Die historie vanden vromen ridder parijs ende van die schone vienna des dolphijns dochtere

[fol. f3r]

Hoe dat de dolfijn ende parijs vanden volcke van vranckerijc met groter bliscap ende eeren ontfanghen waren

ALs de dolfin aengecomen was in aiguemorte was de tijdinge in dolfinoys ghelopen. waerom hem alle die ridders aldaer wapenden ende toemaecten. ende reden den dolfijn te ghemoete al tot in aiguemorte. ende aldaer ontfinghen sy hem met groter eeren Ende also reysden sy voert tot datse quamen te viennen in viennoys. al daer tvolc van groter blischappen xv. dagen lanc feeste hielden die wtnemende groot was Parijs en veranderde syn abiten net. ende en liet hem in geenrewijs kennen. mer hi ghinc dagelicx ter missen ende behielt sinen bairt ende tvolc dede hem bi beuele vanden dolfijn also vele eeren. dat hijs hem seluen scaemde Hier na een luttel tijts dede de dolfijn parijse vraghen om genoech te doen van synder beloften oft hi hebben woude de heerlicheyt van synen lande, want hi al bereet was hem te quijten zijn gelofte. Paris antwoirde. dat hi zijn lant selue behielde, het ware hem genoech Doen dede de dolfijn hem vragen oft hi woude hebben vienne synre dochter tenen wyue. Paris dede hem dair op seggen ter antwoirden. dat hi dat wel woude op dattet hem gheliefde Ende also ghinghen sy tot viennen, ende bi hair comende. sprack die minderbroeder eerst aldus. Mijn vrouwe. ghy weet wel dat mijn heere v vader langhen tijt gheuanghen geleghen heeft, al daer hi noch wa-

[fol. f3v]

re gheweest, en hadde ghedaen god ons heere ende dese man. dien wt dyer grooten perikel geholpen heeft in vreesen sijns lijfs ter liefden van uwen vader. soe suldi weten. hoe wel ghy uwen vader alle ghehoorsamheyt schuldich syt. dat v vader v bidt dat doir alle die liefde die ghi hem emmermeer doen moecht, uwe gheliefte sy desen sarasynschen man te trouwen teenen man. ende hy sal v alle v mysdaet vergheuen die ghi oyt tegen hem misdaen hebt. aensiende in desen, dat v vader desen man eeuwelijc schuldich is onderdanich ende gehorich te wesen Als vienne den brueder aldus hadde hooren spreken antwoerdde sy hem aldus. Die bisschop van sinde laureys die hier tegenwoerdich in stadt is. weet wel dat ick ouer langhe tijden wel gehuwet ware gheweest op dat ic hadde willen huwen, daer mijn vader meer eeren af ghehadt soude hebben dan van desen sarazijn. Want shertoghen sone van bourgoendien soude mi ghetrout hebben gehadt. hadde ict willen consenteren. mer ons heere god heeft my gestelt in alsulcker crancheyt als dat ick op dese werelt niet langhe leuen en mach ende alle dage verswaert my dat ende ben alrede half verrot. wair omme wilt mynen heere vader seggen dat hi mi doch houden wille ouer gheexcnseert. want ick gheenen man nv en wille Die dofijn hiet den broedere dat hi dit den sarrazijn segghen soude Dit horende paris hadde hi duchte te verliesene de liefde van vienne. ende ghinc metten broedere ende metten bisscop van sinte laureys tot hair in de gheuanckenisse Ende als hise also gestelt sach hadde hi groot lijden met hair ende dedese biden broeder groeten. ende sy dancten seere Doen dede hi den broeder haer segghen aldus. Mijn vrouwe ghij weet wel dat ic uwen vader wt den geuangenissen geholpen hebbe. dat v billicx lief wesen soude, ende waere alnoch daer, en hadde ict ghedaen. ende vergheeft v al des ghy oyt teghens hem misdaen hebt. ende bidt v dat ghi my teenen man nemen wilt ende wil dat wi sijn heeren van dolfinois Hieromme bidde ic v dat ghy noch ick dese eere niet en verliesen. Ende al en ware des niet so soudi billicx uwen vader ghehoorsam wesen. Doen antwoerdde vienne den brueder in de persoen van parijs Ic weet wel dat ghi mijnen vadere vter gheuancknissen geholpen hebt ende dat sal v mijn vader wel loenen dat ghijs v niet beclagen en sult Ic bekenne oec wel dat ghi een man syt van groter geboirten ende dat ghi wel werdich sijt vele meer der vrouwe te hebben dan my maer die bisschop van sinte laureys die hier inder stadt tegenwoerdich is weet wel dat om der siecten wille daer ic inne ben ic niet langhe leuen en sal. Doen antwoerde paris bi monde vanden brueder dat om des wille dat hi sarasijn was sy hem also wederleyde. Ick beloue v sprack hy dat ick kersten werden sal. Ic meyn wel wistij wie ick ben ende wat ick achter ghelaten hebbe om uwen vader vter gheuanckenissen te trecken. ghi soudt my weerder hebben dan ghi doet. weet dat v vader meyneedich wesen sal. want hi heeft mij geloeft dat ghi myn wijf wesen sult Doen antwoerde vienne. Ick

