De historia van den souen wysen meisteren

wo twe riddere weren de ene was arm de ander was ryke vnde des ryken ridderen sone quam synen vedderen to hulpe.

TYtus de keyser regneerde vnde makede syneme ryke een gesette by deme leuende enes ysliken mynschen, dat de kynder vader vnde moder an der noet scholden spysen vnde ene tho hulpe kamen. ¶ Id gheschach dat twe broder weeren van eenen vader ghekamen de ene broder was ryke vnde de ander was arm. De ryke broder hadde enen sone, de sone quam synes vader broder to hulpe in syner noet vnde en leeth ene neenen kummer hebben. Unde de vader verdreeff

[fol. 45v]

en dar vmme vnde verstet ene van syner geselschop, Dat geschach wedder vnde syn vader waerd arm vnde syn vedder ward ryke, vnde de nam den iungelink wedder to em de eme eerst hadde geholpen in siner noet vnde eruede ene to enen eruen. Des halp de knappe wedder deme vader myt sines vedderen gude, also he deme vedderen vor hadde gedaen van des vaders gude. De vedder straffede ene dar vmme vnde meende en van syk to slande. Do sprak de knappe vth deme ik dy wol hebbe gheuallen vth deme schal yk dy ock nicht ouel geuallen. mer sprack he wedder nemant schal gestraffet werden de de gesette ervullet Gotlike vnde keyserlike gesette de seggen dat de kynder vader vnde moder in eer noet schollen helpen

DE twe brodere ys gades son vnde de werlt De son god na der gebort, de werlt na deme also se gheschapen is Twischen den twen is auer grote dwelinghe. Also we des eenen vrund is de moet des anderen vynd syn. Sunte pauwel sprikt we by desser werlt wyl genoch doen de moet gades vynd syn, Wultu gades kynd wesen so spise de werlt nicht mit eren werken mit hovart giricheyt, vnkuscheyt, men kere dy to diner armen sele mit den werken der barmherticheyt, Gedencke dat hylge scryfft de scriuet vorbarme dy auer dyn eyghene sele.

¶ wo de keiser leeth ene vrouwe werpen van enen hogen bergghe

ID regneerde een keyser to Rome de dede een ghesette welke vrouwe eer Ee breke de scholde me van eenen hogen berge hijr nedder werpen to dode, Dat geschach dat me ene vrouwe hijr aff warp vnde starff

[fol. 46r]

leet an eer to braken wart, men vurde se vor dat gerichte. De richter sach dat se nycht doet en was. He heet se anderwerff doden. Do sprak de vruwe hete gy my anderwerue doden so do gy wedder de gesette. De gesette seggen so dat nemant tweuoldich vmme ene sake schal gebotet werden. Hefft my god vnde syne genade gehulpen, so duncket my dat nemant scholde anderwerff richten. De richter sprak du heffst dy wol vorantwordet ga hen vnde sundige nicht meer

DEsse keyser is god suluen, he hefft gesettet wen du tho deme eersten in dodlyke sunde gheyst vnde de Ee brekest vnde de truwe so du in der dope ghelauet hest, so werstu van deme hoghen berge gheworpen, dat ys van deme ewyghen leuende, also Adam gheschach Men Ihesus Cristus god vnde mynsche hefft vns geholpen dat wy nycht en syn ewichliken doet, he heft vor vns gegolden wille wi so werde wy beholden

EEn keyser was to Rome de dede een gesette welk man ene vrouwe vneerde bauen eren willen, so scholde he teghen de vrouwen staen vnde scholde horen offte se ene doet wolde

hebben edder offte see ene wolde nemen to der Ee ane gud