Kronyk van Vlaenderen

[737]

Bosschaerdt, des forestiers Anthonijs broedere, de dardde sone van den iersten Liederyke van Lillesbuc, was een vroem ruddere van wapene; hy verwan eenen rudder, ghehieten Baraybant, de welke woende in een kastiel, dat men hiet Montgardin, ende leghet by Luevene, ende daer staet nu ter tijdt de steede van Hougarden, ende Bosschaert, nar de doot van den reuze

[p. 12]

Baraybant, besat selve dien castiel, ende willen eenighe segghen, dat nar den name van dien vorseide reuze Baraybant, dlant ghehieten es Brabant, ende dese Bosschaerdt was woenachtich te Luevene, ende hiet prinche van Luevene. Dese Bosschaert hadde eenen vromen prinche, t'eenen sone ghenaemt Esthoreyt, de welke oec was prinche van Luevene, nar sijns vaders overlyden, mar omme de vrieze van den heydenen hy vertrac uut Brabant, ende ghinc ligghen op den castiel te Haerlebeeke, nar dat de Wandelen ende de Hunen Kuelne ende Brabant ghewonnen, ende bedorven hadden. In 't jaer VIJ^c ende xxxvij Karle Martel, des cleene Puppins Angizius sone, was regent van Vrankeryke, ende alsoe visentheerde hy diverssche wilde ende bedorven landen, comende in 't foriest van Lillesbuc oft Vlaenderen, met sinen oudsten sone Puppin, ende met Gheraerde van Rossellion, quamen in 't castiel van Haerlebeke, daer de oude ende vrome patroen Estorheyt was, met sinen kinde den jonghen Liederijc, ende omme dat Estorheyt, een edel ende een vroem ruddere van wapen ghesijn hadde, in sinen jonghen daghen, daeromme bevalen Karel Martel ende Puppijn sijn sone, den jonghen Liederijc metgaders sinen vader Hestorheyt, dat foriest van Buc oft Vlaenderen te verwaerne, jeghen roevers ende mordenars, die te hanghene, te punierene, ende dlandt te suverene.