De historia van den souen wysen meisteren

Wo de ridder Iulianus iaghede vnde sach een herte dat kerde sik vmme vnde sprack em to

ID was een ridder de heeth Iulianus de vermorde vader vnde moder vnweetende. ¶ Id gheschach enes daghes dat he was vp enen ieghede vnde iaghede een herte. Also he dat iaghede so kerede syk dat herte vmme ieghen Iulianum vnde sprack tho em. Du yaghest my vth dat leeuent de vermorden wert syn vader vnde moder. Do de ridder Iulianus de rede horde wo dat he vader vnde moder scholde

[fol. 58v]

doden do verschrak he dat he van alle sinen sinnen quam vnde vp dat he daer vor wolde syn behot, so gynck he van alleme dat he hadde vnde vor in een veerne konnynkrike hemelyken dat noch syn vader noch moder daer van en wuste, vnde quam to enen heren deme deende he also wol in schympe vnde in eernste, vnde in strijde dat hee ene makede tho enen heeren auer ander heren, vnde gaff em daer na eene vrouwe de hadde vele stede vnde slote, vnde gudes ghenoch de nam he to der Ee. Syn vader vnde syn moder weren ane maten sere bedrouet vnde voren dorch alle land offt iemant van em wuste to segghen Dat gheschach auer lanck dat se queemen to deme kasteel dar syn vrouwe was men he was nycht dar ynne. Do de vrouwe dat vornam dat se eres mannes vader vnde moder weren, do entfenk se se eerlyken vnde leeffliken, wente he hadde eer vake gesecht wo em na en yamerde, vnde em tho leeue so leede se see beyde in eres mannes bedde vnde se lach anders wor vnde dat gheschach dat de vrouwe tho der kerken gynck De wyle se in der kerken was quam eer man Iulianus rijden vnde he ghynck in de kamere vnde meende de vrouwe in der kamere tho vinden. do he nu sach de vrouwen vnde den man in synen bedde lygghen. Do meende he syn vrouwe hadde vnrecht gedaen vnde lege by eenen anderen manne vnde toch vth sin sweert vnde dode se beyde. Id geschach dat he bedrouet vth deme huse gynk vnde syne vrouwe beyegende em vth der kerken, he nam des wunder, vnde se vntfenck ene leeffliken, He sprak we sint de an vnseme bedde lyggen Se sprak yd ys dyn vader vnde moder see hebben dy mannych iaer ghesocht. Do he dat horde do quam he van leyde van syk suluest

[fol. 59r]

vnde beswogede vnde was gantz van synen synnen gekamen, vnde also he to syk suluen quam so ward he bitterliken seer wenende vnde sprak O yk arme ellende man, wo hebbe yk so grot ouel gedaen dat ik mynen leuen vader vnde moder vermordet hebbe, Do ward des hertes wort war Iulianus sprak to syner vruwen, myn herte leue vrouwe tornet iw nycht yk wil nummer meer gerouwen wente ik merke dat got mine ruwe vnde myn leet vp nimpt. De vrouwe sprak min herte leue Iuliane des wil god nicht dat ik dy wyl verlaten, byn ik in leue by iw gewest so wil ick in leyde ok by iw wesen yk en late iw ane my nummer hen theen. Se kerden beyde in dat ellende vnde quemen by een grot water, dar buweden se een spytael vnde deneden gade myt ghroten vlyte, vnde alle de auer dat water mosten de herbergeden se vnde hulpen en auer dat water. Na langer tijd schach id eens des nachtes in deme wyntere vmme mydder nacht so horde he eene stimme ellendichliken schryende Iuliane stant vp vnde helpet my dorch de eere gades auer dat water He stunt vp vnde voer auer do vant he eenen vthsettischen mynschen de was by na erfroren, He vurde en in dat hues vnde makede een vur vnde hadde ene gerne verwermet men yd en wolde nicht helpen. Do nam he en vnde lede en an syn egen bedde vnde deckede en myt vlite wol, Auer eene kleyne stunde do erscheen de cranke schone mit enen groten lichte vnde voer do tho hemmele vnde apenbarde Iuliano vnde sprack to em de barmhertighe god hefft dyn ruwe vp genamen vnde dat he em drade na scholde varen to der ewigen salicheyt dat geschach em dar na vnde syner vrouwen in korten dagen

[fol. 59v]

DEsse ridder ys een iewelik Cristen prelate de schal steedelyken stryden wedder de werlt, den duuel vnde dat lyff vnde dat schal iaghen wo he den minschen tho gade bringet, Den herte he na iaghede is Ihesus cristus de sede em dat he vader vnde moder scholde laten vnde em na volghen gar in een verne land dat ys van der werlt kere dy verne vnde dene ghade so wert dy ene getruwe vrouwe ghegeuen dat ys gades gnade kumpt in dy als een lijffliken vrunt se en leth dy nicht auer reden. Dode alle sunde in deme bede der vornuft mit rechter rouwe ¶ In der konynghe boke steyt van Absolon deme schonen de was na sines vader dode vnde in eenen stryde henk he an den hare an eenre elre. Ioab stak dre gleuien in em vnde verderuede ene also De elre is lijfflike begeerthe dat haer lijfflike lust Ioab de duuel steckt in em dre gleuien bose ghedanken, bose werke, bose ghewonheyt myt den vorderuet he vele lude vnde an deme ende iij harde ordel de torn gades, de siner barmherticheyt vorghet vnde verlust de hemmelsche vroude vnde selschop der moder gades alle enghele alle hilligen, men de ewige vordomnisse wert dy de du hefst vordeent. Hoede dy dat du an der elre nycht en behenghest dat dy Ioab de duuel nycht en verderue. Legghe god in dat bedde dynes herten vnde besytte dat ewighe leuent myt em ane ende dyne leue legge an em vnde denke war vmme he dy geschapen hefft dat du ene warafftighen erkennest na deme bekennen em leeff hebbest van ganseme herten vnde myt em besyttest in deme trone sines vaders de ewighe vroude ane ende.