Die historie vanden vromen ridder parijs ende van die schone vienna des dolphijns dochtere

[fol. e6v]

¶ Hoe paris mitten twee broederen in alexandrien toech al dair hi van den admirael seer minnelick ontfanghen wart

ALs paris alle dese dingen hadde. ende voerts oerlof genomen hadde aen thof so ghinc hi henen metten twee broeders in alexandrien Ende alsoe schiere als hi daer was soe toechde hi sijn mandement den admirael. dwelcke als hi ghesien hadde boet hem eere ende reuerencie. ende dede hem een schoon huys ghestoffeert van alle des hem behoefde Ende insghelijcks dede hi den broeders oec een. Die admirael quam alle daghe parise besuecken om hem gheselschap te houdene. ende soe reden sy omme de stadt. ende om deswille dat paris soe costelicken gecleet was dede hem elckerlick reuerencie ende eere segghende dat hi eens groots heeren sone wesen moeste. Op een tijt als sy alsoe reden doer die stadt, leden sij verbi den toren daer die dolphin inne geuanghen lach. Doen vraechde paris den admirael. wat torren dat dat was die soe schoon scheen Die admirael antwoerde hem dattet was een verueerlic gheuanckenis. daer inne dat die soudaen geuanghen hout eenen groten here ende baroen vten lande van ouer tmeer. die welcke dat gecomen was al daer omdlant te bespiedene. Doen seide parijs ick bidde v laet ons doch dien gaen be-

[fol. f1r]

sien. gheerne seide de admirael. mettien traden si van haren perden ende ghingen in die geuancnis: ende als paris den dolfijn sach iammerde hem sijnre grotelijc doer het lijden dat hi aen hem sach Paris vraechde dien wachters wat mans dattet was, ende si antwoerden hem hoe dattet was een groot baroen wt franckerijc Doen vraechde parijs oft hi gheen sarazijns en verstont. ende si seiden hem neen. mer woude hi hem toespreken sy souden hem wel trosmans genoech halen. doen antwoirde paris dat hi op een ander tijt wel weder comen soude hem ondervragende nader lande van ouer tmeer Ende also bat hi den admirael dat hi den wachters seggen woude dat sijer hem toe lieten gaen als hi daer quame. ende dat geschiede. Ende namen mettyen verlof vanden wachters. Binnen cortten dagen quam paris daer weder ende brachte met hem den brueder die sarazijns spreken conste Ende als sy daer binnen waren, hiet hi den brueder dat hiem heusschelicken groeten soude. niet wetende die selue broeder dat paris franchois verstont. Doen seide die broeder totten dolfijn hoe die heere al dair gecomen was om hem te visiteren. ende dat hi die kerstene seer lief hadde ende dat hi wel was inde gracie van den soudaen. ende gheloofde hem alsoe wel als enigen man in sijn lant. ende in deser manieren vraechde die brueder den dolfyn vele voir den persoen van parijse. ende seide hemwaert dat hi hem yewers aen liefde doen mochte dat hijt gherne doen soude

ALs die dolphijn alsoe hoorde den religieux spreken vten naem vanden sarasijne verwonderde hi hem seer. biddende onsen heere dat hi hem int herte seynden woude dat hi doch vter geuanckenissen geraken mochte Paris die seer verlangede nyeumare te hooren van vienne. seide den broeder dat hi den dolfijn vragen soude ofte hi wijf ende kinder hadde Doen begonst de dolfin te screyen ende antwoerde hem hoe dat hy een wijf hadde ende een dochter die gehouden was voer die scoonste van al vranckerijcke. die welcke hi geuanghen hielt. om deswille datse ghenen man nemen en woude. Doe begonste paris hem te troosten doer den mont vanden bruedere segghende dat hi goede verduldicheit hebben woude in sijn liden, ons heer god souden noch wt helpen alsoe dat die dolfijn blide wert ende van herten verlicht. ende was schade sprac hi totten broedere diet woert vuerde dat paris gheen kersten en was. ende bat onsen heere dat hi hem dyer duecht loonen moeste. ende also schieden sy wel ghetroost van malckanderen. Doe seide paris den wachters hoe hi in den gheuanghene so vele vermakens geuonden hadde. dat hi dicwil weder comen soude al dair clappen ende couten. die wachters seiden dattet hem wel te wille waer ende so schieden si van daer Paris seide nae desen den brueders wistick dat ic uwer versekert ware ende mi op v betrouwen mochte. ick soude wel meynen desen geuanghen vter geuanckenisse te helpen. als die broeders dat hoorden verwonderden sy hem seere. ende antwoerde aldus. Bij der trouwen die wi onsen heere god schuldich syn. wi verclaren v dat. dat ghi daer aen gheen twifel hebben en dorst. ende bi also dat ghi des wille hebt. latet ons

