Hoe die dolfijn bi paris verlost wert wt der gheuancknisse in alexandrien
ALs dit ghereet was ghinc paris biden wachters vander geuanckenisse ende seide aldus Mijn heeren ick dancke v vter maten seer van uwer goeder duecht die ghi mi gedaen hebt Ic wil vertrecken van hier wederom te mijnen heer weert den soudaen. Maer ic wil eerst desen auont met v eten ende bat hem dat sijs hem niet weygeren en wouden. Het dochte hem goet. ende paris ghinc seynden om de spyze. ende alsoe schiere als die gecomen was zo ghingen sy tsamen eten. Dair droncken hem die wachters allegader so droncken. mits dat sy niet ghewoen en sijn wyn te drincken, datse ontslaep vielen. ende sliepen also seer vast dat sy niet en hoorden wat datmer dede Als paris dat sach so hiet hi den broeders datse den geuanghenen vten yzere slaen souden. ende dat sy die gheuanckenisse open daden. ick salder op wachten sprack hij ofter yemant ontspringt ende dien sal ick ter stont dooden. Doen begonsten die brueders den dolfijn vastelic te ontyseren met grooten anxte biddende onsen lieuen heere dat hy hem helpen woude. Doen hi vten yser was ghinghen sy hem cleeden al ghelijc eenen sarazijn. Daer na doode parijs alle die wachters deen nae dander op datse hem niet veruolghen en souden bij alsoe dat sij ontwaect wardden.
Auteursrechtvrij