De historia van den souen wysen meisteren

¶ Hir deyt de keiserinne ouer gantz ouel

DO nu de keyserynne vernam, dat he ouer den dach scholde leuen, hadde se vor ouel ghedaen, do dede se vele schusliker, vnde schrey vnde sprak. We dat ick iewerlde des keysers wijff wart. De keyser sprack. dat is een wunder, dat du so ouel deyst, vnde trostede se. Se sprak. Is dat nicht een wunder, dat gy dorch klaffens wyllen iuwe

[fol. 15r]

ordel aff gaen, dat gy ouer iuwen bosen sone hebben gegheuen. De keyser sprack, vele dynghes wert vor ghetaghen dat doch gheschut. De keyserynne sprak Ick weet wol, dat gy an iuwen .vij. meysteren nicht winnen. iuw gheschut also eneme keysere to Rome geschach, ok myt souen wijsen, de he hadde. De keyser sprack. segge dat. De keyserynne sprack. Dy tho leere segge ick dat, vnde wyl goth dat myne word crafft hebben an iuw vnde iuweme herten. Se sprak

¶ Id weren to rome souen wyse, dorch de alle dusse werlt vth gherichtet waert, vnde ock dem keysere de dar was. also nu dyne wysen ok doen. also dat de keyser ane eren raet nycht en dede. De wijsen makeden myt erer kunst, dat de keyser de wyle he in deme pallase was so sach he woll. men wan he to rosse off to vote vth dem pallase gynck, so was he blint. Dyt deden se myt touerye, vp dat se mochten des to beth ghewalt hebben. also dat deme keysere borde to verstande dat deden se. vnde ens mals do se yd deden do en mochten se yd nycht wedder aff doen. Also bleff de keyser mannych iaer blynt. De souen meystere schickeden yd vnder syck sulues, vnde deden een ghebeth Dem dar dromede rechtlykes dromes. wen een dar were, deme dar worde ghebracht een punt suluers, vnde em den drom bedudede, vnde de yenne wunne meer ghudes wen dusse, de konde deme keysere helpen dat he syn ghesichte weder krege. Enes mals do sath de keyser ouer dissche, vnde neuen em de keiserynne, vnde he suchtede swarlyken van grunde synes herten. De keyserynne sprack, woerumme sy gy so gantz seer bedrouet. Do sede eer de keyser wo dat he buten deme pallase blynt were, vnde wuste nycht wor van, vnde dat mannich iaer hadde gewart. De

[fol. 15v]

keyserynne sprak. wylle gy my volgen ik wyl iuw helpen. He sprak, Ia. Se sprak. Gy hebben .vij wyse, de alle dusse werlt vth rychten. Na den schole gy senden, vnde beeden en, so leeff als en dat leuent is, dat se iw helpen, wente wetet verwaer dat se in der schult sint. De keyser dede also, vnde leth na en senden vnde both en by deme leuende, dat se em hulpen to deme gesichte vthwendich des pallases. Se worden bedrouet, vnde begerden .x dage tijd. de tijt wart en Se voren in de lant, off en nemant konde vnderwysen, wo deme keyser geholpen mochte werden. se quemen in ene stat vp dat market, dar schimpeden vele kindere myt en ander. so kumpt een to den meysters vnde bringet en een punt suluers, dat se em enen drom beduden. vnde sprak, My is ouer nacht gedromet wo een borne midden in dem garden vp ginge, vnde gaf so vele vlotes van sick, dat he all vul waters waert. To den reeden sprack een iungelynk vth den anderen kinderen. Gaet hen vnde graff dar in, so vyndestu eynen schad van golde, dat du vnde alle de dyne ryke werden. he volgede dem knapen also he em hadde gesecht, vnde vant dat golt, vnde nam .ij. punt goldes vnde wolde deme knapen hebben ghegeuen. des en wolde he nicht hebben vnde sprack. Byddet got vor my. Do de souen meystere des kyndes wysheyt horden, do nemen se id by syden vnde spreken. Leue sone wo is dyn name. he sprack. Ik hethe marley. Se spreken claerliken, so merke wy, dat goth myt syner wysheyt by dy is. machstu deme keysere helpen dem is also. he sprack, Ia wol. Do vorden se den knapen to dem keysere. he vragede em of he em helpen mochte. he sprack Ia wol. De knape nam den keyser, vnde vorde ene in de kamere dar he lach, vnde hethe den

[fol. 16r]

deenren dat bedde enwech doen. dar vnder was een borne myt souen vloten. Do sprak de knape. De wyle dat de borne myt den vloten waerdet, so en see gy nummermeer vthwendych des pallases. De keyser sprack. Leue knape wo is de borne daer ghekamen De knape sprack. Gnedyge here, dyne meystere hebben yd ghedaen. darumme dat se in dem ryke des to beth mochten vmme gaen. Do vraghede de keyser, wo me den borne myt den vloten mochte verderuen De knape sprack. Gy moten de souen meystere doden, so vergeyt de borne. De keyser leth enen doden do gynck een vloet van deme borne aff, vnde dode se alle souen. Do voerde de knape den keyser vth der kameren. do sach he claer vnde schone. Do sprack de keyseryne, also gheschut iuw ock. de meystere de blinden iw myt eren reden, beth dat iuwe sone here wert Darumme so kone gij nicht beters don, men dat gy de souen meystere doden, als de keyser dede. De keyser sprack, daer en schal nycht vor syn morgen moet he steruen.

DO id nu quam des anderen dages, do leth de keyser ouer synen sone in den doet voren Do quam de veerde meyster de heth malquidrach, de hethe se sachte gaen, he truwede em dat leuent wol to beholdende vpp den dach. vnde quam eerlyken vor den keyser myt veele eerweerdyghen personen. Do ene de keyser sach, do entffinck he ene grymmichlyken vnde sprack tho em. Gy wyllen my doen also etlykeme is ghescheen. Do sprack de meyster. Enes myssedaet schal yderman nycht schaden Id sint yewerlde ghewest ghude vnde bose, doch so wyl ik iw trosten. dode gy iuwen eghenen sone van iuwer vrouwen reede weghen, yd ruwet iw noch na

[fol. 16v]

vnde wyl iw dat weerliken beduden in enem exempel De keyser sprack. segge hen.