Kronyk van Vlaenderen

[1035]

Bouwen van Rycelle, Bouwens sone metten Schoene Barde; hy was de vij grave van Vlaenderen ende was ghenaemt de Goederthiere, hy regeerde xxxiij jaer, hy dede de stede van Rycelle bemueren, ende hy stichte aldaer Sente Pieters Kanezye, hy was een wijs ende een vroem man van wapenen, ende hy hadde te wive Adelyen, des conincx Robbrechts dochtere van Vrankeryke, by der welker hy hadde twe sonen, Bouwene van Mons, ende Robbrechte den Vrieze, ende drye dochteren, de eene was ghenaemt Machthilt, ende die hadde te manne Willem van Normandyen, dewelke Inghelandt metten

[p. 19]

zwerde wan, ende wart gheweldich coninc van Inghelant. Dese Bouwin ghecreech de heerschapie van Normandyen ende dat hertoghschip van Eenham, ende 't graveschip van Aelst, in prejudicien van den keyser Heinric, als waeromme de keyser dit verhoerende quam in Vlaenderen, wel met xl^m mannen, doer Henegauwe tot Sent Omars, omme den grave Bouwin te bevechtene, ende het gheviel dat Robbrecht de Vrieze, binnen dier wyle, dat de keyzer in Vlaenderen comen soude, omme te varene te Sent Omaers, ende aldaer sinen vader te bevechtene, doe wan Robbrecht dlandt van Walgheren, ende de keyser dat verhorende, dede comen uut Lotryke xx^m manne, dewelke haestelyke quamen tot der Arken, by Sent Omaers, daer de keyser gheleghen hadde bet dan vij weken, ende aldus was de keyser starc wel lx dusent mannen, ende hy meende te hebbene den Casselberch ende alsoe voort te vercrighene al Vlaenderen. Dit vernemende Robbrecht de Vrieze, hy riet sinen vader den grave Bouwin, dat men by daghe ende by nachte, soe wat dat costen soude, den Nieuwendijc souden doen maken, denwelken binnen iiij daghen en binnen iiij nachten wel iij milen verre ghedolven was, ende op eenen nacht meende de keyser Heinric Kassele te belegghene, ende daer ten Nieuwendyke quam de grave Bouwijn en sijn sone Robbrecht de Vrieze met xviiij^m mannen den keyser te ghemoete, daer viel een zeere vrieselic strijt, soe dat van skeysers volke versmorden bet dan ix dusent lieden, ende versleghen bet dan xij^m; ende de keyser Heinric overmerkende 't verlies van sinen volke, ende hoe dat de edelste van sinen heere in den Nieuwendijck alle laghen versmoerdt, werdt in hem selven geschoffiert, ende beschaemt, ende met bedructer herten vloet ende vertrac tot in 't landt van Gheldre, in de steede van Niemeghen, in sijn castiel. Dit verhoe-

[p. 20]

rende Robbrecht de Vrieze riedt achter den keyser wel voerzien met stouten ende vromen lieden van wapenen, achterhaelde den vorseiden keyser te Niemeghen, wan den castiel ende stacker 't fier in, ende de keyser Heinric vloet tot Mens op den Rijn. Dese grave Bouwijn naer de doot van den coninc Robbrecht van Vrankerijc wart ghemaect regent, midts dat sijn zwaghers sconincx kindere te jonc waren ende hy waest bet dan xviij jaer ende hy dede Bouwin sinen oudsten sone gheven te wive, dewyle dat hij regent was, Rykilt, de gravinne van Henegauwe, dewelke weduwe was van Hermanne, den grave van Berghen, daer by dat soe hadde eenen sone ghehieten Bouwijn van Rycelle; desen dedsi clerc ende cannonic maken: als Bouwijn van Rycelle doot was, doen wart Bouwijn van Berghen grave van Vlaenderen, dewelke an Richilden sinen wive behuwede 't graveschip van Henegauwe, ende omme dat Bouwijn by Rychilden hadde twe cnapeline kinderen, ende de heersschappye mochte toecomen sinen kinderen, die hy hadde by Rychilden, soe dede hy soe vele, dat Bouwijn sijn stiefsone, de cannonic, wart ghecoren bisschop van Chalons, in Champaingen, ende daer gheconfirmeerdt ende gheconsacreert. Nar dat Bouwijn van Rycelle met groeter eeren, ende met groeten payse hadde Vlaenderen gheregiert xxxiij jaer, starf hy te Rycelle ende wart begraven aldaer in Sente Pieters canesye, die hy selve ghesticht hadde, in 't jaer Ons Heeren M ende lxvij. Nar sine doot de heylighe Adelye sijn wijf was die devoete weduwe, sconincx Robbrechts dochtere van Vrankeryke, soe stichtede den cloester te Miessene, daer soe by daghe ende by nachte, in devocien ende in bedinghen Ghode van hemelryke dienende was, ende als desen cloester was vulmaect, ende de nonnen wel ghestapeleert, ende in goeder regulen ghestelt, doen dedse

[p. 21]

hare voeren in eenen horsbare te Roeme, tot den paus, ende nam van den paus de benedictie ende dat gheestelijc habijt van weduschepe, ende kierde weder in haren cloester te Miessene, daer wezende een spieghel van alder heylicheyt, ende overliedt met salicheden in 't jaer Ons Heeren M ende lxxj, ende leght begraven in haren cloester te Miessene.