|
| |
wo de konninck Darius lach in sinen doet bedde vnde sede sinen dren sones wad een islick hebben scholde van gude.
DArius regnerde vnde was sere wijs, de hadde dre soens de hadde he seer leeff. Do he nu steruen scholde do gaff he den eersten sone wat he geeruet hadde van synem vader, deme anderen gaff he wat he gewunnen hadde. Deme iij gaf he dre kleynode Een vingerlin vnde een vorspan vnde een kostlik doeck, Dat vingerlin hadde de crafft we dat droch auer der hand de was iewelkeme geneme vnde
| |
| |
leeff vnde wat he bad des was he gewert, Dat vorspan hadde de crafft we yd by den herten droch wat he begeerde mogeliker dink dat wart em, de doek hadde de craft we dar vppe sath war he in der werlde ghedachte to sinde dar was he wo dicke vnde vaken he wolde Desse iij dink hadde gemaket virgilius mit syner kunst. De keyser Darius sprak min sone Ionata du byst myn iungeste sone. yk geue dy de dre kleynode Also dat du to scholen varest wijsheyt to leren vnde dyn moder de keyserinne schal se dy beholden vnde een na deme anderen geuen na deme also du eer not drofftich byst, do he dyt gespraken hadde do keerde he van em vnde starff, De soens begrouen ene eerliken. De twe bekummerden lant vnde lude na deme also en eer vader bescheyden hadde. De iungeste sone Ionata de begheerde van der moder dat vingerlin dat he to der scholen kamen mochte, De moder sprak dat vingerlin geue ik dy mine leue sone vnde lere wol vnde behode dy vor den vrouwen dat yd dy nicht genamen werde. De iunge here nam dat vyngerlin vnde toch to der scholen vnde nam an kunsten vaste to vnde vele tijd was he leeff vnde wert vnde gelauet van iedermanne vnde sechten groet loff van em. Id geschach dat he dor korte wyle eens was gegaen vp den plaen vor de stad vnde sach daer ene vrouwe to male schone vnde wol gestalt der wart he gantz holt vnde leuede myt eer na lyues lust. Do ghedachte de vrouwe van wenne mach kamen dat grote guet des de iunge here bruket vnde yk en see noch syluer noch golt vnde hefft doch wat he wyl vnde wo veel he wyl, vnde eenes mals hadde de iunghe here Ionata wol ghedrunken vnde was gantz vrolyk, Do leuede syk de vrouwe iegen em in vntruwen, vnde sprak myn leue here | |
| |
gedenke dat yk van nemande vroude noch leue en hebbe, wen van iuw vp eerden, vnde bringet my vthe deme wundere vnde sprak van weme hebbe gi dat grote guth, vnde ik en see wedder suluer noch golt by yw na der groten teringe de gy hebben myt aller hande kortewile, Dusse iunghe here en wuste syk nycht to hoden, vnde apenbarde eer de kraft des vyngerlyns wo yd so dogentrik were de hadde leeff vnde gunst yedermans. Drade sprak se, here volghet mine rath gy gaen vaken to den luden, vnde mochten dat vingerlin verlesen, vnde geuet my yd to bewaren wen gy denne willen so hebbe gy id wedder, vnde sin ok seeker dat gi id nicht verlesen. de here dede so de doren alle doen de eer truwe leggen an vrouwen vnde en gelouen vnde gaff eer dat vingerlin to bewarende Drade auer korte tijt do ward de here vnwert van yedermanne vnde nemant loet ene to hues vnde ward gantz versmaet. he wolde dat wedder keren vnde vorderde dat vyngerlyn van der schonen vrouwen. Se sprak gerne vnde gynk in de kameren to eener laden vnde heuet an to schryende O we deue synd hijr in ghewest vnde hebben my de lade vp gebraken, vnde hebben my dat vyngerlin genamen Ionata de here, do he dat vernam do verschrak alle sine krafft vnde he begunde seer to wenende wente he en hadde nycht dar vth he wol vnde eerlik mochte leuen als sin ghewonheyt was, vnde hoeff syk vp vnde quam tho syner moder de keyserinne vnde apenbaerde yd eer wo he dat vyngherlin hadde verloren Do se dat vernam do waerd se gantz seer bedrouet vnde sprak, leue sone yk warnede dy dat du dy hoddest vor den vrouwen vnde en nicht en getruwedest vnde en dyne hemelicheyt apenbaerdest, De moder ghewan medeliden myt deme sone vnde gaff em dat | |
