De historia van den souen wysen meisteren

wo eene hadde twe vrouwen gevneert vnde ward gebrocht vor gerichte vnde de vrouwen weren iegenwardych

ID geschach dat een in ener nacht an twen vruwen freuelde vnde se vneerde De ene wolde ene hebben to der Ee de ander wolde hebben dat he storue. He wart gevangen vnde vor gherichte gebrocht. De vrouwen begunden to klagen. De eerste sprak na der ghesette so begheere yck dat hee sterue. ¶ De ander sprack

[fol. 46v]

na der gesette so begere yk vnde wyl en nemen to der Ee wente myn beth mylder is wen din, vnde ok de gesette dat wettet, so getruwe ik wol ik hebbe en by den leuende. De keyser gaff der eenen den man vnde also behelt se em dat leuent

DEsse keyser is gewest Ihesus cristus vnse beholder de de gesette gemaket hefft De sunder vneret twe vrouwen, dat is de barmherticheyt gades vnde de gerechtichheyt gades, de syn beyde gades dochtere, De sunder wert gheropen vor den richter so syck lyff vnde sele van eenander scheydet, De eene vrouwe de gerechticheyt wyll en doet hebben, men de ander vrouwe ys de barmherticheyt de secht van bycht vnde van ruwe vnde leeth vmme syne sunde hefft gehat in der tijd der genaden eer de mynsche starff, Also wart he der barmherticheyt gegheuen Gedencke by dusseme bychten vnde bewenen de sunde vnde hebbe rechte ruwe

ID was een konnink tho Rome, in den tijden waert een Iunghlink van den roueren vp deme mere ghevanghen, de schreeff vth der vencknisse synen vader to huus dat he en verlosede, De vader en wolde id nicht doen, vnde also lach he langhe gevangen. Id geschach dat de, de ene gevanghen hadde de hadde ene tuchtige dochter vnde wol gestalt, vnde se was wol by twyntich iaren olt, De quam vake to den kerkener vnde sach den ghevanghen vnde troste en, he begunde alle tijd to suchten mit yamer.