Kronyk van Vlaenderen

[1071]

Bouwen van Berghen, Bouwens sone van Rycelle, hy was de viij^ten grave van Vlaenderen, men hietene den Paysivele Grave, hij en drouch noyt binnen sinen levene wapenen aen sijn lijf, hy plach in sijn gravenschip van Vlaenderen ende van Henegauwe te rydene ongewapent, met eenen spoerwaere op sijn handt; hy ordineerde dat de baillijs in Vlaenderen draghen souden in de handt eene witte gheschelde roede, in teekene van rechverdicheyden ende van justicien; nar de doot van sinen vader soe was sijn regement soe duegdelijc ende soe heerlijc, dat men in Vlaenderen noch in Henegauwe, niet en vacht, niemande en roefde, men en stal niemanne sijn goedt, noch men en hoerde niet dat iemant verslaghen wart, binnen sijnder tijdt, of vermordt wart; het en was oec niet van noede in Vlaenderen (dwelc doen ter tijdt groet was, want Sent Omars, Arije, Calays ende dland van Ghysen, Walcheren, met den lande van Aelst, ende met de vier ambachten was doen al Vlaenderen), dat ymant doren of veinsteren dorfste sluten jeghen roevers oft jeghen dieven, soe vry ende soe paisivel hilt hy sijn landt. Bouwin overmerkende de vromicheit van Robbrechte den Vriezen sinen broedere, die daghelijcs jeghen Heydene en Sarrasinen vacht, ende zeere victorieux in vele ende diversschen bataillen gheweest hadde, ende ooc hoe dat hy sinen wysen rade in sijns vaders tyden den Nieuwendijc al van Arke, drye milen varre ghedolven wart, daer by dat al Vlaenderen

[p. 22]

in eeren bleef, ende de keyser Heinric gheschoffiert, daeromme de grave Bouwin gaf Robbrechte sinen broeder Walcheren, vier ambachten ende dlandt van Aelst, dwelke toebehoerden den hertogheschepe van Lotryke, ende omme dat dese grave Bouwin van Berghen hem soe soetelyke regierde, ende alle sijn lande in payse hilt, daeromme was hy gehieten de Paisivele ende Goederthiere Grave: hy hadde te wive Rychilden, dewelke Hermans sijns rechtswiers wijf gheweest hadde, ende hy hadder kindere by ghehadt; te weten: Arnoudt de Simpele, ende Bouwin den Onnozele, daeromme waren sy verwaten van den bisschop van Cameryke, mar sy waren van den paus Leo gheabsolveert, dewelke paus was Rychildts oem, maer sy moesten verschieden sijn van bedde. De goede grave Bouwin stichtede den cloester te Hannoen, dwelke was in tyden voerleden een castieel vul roevers; hy dede 't casteel te nieute doen, ende makeder aff eenen cloester van muenken; hy regeerde Vlaenderen iij jaer ende was te Hannon begraven, in 't jaer Ons Heeren M ende lxx.