| |
vorspan vnde sprak hebbe dat vnde beware dat wente verlustu dat so komestu in noet vnde in armoed. He nam dat vorspan vnde quam wedder to der schole. De schone vrouwe beyeghende em vnder deme dore vnde vntfinck ene schone, vnde wat he gedachte dat hadde he vnde was leff vnde wert aller werlt De bose vrouwe begunde echts to verwunderende van weme he dat grote guet hadde vnde myt guder reede ghynk se echts to em dat he eer dat seede. Do sprak he to eer yk en do es nycht, wente ick sede dy van den vyngerlin dat hebbe ik verloren. Se sprak leue here yd mochte wol eenen wijsen ghescheen, we kan syck vor bosen luden bewaren. Men dat ik des nu wijs byn geworden so wolde yk dat nu wol beth besorghen dat my des gheliken nycht meer en ghesche. hijr van myn leue here Ionata so dencket dat ghy my vp vntholden vnde in allen saken min trost syn vp eerden vnde verswyghen my nycht iuwe hemelicheyt, daer by so merke yck iuwe leue vnde truwe yeghen my. He dede auer so de doren pleghen to doen vnde louede eer gude rede, vnde sprak tho eer myn vader ghaff my an deme dode een vorspan wen ik dat vp deme herten draghe wat yk gedenke wat yk gherne hadde dat hebbe yk nu van stundt. Drade sprack se tho em O leue here Ionata sy ghy denne nycht wijssz dat ghy enes daghes mochthen dencken dat gy een iaer ghenoch hadden vnde gheuen yd my tho bewaren wenneer dat ghy wyllen so hebde ghy yd wedder. Ick schal yd wol besorghen des weset seeker. De here leeth syk echts auer reden vnde gaff der vrouwen dat vorspan vnde swor enen eed wedder tho gheuende wen he wolde. ¶ Drade daer na echts auer eene korte tijdt, do he vnweerd | |
| |
ward vnde arm. do vorderde he dat vorspan van eer, se sprak se hadde yd verloren wente yd were eer gestolen. He vorschrak gantz seer vnde sprack, bin yk nicht een doer edder vnsinnich dat ik my hadde gehot de se myt deme vyngerlin vnrecht dede, vnde hoff sik vp vnde voer to der keyserinnen syner moder vnde sede eer gantzliken alle sake wo yd em gegaen was Se ward van gantzen herten bedrouet vnde sprak O myn sone worumme hestu truwe gelecht an ene bose vrouwe du byst een doer vor alle der werlt, leere wysheyt vort an offte du wult, wente yk en hebbe dy nicht meer tho gheeuende, wente dat kostlike dock dat dy dyn vader hefft ghegeuen vorlustu dat so en deruestu nycht meer to my kamen. He nam dat dock vnde vor auer to der scholen. Do nu syn bole syn tokumpst vernam, do ward se vro vnde quam drade vnde entfenck ene eerliken vnde schone. he bredede vth dat kostlike doek vnde sprack dyt kostlyke doeck gaff my ok myn vader, sitte hijr to my vp see dede yd drade. do gedachte he nu wolde got dat wy also verne weren an der stede daer ny keyn minsche hen en quam, drade weren se an eenen ende der werlt in eneme wolde de was verne van den luden. Do dat wyff dat sach drade so schreyede se, O here wo sin wy hijr gekamen he sprack, wete dat wy an een ende der werlt syn vnde yk laue dat gade dat yk dy hijr wyl tho ryten laten du en geuest my denne seekericheyt dat my min vingerlin vnde vorspan wedder werde, Se sprak leue here weset my genedich vnde voret my wedder hen gy synd des seeker dat ik yd iuw wedder an der steede antworde, Do ghelouede he eer echts de reede vnde voerde se wedder to lande, do se daer quemen do sprack se tho em wo synd wy heer gekamen. He | |
| |
