Die historie vanden vromen ridder parijs ende van die schone vienna des dolphijns dochtere

¶ Hoe ende in wat manieren dat die dolfijn totten coninck van vranckerijcke coemt. ende hoe dat hem die coninck seyndt om ouer dmeer te trecken ende te bespiene tlant vanden soudaen

[fol. e4v]

DIe coninck van vranckerijke als hi ontfangen hadde des paus brief van stonden aen so ontboet hi den dolfyn van viennoys dat hy met hem quam spreken. ende als hy ghecomen was, seyde hi hem. heer godeuaert wij hebben v ontboden want wi v houden voer een vanden vroetsten van onsen houe, ende oeck so sydi van onsen bloede. Hierom wilt weten hoe onse heilige vader die paus ons ghescreuen heeft dat hy een cruusvaert leggen wilt teghens die ongelouige, dair wi ter eeren gods dencken te wesen. Niet te min wi hebben ghedacht dat ghi daerwaerts gaet. ende bidden v daerom dat ghi ter eeren gods den last aenverden wilt Doen antwoerde hem de dolfijn Ick ben bereet heere v te belieuene met goeder herten. maer hoe dat ick mochte ghelijden doer die sarazijnen dat en weet ick niet. want vernamen sy enichsints daet ick daer quame omme haer lant te bespiedene. nemmermeer en mochtick quader doot ontgaen. op dat my god onse heere daer voren niet en behoedde Doen antwoirde die coninck aldus. ghi ende alle v geselschap moecht daer vrielijck verkeeren in pelgrims habijten. ghij weet doch wel datter deerste niet en is dat die kerstenen al daer ghegaen syn. Hieromme soe bidde ick doer die name ons heeren ihesu christi dat ghy

[fol. e5r]

daer wilt gaen. ende neemt met v van onser ridderschappen also vele als v belieft Als die dolfijn aensach den goeden wille vanden coninck. ende dat hi van stonden ane moest reysen soe sende hi brieue tsyner huysvrouwen. hoe dat hi toech ten heylighen lande in iherusalem dye heylighe plaetsen besueken ende de pelgrimagyen. ende bat haer datse dlant wel bewaren soude. ende datmen viennen emmers niet wt en liet. voer dat hi weder quame want hi dachte corttelinghe daer weder te sijne