 't jaer Ons Heeren M C ende xj.
Auteursrechtvrij