De historia van den souen wysen meisteren

Hir kempen Conrat vnde Allexander vor dem keisere vnde allexander wint den sege

ID gheschach, dat conrat des koninges sone van hispanien quam in des keysers hoff, in allexanders stede. Lodewich vnde des keysers dochter musten sik vor em hoden, dat erer leue nycht ghewar en worde vnde tohant leydede he ene yegen den keyser. De keiser sprak tohant. Gy beyden moten enen kamp vechten vmme de waerheyt to wetende. Lodewych nam raet to des keysers dochter florentina. Se sprak. begere du van myneme vader. Dat du vor deme kampe, dynen vader vnde moder moghest seen. vnde so he meenet dat du wyllest hen ryden. so rijd to vnsem truwen allexandro vnde do na syneme rade. ¶ Id geschach. he reet dach vnde nacht beth he quam to sinem

[fol. 34v]

ghesellen Alexandro vnde sede em wo yd em were gegaen, vnde vp de suluen tijd wolde Alexander hochtijd holden vnde by slapen, vnde do he horde synes gesellen noet do sprak he. Legge dy nedder by myne vrouwe, du byst my wol so gelyk dat see nummer wert enwaer offte yk id bin edder nycht, so wyl yck varen enwech vnde wil vor dy kempen. Id geschach Do nu Lodewich scholde slapen by synes gesellen bruud, Do lede he een bloet swert twyschen se beide alle nacht de wyle Allexander vthe was. Allexander quam in des keysers hoff. vnde kempede myt Conrado vnde dodede ene. Nemant wuste anders den dat yd Lodewych weere. Do wolde de keyser em drade sine dochter hebben gegeuen. He sprak, here ik leet mynen vader in deme dode lyggen do ik van em voer, to deme wyl ik eerst vnde wyl seen offte he doet sy, vnde wyl drade hijr wedder kamen. De keyser erlouede em dat, Florentina dankede Allexander gantz gutliken, vnde see wenede hemeliken vnde gaff em eren segen Allexander quam wedder vnde sede id Lodewyghe wo yd was geuaren vnde sande ene wedder in des keysers hoff, vnde do ward em des keysers dochter. Drade dar na do starff de keyser vnde he ward een geweldich here vnde keyser, So syk Allexander wolde nedder leggen by sine brud, do en lede he neen swert twischen se, des nam er wunder vnde do he lefliken mit eer leuede. Se vragede em wat he dar mede mende. Do merkede Allexander sines gesellen truwe. He sprak ik wolde dy versoken yd en schut nicht mer. Dat lach der vruwen also gantz in deme herten dat se enen anderen ridder leeff krech vnde hadde myt em to donde. De beyde geuen Allexandro to drinken vorgyfftnisse vnde wolden ene gedodet hebben do wart

[fol. 35r]

he vthsettich. De heren van dem ryke stotten ene van deme ryke vnde spreken. Neen koninck schal vthsettych syn, vnde waert elende versmaet, vnde dachte. Ga to dyneme ghesellen lodewych, de is een grot here, de gyfft dy de almyssen dorch got, beth an dynen doet. He hoff sick vp elendichlyken vnde wanderde hen, vnde ouerlanck so quam he in lodewyges heerschop, vnde dar na vor des keysers borch, vnde cloppede vnde bath dorch goth, vnde dorch des keysers ghesellen allexanders eere, dat men ene in lethe vor den keyser. De bade warff yd vor deme keysere.