Die historie vanden vromen ridder parijs ende van die schone vienna des dolphijns dochtere

¶ Hoe paris viennen quam besuecken in die gheuancknisse. ende doe dat sy hem wert kennende

[fol. f4v]

DEs anderdaechs tsmergens cleedde hem paris vele costeliker dan hi te voren ghedaen hadde, ende gordde een costeliick zweert aen hem. ende also ghinc hi tot viennen met den bruedere Doen seyde die broeder Mijn vrouwe wy syn onder ons beiden weder gecomen om uwe goede antwoerde te hebben Vienne antwoirdde terstont. myn heeren mijn meyninghe is dat ick nemmermeer mijn gelofte breken en sal. want ic hebbe geloeft dat ick nemmermeer man nemen en sal noch hier wt comen voer dat ick doot ben. ende daerom moechdi wel keeren ende gaen uwer veerden. Bij mynre trouwen seyde die broeder ic en weet wat seggen tis groot iammer dat ghi v in dese geuancnis dese pyne aen doet In dien ghijs emmers niet doen en wilt. so bidt v dese heyden dat ghij desen rinck ter liefden van hem draghen wilt Dit selue was den rinck die vienne parise gaf doen hi van haer schiet inder kercken. ende vienne nam den rinck op dat sij harer quijt werden soude. Ende doen sy den rinck aenveerdt hadde, bat parijs den broeder dat hi sijnder een weenich verbeyden woude om te siene wat contenancien datse houden soude. Vienne wart vast besiende den rinck Ende als hi dat mercte begonst hi haer toe te spreken in volcomen franscher talen seggende aldus O edel vrouwe hoe verwondert ghi v alsoe seere van dien rinck Voerwaer antwoerde vienne. nae mijnen

[fol. f5r]

dunckene soe en saghick noyt schoonderen. Doen seyde hi. daeromme bidde ick v dat ghyen in dancke nemen wilt want hoe dat ghijen bat besiet hoe ghi en lieuer hebben sult.

ALs vienne den heydenen aldus hoorde spreken so was sy mit allen seer verslaghen van verwonderen. als die gene die meynde oft sy yet betoouert wardde. ende seyde. och heere god wat is dit. dat ick sye ende hoore spreken. ende gheliet haer oft sy van vare wt der gheuanckenissen ghespronghen soude hebben. om dat sy den heydenen alsoe hoorde spreken. Doen seyde parys. O edele vrouwe en veruaert v niet. Siet hier parijse uwen ghetrouwen dienre. doen was vienne noch veel meer veruaert dan te voren ende seyde. Voerwaer ten mach niet wesen Ick segghe v sekerlijcken sprack paris die v met yzabeelen liet inde kercke. al daer ghy mij gaeft den dyamant dien ick v daer ghegheuen hebbe. Ende ghy gheloefdet mij dat ghy nemmermeer man nemen en soudet dan my. En verwondert v niet van mijnen bairde noch oeck van mijnen cleederen. Ic weet wel dat sy v benemen mijn kennisse. ende dyer ghelijck seide hi haer so vele met goeden bescheede, als dat sij hem wart kennende. Ende van grooter outsprekelijcker liefden ende blijscapen soe wardt sy weenende, ende vyel tusschen syn armen. ende hy die omvingse seer minnelijck ende vriendelijck, ende custese menichweruen, met seer sueten woerden haer vertroostende. ende alsoe bleuen sy langhen tijt. Daer nae begonste hij haer te vraghene van harer auontueren. Ende daer ghinck sijt hem allegader vertellen. Haer ioncfrouwe ysabeele en hadde des nachts te voren niet gheslapen. wair bi datse nv seer onslapen gheworden was. als dat sij niets niet ghehoort en hadde noch en wiste van tghene des voerseyt is. mer ouermits die groote blijschap die paris ende vienne tsamen bedreuen zoe wardt sy ontwaeckt. Ende als sy den heydenen sach inden arme van vienen. soe was si verschrict ende verwondert segghende tot harer vrouwen wie dat daer ware. ende oft sij wt haren synne was dat sy den turck in haren armen behielt. ende vraechde haer oft sy alreede van hem betoouert was, om datse met hem soe grooten ghemeenschap hadde. ende of dat die trouwe was die sy parise den edelen ridder geloeft hadde: doer wyen dat sy soe vele gheleden hadde. Mijn lieue suster sprac die schone vienne en spreeckt niet meer alsoe. coemt ende verblijt v met my. want al soe wel heb dij gheuonden v gheluck ende auentuere als ick doe die myne: Siet hier mijn wtvercoren lief parijs, die wy soe langhe begheert hebben Met dien soe ghinck hem ysabeele naerder ende sach dattet parijs was. doe ghinc sy hem omhelsen ende cussen. ende bedreuen alle drije soe grooten blijschap dattet niet te vertellen en waer. Ouer een poose oft wijle daer nae sprack parijs tot vienne. mijn lieue sustere het behoeft

[fol. f5v]

dat de dolfijn van desen onsen dinghen eens wete. ic wil gaen te hemwaerts Niet te min. ick begheere op v dat ghij nyewers af en vermaent voer dat ickt v selue segge ende hete. ende also ghinghen sy vter gheuanckenissen, al dair sij den brueder alnoch vonden staende parijse ontbeydende. ende ghinghen mit hem eensgancx voert voer den dolfijn die seer verblijt was doen hise sach aen comen. nochtans verwonderde hy hem zeere hoe vienne wt quam. Doen seide paris totten bruedere. Segt den dolfijn dat ick sijn dochter bekeert hebbe tsinen wille. ende ten mijnen. ende dat hem ghelieue haer mij te gonnen teenen wyue: doen sprack die dolfyn tot viennen aldus. ghi sult nemen teenen man desen die mi wt den geuanckenis geholpen heeft in groter sorghen sijns leuens. Doen vraechde vienne parijse oft hem lief ware dat sy antwoerde. ende paris seide ia. Mettyen sprac vienne voert. mijn lieue vader ick ben bereet te doene uwen wille ende den sijnen. Ick bidde v dat ghy my vergheuen wilt mijn misdaet. ende gheuen mi uwe benedictye. ende als sy dat ghesproken hadde vergaeft haer huer vadere ende gaf haer die benedictye. ende custese. Siet hier nv o vader sprac sy mijn wtuercoren lief paris dien ick so langhe begheert hebbe. ende daer doer ick zoe vele gheleden hebbe Hi is die so wel zanc. ende tsteecspel wan in dese stadt. ende die den cristalen schilt met hem vuerde ende mynen crans Hi is die gene die oeck tsteecspel ghewan in de stadt van parijs. ende die de drie iuweelen ende die drie banieren met hem droech bedectelic van daer sceidende. dattes niemant gewaer en werdt Na desen soe ghinc paris tsynen vadere waert. ende als die sach dattet paris sijn sone was daer hem soe lange na verlanghet hadde greep hijen in syn armen van grooter blischappen. ende mettyen vraechde hi den dolfijn oft hem gheliefde dat hij synen sone mede thuys leidde om sijn moeder te siene ende sijnen gheselle eduwaert Daer op de dolfijn antwoerde dattet hem lief ware dien dach meer. maer niet langher. want ick wille dat merghen die brulofte ghehouden worde hier binnen. Voirwaer ten was geen wondere doen parijs tot sijns vaders huys quam dat daer groote blischape was. want sij en hadden maer dien eenighen sone. ende dye soude trouwen haers heeren dochtere