sprak des dokes crafft is also, we daer vppe syttet wor he denne henne gedencket daer he gherne were so ys he drade daer, vnde des werstu ghewar vnde ghedachte drade were wy dar wy eerst weren an deme ende der werlde by deme wolde drade quemen se daer. Do se daer quemen do quam Ionata vnde sprack tho eer laet my in dyneme schote in dusseme wolde rouwen dat dede se do he entsleep do toch se den doek sachte vth em vnde sath daer vp vnde gedachte do were ik to huus drade was se dar Ionata de bleeff in deme wolde elendichliken lyggen vnde sleep. Do he nu entwakede vnde sach wo yd em ghegaen was, do wenede he van grunde synes herten vnde sprak here god wo schal yd my nu gaen in desser wostenye, yk en see nycht wen de voghele in der lucht vnde de eerde vnde den hemmel. He stunt vp vnde tekende syk mit deme tekene des hilligen Cruces vnde vand enen wech den gynk he de nacht vnde den dach. Do quam he by een ghroet water dorch dat water moste he ghaen. Do he dorch dat water quam do vrat em dat water dat vleysch van den benen wente vpp de knaken, des waerd he sere bedrouet vnde gynk vort an. Do vant he enen boem myt vruchten vnde en hungerde gantz seer do brack he der vrucht van deme bome vnde ath do wart he vthsettisch. He schrey vp to gade vnde wart elendichliken seer bedrouet vnde nam der vrucht vnde des waters vnde gynk vort an vnde quam in een ander water dar gynck he ok dorch vnde ward wedder reyne vnde gesund an synen benen. He ghynck vort an vnde vand eenen anderen boem myt vruchten der ath he ok Do wart he wedder gesunt vnde schone vnde reyne an sinen lyue. He nam ok des waters vnde vruchte to em | |
| |
Daer na auer lanck van veerne sach he ene schone borch, to der kerde he syk vaste. do he drade dar by quam, do quemen em twe iungelinge entyegen vnde spreken to em, we bistu edder wat kanstu. he sprak yk byn een gud arste. Se spreken kundestu so veele de konynk vp der borch is vtsettisch mochtestu deme helpen he geue dy groet gud vnde gaue. he sprak ya seker, Se spreeken bedenke dy wol mannygher hefft syk des konynges an genamen vnde daer vor vth gegeuen vnde verloes syn houet dar vmme. he sprak hebbet daer nenen twyuel an, yk wyl em wol helpen, See vorden ene to den konynk vnde de lach vthsettisch an synen bedde, de waerd vro van syner tokumpst. he nam der lesten vruch vnde gaff se em to ethende. he ward an der stede gesunt, vnde woschen mit den eersten watere, drade wossz ene vleysch in alle synen leden, De konynk gaff em groet gud vnde helt ene eerliken vnde schone by em. Ionata gink alle daghe by deme mere spaceren vnde warde offte neen schyp van sinen lande en queme dat he mochte wedder to lande kamen. Id geschach enes dages dat een schyp quam vthe der stadt dar he to der scholen hadde gewest, vnde quam myt deme schypper auer een dat se en wedder vorden in de stad. he nam orlof van deme koninghe, De konynk eerde en myt veel edelre gesteente vnde kleynoden. he sath in dat schip vnde quam in de stad dar he to scholen hadde ghewest, nemen bekande en, Syn bole was de rykeste in der stad van der kleynoder weghen. men see was mannych iaer crank wente in den doet. Drade quam dat geruchte in de stad wo so een grot meyster van artzedye were kamen. De vrouwe sande em drade baden dat he to eer queme. he quam to eer vnde he | |
| |
bekanden se wol men se bekande en nicht. He sprack vrouwe myn artzedye helpet iw nycht ghy bichten den bytterlyken vnde hebbe ghy vnrecht guet dat geuet wedder. De vruwe begunde vor iderman to spreken wo se em de kleynoder hadde aff ghenamen vnde aff gedrogen vnde wo se alle dre legen in erer kisten besloten vnde hete em de slotel geuen. He gink hen vnde ward van herten vervrouwet. Do ghynk he vnde gaff eer der eersten vrucht to eethende. Do ward se drade vthsettisch vnde bestreek see mit den eersten water dar van veel eer dat vleisch van den knaken vnde se starff drade. Ionata nam syne kleynoder vnde voer tho syner moder vnde sede eer alle dynk vnde sake, vnde laueden do ghade dat he em hadde geholpen. vnde do leuede he vnde sin moder etlike iaer daer na storuen se in den vreden des almechtigen gades
