De historia van den souen wysen meisteren

wo keiser Othosias hadde eenen sulueren schilt myt vyff rode rosen vnde strijdede myt deme konynghe van Egipten

[fol. 70v]

ID geschach dat de keyser Otosias ward strijdende mit deme koninge van Egipten vnde behelt den strijt he wart wedder gewundet wente in den doet. Do nu dat gheschach he merkede dat he steruen moste. Do sande he na synen eersten sone vnde sprak myn sone yk moet steruen vnde van der truwe wegen de yk to dynen broderen gehad hebbe so hebbe ik vorteret wat ik hadde, Ane den boem dar ane geue ik dy wat vnder der erden is vnde vp der erden. He dankede em Do heet he kamen den anderen sone vnde sprak yk en hebbe nycht wat ik to erue late na mynen dode dan den boem an deme geue yk dy dat holt vnde de lenghe vnde de brede vnde de dupe. He danckede em vnde nam den seghen van em. He reep daer na den iungesten sone vnde sprak, Min sone ik sterue vnde hebbe dy neen guet gelaten dat ik di nenerleye wijs mach kamen to hulpe, men na mynen dode den boem dat holt daer ane gheue ick dy wat vrucht daer ane is. De sone danckede deme vader, Daer na keerde he syk to der wand vnde starff. Do wolde de oldeste sone den boem neemen vnde recht daer tho hebben. De anderen twe sons meenden see hadden ock recht daer to vnde daer ward krych vnder en, wente een yslick sede wat he recht dar to hadde. Do sprak de iungheste sone to den anderen wy synd brodere vnde yd temet vns nycht dat wy myt een ander krygen wy schollen yd theen vor den Romeschen keiser Deme ertelle iederman sin recht vnde weme he recht geue de hebbe den boem, Id gheveel en allen woll vnde queemen vor den keyser. Een yslick seede em wad em syn vader hadde ghegheuen an dem bome an synen dode vnde begheerden dat he dar vmme spreke welkeer de recht hadde. ¶ Do de keyser

[fol. 71r]

also eer rede vernam. he sprak to deme eldesten sone du heffst dat eerste recht vortelt so heue yk an dy an, du schalst vnde most laten vnde de anderen, vnde het em laten an deme rechteren arme, dar na den anderen twen ok also. Do he dat dede do leeth he des heren licham also groet vth grauen vnde nam een been vth deme heren vnde begrouen ene wedder. vnde de keiser gheboeth do synen knechten dat se dat been leeten in des eersten sones bloet, vnde so dat been yd an syk neme so vele als yd mogelik was dat se yd denne leeden an de sunne, vnde leten yd droghe werden Do yd nu droge ward do sede he den knechten dat se yd wosschen in watere. De knechte deden also vnde van den wasschen gynk dat bloete alle aff, vnde dat been bleff in syner verwe. Dar na heet he yd legghen in des anderen sones bloet vnde heth yd ok drogen vnde wasschen, deme bene schach gelyk deme ersten Dar na heth he yd legghen in des iunghesten sones bloet vnde hete yd ock droghen vnde wasschen Do wolde dat bloet noch ny gantzlyken van deme bene komen, vnde bleeff stedes bloetuar. Do sprak de keiser dyt is de rechte sone vnde erue, wente dat bloed is van deme beene nycht gekamen. vnde de anderen twe synd nycht des heren sone Se synd bastarde vnde also bleeff den iunghesten de boem allene vnde dat volk lauede den keyser van syner groten wysheyt.

DEsse keyser is Ihesus Cristus de hadde eenen reynen gulden schylt myt v rode rosen dat ys syn reyne mynscheyt, van der reynen iuncvrouwen marien genomen, de hefft wedder den konink van Egipten gestreden, dat is wedder den duuel dat he in dusser werlde nicht ghehad hefft Dar van sprikt he de vogele hebben eer neste de deere

[fol. 71v]

eer kulen, men des minschen sone hefft nicht daer he syn houet moge hen negen, em en ys nycht gebleuen wen de boem des hilligen cruces dorch den vns ys dat ewige paradijs verdenet vnde wert iderman dar van gesund na der selen de van der vrucht gespiset wert, Men allene de vtsettisch is vnde dat is de in doet sunden is. De konink heft dre soens, de erste is gewaldich vp eerden deme sint vnderdanich de creaturen gades. De ander sone dat is de kunstenrik desser werlt de hefft de hilligen cristenheyt vth to richtende, de heft de lange dupe vnde brede, wolde god dat se yd deden, De drudde dat is een iewelk minsche de erkennet wo en got hefft geschapen vnde en verloset vnde ene to em geschicket deme mach nicht werden dat water der hovart also deme ersten sone geschach noch dat water der giricheyt, also deme anderen geschach dat verdenen dat got hefft gedaen an deme hilligen cruce Men he steet stedeliken in ener groten dankbaricheyt des vnde entfengeden in em de leue vnde maket en lustich in dogentriken werken. Desse is de rechte sone vnde dat erue schal em werden dat is dat ewighe ryke.