Die historie vanden vromen ridder parijs ende van die schone vienna des dolphijns dochtere

¶ Hoe dat paris die schoone vienne trouwede. ende van dier feesten die dyer ghehouden wart.

[fol. f6r]

DEs ander daegs dede de dolfijn parijse synre dochter trouwen. daer af dye feeste groot was. ende gheduerde wel xiiij. dagen lanc so blidelijken datmens niet en soude konnen vertellen Welck paris ende vienne leefden tsamen eenen langen tijt in groter ghenuechten ende blischapen. mer paris vader ende moeder en leefden daer na als ghenen tijt in deser werelt Ende paris ghecreech van viennen drie kinderen, twee sonen ende een dochtere, die de dolfijn tot schoonen ende heerliken huwelike halp Doen paris vader doot was, woude paris dat eduwaert sijn gheselle als erfgenaem alle sijn goeden aenveerden soude. ende insgelijcs van synre moeder Ende gaf hem ysabelen te wiue die langhen tijt tsamen leefden in groter liefden ende eendrachticheden Ouer een wile hier na soe storuen de dolfyn ende syn wijf, also dat paris doen dolfyn ghebleef. Die welcke dair na op dese werelt gheleefde met viennen xl. iaren ende storuen daer na salichlijc ende wel beyde in een iaer. alsoe dat de sommighe houden dat sij in hemelrijck verheuen sijn, insghelycs storuen eduwaert ende ysabeele oeck in een iaer Laet ons daerom gode bidden onsen here dat hi ons gracie verlenen wille ons leuen al hier so te beleiden dat wi met hem in sijn eewich rijck tsamen regneren ende leuen moeten in der ewicheyt ¶ Amen