[989]
Bouwyn, metten den Schoene Baerde, was een zeere schoene, edel en vroem man, starc ende onvervaert, ende hy hadde te wive Ogiven, shertoghen Ghyzelbrechts dochter van Lutsenborch; dese Ogive hadde vive edele ende moghende heeren te broederen, te weten: Adelbert, den bisschop van Mets, in Loraynen; Heynric, hertoghe in Beyeren; Frederijc, hertoghe van Loraine; Diederijc, grave van Lutsenborch; ende Ghiselbrecht den grave van Salines. Dese vorseide grave Boudin hadde by deser edelre vrouwen Boudene van Rycele, hy ordineerde eerst in Vlaenderen dat ridderschap, ende hy stelde, in steden ende in dorpen, wyse ende eerbare lieden, scepenen, ende raedsheeren, ende schoutheten, ende als hy Vlaenderen wel xlvij jaer lanc gheregiert hadde, met groeten payse onder iiij coninghen van Vrankerijke, te wetene: Lodewyke, conincx Lottarijs sone, onder den grave van Parijs Hughen Cappet, die ter croene met schalcheeden ende met quaden liste quam, ende onder den coninc Robbiert, Hughe Cappets sone, ende onder den coninc Heynric, sinen sone, ende starf als men screef Ons Heeren jaren M ende xxxv, ende was begraven in den cloester t' Sente Pieters te Gendt.
Auteursrechtvrij