Kronyk van Vlaenderen

[639]

In 't jaer Ons Heeren VI^c ende xxxix, de forestier Liederic nar de doot van sinen zwier, den coninc Lottarijs, soe bat hy den coninc Dagobiert, sinen zwaghere, als dat hy hem senden wilde, in Vlaenderen eenighen bisschop, die de felle ongeloevighe Vlaminghen prediken soude dat kersten gheloeve, ende daeromme de coninc Dagobiert sende in Vlaenderen Sente Eloye, dewelke al Vlaenderen dore predicte op den zeekant, ende dede veele mirakelen, soe dat hy by exemplen sijns heylichs levens, ende by der gracien Gods meest bekierde al Vlaenderen ten heylighen kerstenen gheloeve. Hy woende

[p. 10]

in Brughstoc, ende was gheherbercht, daer nu Sent Amantskerke staet; hy stichtede Sente Salvatoerskerke in de eere van Onser Vrouwen, ende van Sente Wulfrande, ende hy stichte in Oudenburch Onser Vrouwenkerke, ende meer andere kerken in Vlaenderen, ende omme dat hy Vlaenderen bekierde soe es hy ons apostel, ende heeft daeromme met ons twe mesdaghen in 't jaer, ende al noch te lande waert in, soe houdt men in veele steeden Sente Loysgulde.

Es te wetene, dat Liederic hadde by Ydonea, des conincx Lottarijs dochtere, xv sonen: eerst Jozeram, die te Dornike gehanghen was, om de paendere, met den fruyte, die hy eender armer weduwen ghenomen hadde; Anthonijs, forestier van Buc, na sinen vader Liederic; Bosschaert, grave van Luevene; Baudewin, heere van Sommenoble, dat men, nu ter tijdt, Amyens heet; Aliames, heere van Noble, dwelc, nu ter tijdt, heet Atrecht; Lyoneel, heere van Vermandoys; Galerandt, heere van Nigelle; Morissis, heere van Lillesbuc, dat es nu, ter tijdt, ghenaemt Rycelle, ende van den Castielle, soe es nu ter tijdt ghemaect Sente Morissiuskerke van Rycele; Bauduwijn, heere van der Riviere, dat nu hiet Duway; Magnifier, heere van Harien; Sabedin, heere van Sichis, dat nu ter tijdt heet Sente Omaers; Monfroit, heere van Blandin, dwelc nu ter tijdt heet Ghendt; Ganimedes, heere van Brughstoc, dat nu Brugghe heet; Baudiames, heere van Haerlebeke; de jonghe Liederic bleef in eenen wijck voer Parijs versleghen van den Wandelen, ende van den Westgoten. Nota, dat dese Liederic hadde by Graciana des conincx dochter van Inghelandt, als hy jonc was eenen bastardt, gehieten Nameloen, denwelken soe Liederyke sendde, als hy omtrent x jaer houdt was, ende hy was menich jaer prinche in Neustrem, dat nu ter tijdt Normandyen heet. Als Liederijc dat felle Vlaenderlandt gheregiert hadde, by den consente van

[p. 11]

den coninc Lottarijs, den coninc Daghobert, den coninc Clodoveus, den coninc Clottariis, den coninc Diederic, den coninc Hilderic, ende binnen des conincx Diedericx tyden, die monic ghesijn hadde, hy makede orloghe jeghen den ouden Liederic, ende wart Liederic van hem verslaghen, voor de steeden van Noble, dat is Amyens, want de coninc Diederic wilde hebben Amyens ende Vermendoys, dwelc de groete Lottarijs gegeven hadde Liederyke ende sinen kinderen, die hy hadde by Ydonea, des conincx Lottarijs dochtere. Anthonijs de oudste sone van Liederyke dede sinen vader ter eerden doen in 't casteel van Ayre, in 't jaer Ons Heeren VJ^c ende lxxxvj.