[fol. f4r]

hebbe wel hooren segghen vele deuchden van v. nochtans aenghesien die siecte daer ic inne ben soe en soude my niemant raden tot huwelike want mijns leuens en mach niet langhe wesen. ende op datmen ghevoelen mach dat ic warachtich segghe. so coemt my naerder ende ghij selt ghevuelen in wat punte dat ick ben aengaende mijnen persoen. Ende mettyen ghinghen sij haer wat naerder. ende vienne hadde wederom onder hair oecselen gesteken die twee quartieren vanden hoene wt den welcken dat quam so swaren reuck. dats de bisscop noch die broedere niet verdraghen en consten. Niet te min Paris en rooc des niet dat den anderen wondere gaf. ende hi dede den broeder segghen dat hij haer dairom nemmermeer laten soude ende dat hi van daer niet scheyden en soude voer datse haer consent ghegheuen hadde tot haers vaders begheerte Doen antwoerde vienne in grammen moede ende sprack bij alle tghene des sij van gode hielt. sij soude hair hoot teghens den muer smyten dat haer dye herssenen in de kele springhen souden ende van dyer mijnre doot sult ghi de saecke wesen. Die bruedere seyde haer. dat sij des niet en dade. want hi en souder haer nemmermeer af vermanen. in dien het uwen wille niet en is. Niet te min Ic bidde v een dingen dat ghijer desen nacht meer op letten wildt. ende merghen keer ick weder. met alsulcker antwoirden als ghi mi dan sult geuen. ende dairom beraedt v mit uwer gesellinnen der ioncfrouwen. ic bidde gode dat hi v wel wille laten beraden. ende dit sprack hi al te mael aldus inden persoen van paris Ende hiermede schieden sy van viennen. ende ghingen dit aldus den dolfijn vertellen, die daerom seer tonpasse was. ende dede parise bidden dat hi hem van dien oueronschuldich houden woude. want hi daer geen schout toe em hadde. Doen sij van vienne ghescheiden waren sprack sy tot ysabelen Mijn lieue suster wat dunckt v van der wijsheijt van minen vader die welke meynt dat ick desen heidenen teenen man nemen sal Daer ick shertoghen sone van bourgoendien wederseyt hebbe, nemmermeer en moet dat god gelieuen dat ick anderen man nemen en sal dan parijse. die ic noch meyne te hebbene. Voerwaer sprack ysabeele. ick en weet wat segghen van uwen vadere, die v desen heidenen gheuen wille. ende heeft gheseyt dat hi merghen weder comen sal. ende dat ghijer daer binnen op letten soudet