[fol. f1v]

proeuen maer dat bedectelick. ghij siet doch wel hoe dat hi daghelicx ghewacht wert. Doen seide paris. ic weet daer toe goeden raet. mer ierst behoeft ons twe dinghen. eerst dat ghi beyde met mi gaet Dandere dat hi my van mynre leeftochten besorghe eerliken so wanneer ic in zijn lant ben. mer ick beduchte mi als ic hem wt ghehulpen hebbe ende dat hi in sijn lant comen is. dat hijs mi negheen houden ende sal noch mijnre gade slaen. Ick en kan gheenreleyde werck noch neringhe. ende also waric qualic geraect. hierom willic mi des versekert hebben. ende dat hi mi gheue een ghifte van die ic hem eysschen sal. als wi in sijn lant wesen selen Ende mits desen sal icken verlossen. ende laten om sijnen wille myn lant. nochtans dat ghy moecht sien in wat state dat ick ben

DEs anderdaechs quaemen paris ende die twee brueders in de gheuancknis. ende die brueders verrekende alle dit den dolfijn, ende als hi dat hoorde. docht hem dattet onse heere god daer geweecht hadde. Ende seyde aldus. ic dancke desen sarazijn menichfout van synen goeden wille die hi te mijwaert heeft. want ic hem noyt dienst en dede. daerom dat hi dit doer mij doen mochte Niet te min. eest gods geliefte dat hi mij hier wt helpt. ick ben bereet te zwerene opt lichaem ons heeren ihesu christi. dat also gheringe als ic in mijn lant van hier gecomen sal syn. dat icken houden sal in meerderen state dan hi hier is. Ende ick consentere dat hi met mijnen lande sijnen wille doe. want tis mi genoech dat ick den cost hebbe voir my ende mijn wijf. ende daerom willic al doen des hem gelieft. ende dit segt hem van minen twegen Doen ghinc die broedere dit parijse vertellen Doen begheerde parijs dattet de dolfijn zweren soude op dlichaem ons heeren. op dat hijs te bat versekert ware. Die dolfijn dede alsoe. Ende om parijse te bat te contenteren nam hi dat sacrament inne sprekende aldus. dat dat wesen moeste tsijnre verdoemnissen. bi alsoe hi hem niet en hielde alle tghene des hi hem geloeft hadde, so wanneer hi in sijn lant quame. Als dat also ghedaen was. ghinghen paris ende die twee minderbroeders tot opt water. om te besiene ofter gheen schepe en waren, die aen dese sijde vanden meer wesen wilden. ende bi auentueren ende groten gheualle vonden sy een schip Sij spraken den patroen toe ende gheloefden hem duisent gouden besanten. waert dat hi huer vijf personen ouer vueren woude. Die patroen dat hoorende seide dat hijs te vreden ware. maer dat si hem deen helft gereet gauen. Doen seide hi voert. mijn heeren Ic biddu dat ghi v spoedet want vonden ons die sarasijnen van desen lande wi warender allegader om doot Doen seide paris dat hi hem bereet maken soude want hi van dien auonde ter middernacht comen soude. met desen keerde paris weder omme metten twee brueders tsijnen logise waert. ende dede bereet maken seer costelicke spyse. ende die beste wijn die hy wiste te ghecrighene. ende voert des dair meer toebehoorde