De historia van den souen wysen meisteren

¶ wo Groyde sloch dre slege vor des keysers pallaes

ID was een keyser tho Rome de dede een teeken we daer was de synes deenstes begheerde de scholde dre sleghe doen an dat pallas daer by men verstunde dat he deme keyser denen wolde, Des was to rome een arm man de heeth Groyde, do he de gesette horde he gedachte du byst een arm man mochtestu deme keyser denen id were dy beter wen dusse armoet vnde gink vnde dede iij slege an dat pallas, de dorwechtere merkeden ene drade vnde leeten en in, Do quam he vor den keyser vnde vel vp sine knee. de keyser sprak wat he begerde. he sprak ik kan ses denste wol vtrichten De erste ik kan des heren lif nacht vnde dach behoden

[fol. 56r]

Syn bedde wol bereyden spyse wol vor setten syne vote wol waschen. De ander deenst yk kan wol waken so ander lude slapen, vnde slapen wen ander lude waken. De drudde denst yk kan wol guden drank erkennen vnde wol vnderscheyt gheuen. De veerde deenst yk kan wol lude laden na den eeren des de se ladet. De veffste deenst yk kan wol vuur maken ane roeck. To dem sesten male so kan yk de lude wol voren to den hilligen landen, dat se ghesund dar vnde hijr wedder komen. De keyser sprak dat synt denste de my wol beuallen, du schalt by my blyuen vnde den ersten deenst versoken, vnde heth en dat he sines lyues waren scholde Groyde warde dat myt vlijt. He bereyde deme keyser dat bedde alle dage vnde wosch em syne vote. Des nachtes lach he vor der kameren vnde was gewapent, vnde hadde een wol bellende hundeken by em offte he van vngeschycht slepe dat yd ene weckede, offte yemant an den keyser mochte vreuelen, He vullenbrochte den deenst dat iar so louelyk dat he ward van deme keysere vaste gelauet Do dat iar vmme quam, he makede em to synen marschalke vnde versochte ene wo vorsychtich dat hee were, wente he sprack he konde waken wen ander lude slepen vnde slapen wen ander lude waken Groyde de arbeyde den sommer vnde besorgede alle saken de dar notrofftich weren. Do nu de wynter quam vnde de andere lude na myddernacht vp stunden vnde arbeydeden so sleep he vnde rouwede Also vullenbrochte he den anderen deenst vnde hadde den wol vtgherichtet. Des wart de keyser vro vnde sprak to synen schenken, nym minen kop vnde du must wyn vnde etyck vnder een ander vormengen do dat gheschach men both em to drynken offte he dat ok mochte bewaren

[fol. 56v]

Groyde do he drank, do sprak he yd is guth vnde was gud vnde wert gud dat is de etick was gud ghewest, do de keyser de wysheyt sach. He sprak yk bidde dy var in myn ryke vnde lade my lude na deme also du sprekest, du kunst lude laden na deme also yd deme eerlike sy de se ladet. He sprak here gerne, Nu was yd vp de wynachten Groyde vor dorch dat koninkrike vnde alle de des keysers vyent weren de loet he. Do se quemen vnde den keyser sach vnde yd syne vyende weren, he ward vaste beweget vnde redede myt em wat he dar mede meende Groyde sprak wen iuwe vrunt kamen so syn se alle wege wylkame vnde so budet me ene gud dat is dessen ny ghescheen. Ik hebbe se dar vmme geladen dat dor dusse werscop iuwe viande werden iuwe vrunt, vnde dat geschach ok also, vnde de keyser wart vaste vro vnde sprak got sy gelauet dat mine vyande mine vrunde sin geworden. Dar na het he en dat he den vefften deenst scholde beweren, Groyde nam holt vnde dorrede dat in der sunnen vnde makede een vuer ane roeck so groet dat syk de keyser vnde alle gesynde daer by wermeden, Dar sprak de keiser nu vullenbringe den lesten deenst so schal ik dy gemogelichliken eren vnde grote gaue geuen. He sprak here seet de wyl mit mi varen ik schal se wol besorgen. Do dat vele manne vnde vrouwen vernemen se beredden syk in dat hilge land Do se nu quemen vp dat meer Groyde sprak see gy nicht in deme mere dat ik see. Se spreken neen. He sprak se gy nicht enen hogen berch in deme mere. se spreken ia men wy en weten nicht wat gy dar mede meenen. Do sprak he in deme berghe is een voghel steedes in enen neste vnde hefft seuen eygere by em Also lange nu de vogel in deme neste is so hefft he

