Die historie vanden vromen ridder parijs ende van die schone vienna des dolphijns dochtere

[fol. e3v]

¶ Hoe paris te venegien tscepe ghinc om te besueckene theylich graf

EEnsgancx na desen sciet paris van geneuen ende toech na venegien al dair hi met synen knecht tschepe ghinc ende quam alsoe in alexandrien. al daer hij een wijle bleef. ende liet hem die wijle onderwijsen van den wech te iherusalem waert ende ten berge van caluarien niet te min. al eer hi den wech bestont so leerde hi eerst spreken zarazijns. ende als hi dat conste soe nam hi den wech met sijnen knechte na indien ende van daer voert nae pape ians lant. al daer hy oeck eenen langhen tijt wonende bleef. ende als hem den baert lanc genoech ghewassen was. so nam hi oec het habijt ane van dien lande, met gaders hair luder manieren ende costumen. hebbende nochtans altoos goet vast ghelooue in onsen here ihesu cristo. ende in die gloriose maget marien syure lieuer moedere Hier na quam hem te synne dat hi woude trecken besoecken theilich graf in iherusalem om syn bedevaert mede te volbrenghen Als hi te iherusalem comen was keerde hi hem mit allen tot deuocien. ende badt stedelick onsen lieuen heere dat doer die verdiensten synre heyligher passien, hi hem verleenen woude behoudenisse synre sielen ende vertroostinghe inden lichame. ende also bat hi oeck voer vienne. hij schiet doen van daer. ende

[fol. e4r]

als hi quam onder den soudaen so wart syn ghelt vast sober. ende alsoe huerde hij aldaer een huus ende bleef daer een luttel tijts woonende in drucke ende verdriete ende te meerder so was hem syn lijden als hij dandere sach groote heerlicheden bedriuen ende dat oec laten moeste doer faute van ghelde

¶ Het ghebuerde eens op een tijt als parijs buiten ghinck hem vermaken. dat hem te ghemoet quamen des soudaens valckenaers die van vlieghens quamen. die welcke al daer hadden eenen siecken valcke. ende het was die selfde valck die de soudaen alder liefste hadde. Paris die vraechde hem waer dat hij sieck was. maer sy seiden dat sijs niet en wisten Parijs die aensachen bat. ende ghesien hebbende seyde hy hem hoe dat die valck inder waerheit geen drie daghen leuen en soude sij en daden dat hy hem riet. ende op dat hij daer mede niet en gheneset, soe en sal hi nemmermeer ghenesen. Doen seyde hem die valckenaer. Ick bidde v helpt mij gheraden hoe ick hem helpen mochte. Ic versekere v het sal v ende mij stade doen want dye soudaen verloos hem alsoe lief een van sijnen besten steden als desen valck. Doen so ghinck paris eenre hande cruyt suecken ende gaft den valckenare ende seide hem dat hijt den valck aenden voet bonde. ende metten gange was den valck ghenesen ende alsoe ghesont als hij oyt was. van dwelcke dat de soudaen met allen blijde was. ende ter saecken van desen so maecte hi den valckenare een groot heere in sijn hof Doen de valckenaer dit aensach ende dat hijt hadde doer parijse soe dede hi hem vele vrientschappen. ghelijck ofte sijn broeder geweest ware. ende bracht hem in die gracie vanden soudaen: alsoe dat hi in sijn hof ontfanghen waert. ende dair begracijde die soudaen hem soe seere dat hi hem gaf een groot officie ende hielten in grooter eeren

Nu suldy weten dat in dien tijden een heylich paus regneerde die gheheeten was innocensius. die wart van auyze dat hij een cruusvaert leggen woude teghens die ongheloouighe. op dat den naem gods te meer gheeert soude worden ende verheuen. Ende hieromme so wart ghehouden grooten raet onder die cardinalen ende prelaten. ende dit perlament ghehouden sijnde. ouerdroeghen sij datmer den coninck van vranckerijcke af scriuen soude. ende oeck den anderen kerstenen coninghen hertoghen grauen ende ander groote heeren.