Die historie vanden vromen ridder parijs ende van die schone vienna des dolphijns dochtere

¶ Hoe dat die dolfyn vienne dede gheuanghen setten om datse hair consent tot desen huwelic niet en geuen wilde.

[fol. e1r]

COrts na tvertreck van shertoghen sone dede die dolphijn van groter omverduldichheit tot hem comen eenen werckman hem beuelende dat hi binnen den palaise maken soude een cleen duystere geuanckenisse. ende daer inne soe dede hi vienne ende ysabeele setten. ende beual dat men hem niet anders dan water end broot geuen en soude tot nootdorsten. ende also leydden die twee een wile haer leuen. niet dat vienne daerom haer propoest veranderde. maer haren wille wies haer dies te meer altijt tot parise haren lieue. ende altijt so vertroostede sy ysabeelen seggende mijn lieue suster en wilt v van deser duysternissen niet veruaren. Ick betrouwe mij in gode dat v noch hier voren vele duechden ghebueren sal. want voerwaer suster this redene dat ick wat lijde om den goeden ridder paris die welcke dat soe vele doer mi lidet ende aldus so troosteden sij deene den anderen