DEsse koninck vaste wijssz is vnse leue here Ihesus cristus. de koninginne de moder der hillighen Crystenheyt. De dree sone dat syn de ryken vnde de ghewaldighen dusser werlt. De anderen dat sint de wijsen vnde de kunstigen dusser werlt, De wijsheyt een del desser werlt de doch een dorheyt vor deme almechtyghen gade ys vnde een auer gheuen vnde wyllen mer syn wen se synd. By deme drudden sone vorsteet men de guden Cristen desser tijd de god ewichliken leeff hefft gehad. Desse konynk is vnse leue here Ihesus cristus de hefft em dre kleynode ghegeuen. Dat eerste een vyngerlin des hilligen ghelouen. Tho deme anderen male een vorspan syner ghenade vnde gudes ghetruwen. ¶ Tho deme drudden male een doeck | |
| |
ryker leue we dar hefft dat vyngerlin rechtes gelouen de hefft den gunst gades vnde der mynschen, als ihesus sprikt in deme ewanghelio, hebbe ghy louen so groet als een senepskorn spreket to deme berge heue by vnde valle in dat meer. Id gheschach, merke wo krefftich dat vingerlin is, hestu dat vorspan der gude gades vnde wat du denne begerest dat wert di Hyr van so sprikt Ihesus biddet so werde gy getwidet, soket so vynde gy. kloppet so deyt me vp. hefstu godlike leue wor du wult dar bistu, de sele is ewich wente se leuet van deme se dat leuent hefft. men desse truwe vorleset vake de mynsche in der scholen desser werlt als van den vrouwen lyffliker bekoringhe vnde giricheyt des herten. Dyt gheschut wen me in doet sunde vellet, vnde dar inne rouwet vnde nicht enwaket. Wen du den entwakest so merke wor den de dock der godliker leue sy hen gekamen hebbe leede, gedencke wat du verloren hest mit der sunde hebbe leet vnde rouwe, vnde tekene dy mit deme tekene des hilligen Cruces. Bedenke wat dy god verleent vnde geleeden hefft. he gink dor dat water der scharpheit Dencke vnde besynne dat wy dorch groet lyden moten to gade kamen, nim mit Ionata in der wostenie des waters rechte rouwe. Nym dy hen dat vleysch dat is alle lifflike lust. Dencke dat du de vrucht hest gegeten, dar van du vor gade byst vthsettysch van der doet sunde wegen. hebbe we vnde leede dar vmme nim dat angedenken in dyn herte vnde schut den scharpen rouwen strael. In deme anderen ghedenken kere to deme anderen watere dat is rechte lutter bycht vnde leue. De andere vrucht dat is de vrucht rechter ruwe vnde leet vmme alle dat du ye wedder god hefst gedaen vnde hebbe den willen yd nicht meer to donde | |
| |
vnde vlee de orsake der sunde. so werstu wedder reyne, machstu de bekoringhe lyffliker lust myt ruwen vordriuen, so gyff dy in de walt gades krafft vnde getruwe deme almechtigen gade dat he dy sterke, hebbe alle wege water by dy ofte de din konink queme dat is dyneme euene mynschen vthsettysch. Helpet em myt deme watere der ruwe vnde rade em to rechter bychte. Dencke wo groet dat is de sine sele offert deme de dorch em gestoruen is dat is vele meer of du gade alle dusse werlt gheuest offte se dyn were. De twe de dy to deme konninge schollen voren dat is gades betrachten vnde gades vruchten dat der ewyger vordomnisse vnde pyne neen ende en is van den keret syk de mynsche to den guden, vorget dusses scheepes nicht de Ionata dem mynschen voren to ewyger salicheit. Men du most dat bose wyff to vorne doden, dat is dat vleysch vnde de bekorynge des lyues. So wert dy wedder ghegheuen dat [vyn]gerlin des rechten louen. Item dat vorspan [der ge]nade gades vnde dan de doek rechter leue [in god.] Dar mede kerestu denne to der konnigynne [steef] moder dat is de hillige Cristenheyt. In de[r gesel]schop verdeenstu dat ewyghe leuent. D[at gunne] vns de vader een here aller heren vnde e[en konyngk] aller konynghe, In hemmel vnde in ee[rden] vnde de hillighe gheest vnde een in der g[otliker leue wen]te lyff vnde sele kumpt van em A[MEN]
Et sic est finis
|
|
Auteursrechtvrij