[fol. 57r]

de natur dat dat meer stille is vnde men seeker daer vppe vert wen edder de vogel vth deme neste vluget so wodet dat meer vnde verdrynken alle de dar vppe synd. De lude spreken, Leue here wo moghe wy nu weten offte de voghel in deme neste sy edder nicht. Do sprak he tho en, he en kummet nycht van deme neste den van eener sake wegen. Id ys een ander vogel de is des vogels vyent vnde arbeydet syk nacht vnde dach daer na wo he em dat nest mochte verstoren myt den eygheren vnde wen dat geschuut dat de voghel syne eyghere vorderuet hefft so vlughet he van torne vth deme neste vnde dat meer wert bedrouet dat daer nemant vppe varen en mach Se spreeken leue here wo schal men em doen dat de voghel de des vighent is nicht en kame to deme neste. He sprak yd is nicht vp eerden noch vnder deme hemmele dat de vogel meer vlut wen eenes reynen lemmekins bloet, dar nemet me enes lemmekins bloet vnde besprenghet dat nest buten vnde bynnen daer mede, de wyle denne een drape dar inne is so en nalet he deme neste nicht vnde moghen seeker varen in dat hillighe land. De lude deden id vnde se quemen ghesund vnde starck wol vth deme hyllighen lande Do de keyser dat sach do eerde he en grotlick vnde gaff em wat he wolde

DEsse keyser is god de vader de hefft ghesat we dre sleeghe sleyt an de doer dat is vasten beeden almissen gheuen de mach sy deener wesen. Groyde de arme is een iewelik minsche de arm vnde bloet in de werlt gekamen is de sleit an de doer vnde begert des hilgen sacramentes Des lauet een yewelick cristen mynsche ses deenste

[fol. 57v]

gode dem heren. De eerste ys to behuden den lyff vnses heren Ihesu Crysti in der wyse also Groyde de wapende syck, also wapende dy myt doghentriken werken dat du wedder staen moghest deme bosen gheeste, vnde in dyn herte neene danken der sunde He hadde een hundeken wol bellende by em dat ys ene reyne vornufft de alle tijd bellet wedder de sunde, hijr vor schalstu dy hodden dat du nycht bouwest in de helle, He behodde ok des heren bedde vnde helt ene suuerlik, dat bedde ys dyn herte dat holt reyne wente god wyl daer inne rouwen, wasche ok de vote dat don mit rechter truwe vnde bycht. De andere deenst ys dat wy hebben ghelauet to wakende wen ander lude slapen, wy schollen waken in guden werken so de sundere slapen vnde rosten in de sunde, waket sprekt got wente gy weten noch dach, noch nacht, noch stunde der to kumst des heren stad vp van den dode. De drudde deenst yk kan wol guden drank erkennen, dat is de drank der hilligen martere van deme vnse here sprak, moge gy drynken den kelk den yk drinken wyl, yd ys gewest hijr etijk, men in ewichheyt lust vnde vroude ane ende Drink vnde lere erkennen wat sy rechte rouwe, vnde schenke den getruwen god. He sprak to der heydinne gyff my to drinkende, he reep an den Cruce my dorstet O leue here volge na eenen rechten to keer des sunders van des weghen du lydest De veerde deenst is laden de lude na des heren eere, dat ys vlijt vnde eernste, wo een yewelyk mynsche kame to deme almechtyghen gade, dat laden do myt guden bylde vnde lere myt guden worden vnde werken, Gedenke daer an wo kostlyck dat ys offte du eenen mynschen tho ghade machst laden den goth so kostlyk hefft verloset, dat

[fol. 58r]

offer is gade genemer dan alle dusse werlt. De veffte deenst ik kan maken vuer ane roek, dat vur in der gotliker leue roek alles nydes vnde tornes iegen dynen euenen mynschen vnde tekenst dy mit worden anders wen du in deme herten meenest, Van deme sprikt vnse here, Ik byn kamen also een vur in dat eertrike tho senden vnde wyl dat verbernen, dat ys in des mynschen herten. De seste deenst is de wech to deme hilligen lande to kamende dorch dat mer desser werlt, in deme is een groet berch dat is des mynschen lyff to samende gelecht vnde den veer elementen water vuer lycht vnde eerde. In deme berghe is een nest dat is des minschen herte in der dope. alle de wyle dat nest myt den seuen eygeren is dat ys myt den seuen werken der barmherticheyt gades van deme vnreynen voghele deme duuele werd vnreyne ghemaket so wert de mynsche seeker, Wert auer dat nest dynes herten vorvnreyniget myt doetsunden so mach neemant blyuen, wente du gyffst dy in de ewyghe vordomnysse vnde in de ghewalt des leydighen duuels.