Die historie vanden vromen ridder parijs ende van die schone vienna des dolphijns dochtere

Hoe dat parijse die in babilonien was twee minderbrueders te gemoet quamen. ende seyden hem hoe die dolfijn gheuangen lach in alexandrien dwelc hem verwonderde

[fol. e5v]

NV soe keeren wi weder tot parijs dye hier af niet en wiste. Paris was te babilonien ghelijc ghi bouen ghehoort hebt Soe ghebuerdet dat bi auentueren twee minderbroeders die haer pelgrimagie deden passeerden ende leden doer babilonien ende bleuen al daer besiende den staet vanden soudaen ende syn macht. want hi hem doe al daer hielt met grooter mogentheyt. Dese twee minderbrueders waren van deser syden des meers. ende quamen bi gheualle parijse te gemoete. ende hi groettese ende vraechde hem na nieumare van herwerts ouer seggende aldus. ic hebbe horen seggen hoe ghi kerstenen hebt eenen paus die machtich is. ende veele meer ander coningen ende grote heren van groten steden ende casteelen, my geeft wonder hoe ghi luden gedoecht dat wi die van uwer wet niet en syn besitten theilich lant dat v doch toe behooren soude na dat ghi segt. Als die twee minderbroeders aldus hoorden spreken parijse antwoerde deed van hem in sarazijnscher talen want sij waenden dat hi van dien lande geweest ware Voerwair ick gheloue wel dat ghijt moecht hebben hooren segghen. dat aen gheen syde des meers vergadert waren groote menichte van volcke van wapenen, om te comen herwaerts ouer, om des wille dat onse heilighe vader die paeus hadde doen legghen een cruusvaert. Ende binnen der wylen dat hem dat volc vast vergaderde so seynde die coninck van vranckerijc dye de machtichste van vranckerijcke is herwaerts eenen seere edelen baroen die gheheeten was dye dolfijn van viennoys om te besuecken die landen van herwaerts ouer. ende als hi hier binnen tslants was soe dede de soudaen besetten die plaetsen daer die pelgrems te passerene pleghen. ende van stonden ane wart hi aengetast ende geuanghen in een stadt die geheeten is ramon. ende deden daer na vueren in alexandrien ende legghen in een quade gheuanckenis daer ick meyne dat hi lange in ghestoruen is. ende also wart dat werc ontdect Doen vraechde paris hoe dye heere gheheeten was. Die broeder die antwoerde hoe hi den name hadde heer godeuaert dalenson dolfijn van viennois Ende als paris dat hoorde was hi te male seer verslaghen. hoe wel dat hi des niet en baerde: mer hi peynsde dat syn auentuere eens beter werden mochte. Doen vraechde hi hem voert na vele meer ander dingen. ende seide hem hoe hi op een ander tijt noch meer met hem spreken soude. ende vraechde hem waer sy waren ghelogeert. dwelcke sij hem niet gherne en berechten. want sy duchteden dat hijt meer om harluder gevraecht hadde den anderssints

ALs parijs dus vanden broeders ghescheiden was zoe ouerleyde hi bij hem seluen hoe hi in alexandryen comen mochte den dolfyn te siene. ende hoe hi hem vter gheuanckenissen helpen mochte. Hi wart van rade dat hij ghinck ter herberghen

[fol. e6r]

vanden minnerbrueders. ende namse mitter hant. ende leyddese spacieren doir de stat sprekende van menegerley dinghen. algader in sarazijnscher talen Doen seide hi hem ten lesten hoe hi grote begerte hadde te sien den kerstenen ridder die in alexandrien was, op auentuer of hi hem yet helpen mochte. wilt ghyliede tot daer met mi gaen. ick gheloue v te doen goede chiere sonder dat v yets wederuaren sal. ende daer aen en twifelt niet Die broeders en wisten van anxste hier op watte tantwoerden. nyet te min. op dbetrouwen dat sy te gode waert onsen heere hadden. gheloefden sy met hem te gaen al souden syer oec om steruen. Sy baden gode metter hertten dat hi hem gracye verlenen woude den dolfijn vte te helpen Parijs was blide vander antwoerden vanden broeders, want hy en meynde den dolfijn niet ghesien te hebben. maer om te sien deynde van sijnre auentueren. met dien schiet hi van hem. ende ghinck tot des soudaens valckeneer waert. daer hi groote kennise aen hadde. ende seyde aldus. Here ick danck v wt alre mijnder herten van uwer duecht die ghi mi ghedaen hebt V ghelieue te weten hoe dat ic op ghenomen hebbe te reysene in alexandrien. ende ick gheloue v dat doer dye liefde die ic tuwerts hebbe dat ic niet langhe vertueuen en sal weder te keerene Ende om des wille dat ick in dit lant onbekent ben. so biddic v dat ghi mi wilt doen hebben een mandement vanden soudaen. biden welcken hi beuele ende ghebiede datmen my vrijdelick doer alle sijn landen laet lyden ende passeren. ghemerct dat hem niemant te seere wel bewaren en mach vanden quaden volke. ende dat ghi my voerdaen ghebieden wilt in de goede gracie van mynen heere den soudaen Eensgancs so ghinck die valkenaer ten soudaen waert. ende dede hem open parijs requeste. van stonden ane soe beliefdet den soudaen segghende dat hem tvertreck van parijse seere leet was. waert dat hi in syn hof blyuen woude hi souden maken een groot here Doen seyde die valckenaer. Lieue geduchtyghe heere hi heeft my gheloeft in cortten tiden weder te keerenne. Die soudaen dede het mandement maken ghelijc paris dat begheerde. beuelende alle sijnen heeren officieren ende ondersaten van steden plaetsen ende casteelen dat sy hem bewesen alle eere ende alle sijne behoefte. sonder daer af gout seluer of yet anders van hem te nemene. Doen gaf de soudaen parijse seere costelijcke cleederen aen van goude ende syden. ende oeck soe gaf hi hem schats mede om vele ende bat hem dat hi also gheringhe wederkeren woude als hij mochte. ende als dan gheloefde hi hem te maken een groot heere Ende mettyen dede hi hem langhen het voerseide mandement. dwelcke dat mit sijns selues hant gheteekent was ende beseghelt met synen seghele.