¶ Hoe die dolfijn ter zee ghinc op weghe van iherusalem.
NA desen ghinck die dolfijn tschepe ende passeerde doir syrien ende damasco tot iherusalem, ende doersach dat lant herde wijsseliken ende liet hem vanden pelgrimmen vast onderwisen sonder dat hi ontdeckte wat syns sints was Niet te min enige quade kerstenen die daer waren ghingent den soudaen verbootscapen, omme alzoe bij dien ghelt te ghecrighene Doen dit de soudaen wiste. en maecte hij dair af gheen werck alst scheen. maer heymeliken al stille zwyghens dede hi besetten ende oeck bewaren alle die plaetsen dair die pelgryms van costuymen pleghen te lijdene. alsoe dat bi dien die dolphijn ende alle sijn geselscap geuangen worden. teender plaetsen die welcke dat gheheeten was ramon niet verre van iherusalem. ende doe werdde die dolfijn terstont ghevuert voer den soudaen. dye welcke ordineerde datmen pynighen ende tormenteren soude. Die dolphin dit siende. bat dat men hem doch niet tormenteren en woude, hi soude hem die gerechtighe waerheyt daer af segghen. ende ghinck doen alsoe den soudaen vertellen. hoe dat die paus op geleyt hadde een cruusvaert teghens hem lieden ende dat hij daeromme gecomen was omme dlant al daer te verspiedene. Als die soudaen dat hoorde geboet hy dat men hem terstont vueren soude in alexandrien. in een harde gheuanckenisse ende datmen hem niet anders en gaue dan water ende broot. men soude die wile ordineren om hem alsucken quaeden doot aen te doen. datter alle dander exempelen aen nemen mochten dyer quamen om dlant te bespiedene. Doen wart die dolfijn ghevuert in alexandrien ende geset in eenen stercken torre. aldaer hi met wachters inne bewaert wart. ende aldaer leydde hi een wijle dat leuen seer allendelicken. ende en meynde nemmermeer leuende van daer te gheraeckene. Die paus ende de coninck van vranckerijcke arbeydden seere om hem wederomme moghen te ghecrijghene met schatte ende goede. maer ten mochte al gheen stade doen. want die soudaen bleef daer stedeuast bij. dat hijen so wt rechten woude datter hem alle dandere aen spieghelen souden. die daer comen wilden sijn lant te bespiedene.
Auteursrechtvrij