Die historie vanden vromen ridder parijs ende van die schone vienna des dolphijns dochtere

Hoe dat de dolfijn ende paris metten twe broeders tschepe ginghen

[fol. f2v]

HIer na quamen de dolfijn paris sijn knecht ende die twe brueders ter hauenen ende eensgancs ghingen sy tscepe ende hieuen tseyl op. ende voeren henen also dat si binnen cortten tiden quamen te leuan, dat doen kersten was ende daer tradt de dolfijn wt om deswille dat hi al vermoeyt was so vander see so vander gheuanckenissen daer hi wt quam. ende al dair leende hi gelt daer sy mede quamen in cypren al daer een coninc was die in des conincx hof van vranckerijcke ghewoent hadde. die welcke als hi hoorde dat die dolfijn van viennoys quam, ghinc hi hem tegens biddende hem hertteliken dat hi woude comen logieren in syn palays. dwelck die dolfijn dede. des de coninc seer blide was. ende deden malckanderen grote chiere wantse deen den anderen in des conincx hof van vranckericke dicwille gesien hadden Daer na ghinc hem die coninc vragen van synder auentueren daer op dat de dolfijn al int lange vertelde Ende van blischapen bedreef de coninc grote feeste ende ontfincken seer weerdichliken met grote bliscapen also lange alst hem beliefde. Doen de dolfijn een wile daer gheweest was nam hi verlof vanden coninc hem danckende van synre goedertierenheit Als de coninc emmers sach dat de dolfijn emmers ewech woude scanck hi hem scone ghiften ende dede toemaken twe galeyen met volke van wapenen daer hijen mede dede geleiden ende alst god woude so viel hem den wint mede. also dat sy binnen cortten tijden quamen in aiguemorte