De historia van den souen wysen meisteren

Hir kumpt de keiserinne ouer to deme keiser vnde torith ere eghene cledere van leide

DO nu de keyserinne dat vernam dat he des morgens nycht scholde steruen. do toreth se ere gewant vnde sprack. We deme daghe dat ick ye wart ghebaren, dat ik also eddel byn, vnde schal de schande lyden, vnde my neene beteringe dar van gheyt. Do quam de keyser vor eer vnde sprack. Du deyst dy sulues vnde my nycht recht. Woerumme verderuestu dy doch suluen also

[fol. 12v]

gantz yamerlyken. Se antweerde. Here dede den grote leue vnde truwe de ick to iuw hebbe. so en dede ik my suluen nycht so wee. my is yd meer vmme iuwe eere wen vmme my. myn vader gheue my wol ghenoch. Ik vruchte dat iuw ghesche, also eens eneme ryddere vnde syneme sone geschach. Do starff de vader vor den sone, vnde na sines vaders dode, do wolde de sone synes vader houet nycht vp den kerckhof grauen. De keyser sprack, wo is deme geschen, starf de vader vor den sone, vnde dede de sone dem vadere de vntruwe, dat is een groet dyngk. De keyserynne sprack. Ick segge yd iuw gherne tot ener leere.

Id geschach by olden tijden, dat to Rome was een wol ghebaren rydder, de hadde twee dochtere vnde enen sone. De ridder was bauen alle dynck vpp steken vnde vp torneren, vnde toch den sone ock dar to vnde do se beyde so veele ghekostet hadden, do worden se arm, vnde de vader sprack to dem sone. Myn leue sone, bedenke wo wy em doen. wy scholen veele ghelden, mote wy nu dat vnse verkopen, so weerden dyne sustere gantz arm. Beuelle yd dy woll wy bedachten anders wat. Nu was een keyser to den tijden to Rome de hethe Octauianus, de hadde bauen alle dynck golt leeff. de hadde enen torne to Rome, dar was van golde een gantz groet schat ynne. Se worden to rade, dat se to deme schatte wolden grauen, vnde deden id, vnde to dem eersten male gynck yd en wol, vnde nemen vele gholdes, vnde pleghen vuste rydderschop. Dar na ouer ichtswelke tijd worden se ouer arm. Dar na wolde des keisers marscalk in den torne gaen, do sach he wo dar ghevaren was vnde sede dat deme keysere. De sprack, du schalt my den schat antwerden. Ick hebbe ene dy beualen. De

[fol. 13r]

marschalck makede ene grouen vor dat holl inwendych, vnde dede dar in pyck vnde theer, vnde schickede yd also dat yd stedes to gynck, vnde week was. De vader vnde de sone worden ouer to rade, dat se in den torne wolden. Do krop de vader vor in, vnde vil in de grouen. Do sprak he. myn sone beware dy, dat du nycht hijr en kruupest. yck byn verloren. De sone wolde deme vadere helpen. De vader reep, du kanst my nycht helpen. do so wol vnde houwe my dat houet af, so kennet my nemant, darumme dat du vnde de sustere by eeren blyuen. De sone toch dat sweert vth vnde how dem vadere dat houet af, vnde warp yd veerne in ene wylde grouen. Daer na quam ouer des keysers maerschalck vnde vant den lycham ane houet. he seede dat deme keysere. De keyser sede emme scholde den lycham slepen dorch de stat, vnde in welkeme huse se horden wenen, dat se de an vengen vnde doden de. Dat gheschach. Do waert de licham vor des ridders hus hen getogen. De dochtere mochten sick nycht entholden vnde mosten den vader bewenen. Do de broder dat sach. do stack he sik sulues in een been ene deepe wunde, dat dat blot rechte van em vloet. Des keysers deenre leepen dar in, daer se dat wenent horden, vnde wolden de dochtere gevangen hebben, also de keyser hadde ghebaden. Do sede de broder. Se weenen darumme dat ick my so seer ghehouwen hebbe. Also bedroch he se, vnde behelt also sinen susteren vnde em dar to dat leuent. Do leth de keyser des rydders lycham an ene galghen henghen. Dar henck he lange tijdt, dat ene neemant dar aff en losede. Do sprack de keyserynne to deme keysere. Here hebbe gy myne reede nu wol vernamen. he sprack Ia. Se sede. So vruchte ik dat iw ock al-

[fol. 13v]

so ghesche van iuweme sone. De rydder van leue wegen synes sons stal wedder de nature. To dem drudden male heth he sick enthoueden, daerumme dat de sone nene vneere hadde. bauen dat so warp de sone synes vader houet in ene versmade kule, vnde mochte nycht also vele doen, dat he yd vp enen kerckhoff ghegrauen hadde. Dar na mochte he ock den licham van deme galgen hebben ghenomen, vnde hemelick begrauen. Do sprak de keyserynne, Ik vruchte dat yd iuw myt iuweme sone ock also ghae. Gy hebben dach vnde nacht sorge, wo gy iuwen sone mogen beschermen bauen dat grote ouel, dat he an iuw vnde my hefft ghedaen, Seet wo id enen ende nimpt volge gy mynem rade nycht. De keyser sprak, morgen so moet he steruen.