Die historie vanden vromen ridder parijs ende van die schone vienna des dolphijns dochtere

¶ Hoe eduwaert parise synen geselle antwoerde ouerscreef in de stadt van geneuen.

[fol. d5r]

HArde lieue bruedere vrient ende gheselle. v vader ende moeder doen v seer groeten, die welcke doer v geleden hebben vele quaets ende groote pyne. ende bijsonder v vader die een lange wile inder gevauckenissen geweest heeft, ende so was hem afgenomen alle sijn goet. Ende bouen alle die suldi weten hoe vienne uter maten seer blijde was als sij verhoirde dat ghi noch leuende waert datz niet te scriuenne en ware. want alle hair vermaken stont alleen op eenighe tijdinghe van v te hoorenne. ende sij ghebiet hair tuwerts so seer als si emmermeer mach. ende si heeft groote begherte v te siene. ende bidt v dat ghi v niet ververren en wilt van hair noch van deser contreyen. ende dat ghi haer doch dicwille van uwen state scriuen wilt. Ende sy seyndt v enen wissel van .iij. dusent cronen daer ghy v mede vermaken sult, want alle haer hope staet op v Ende weet oeck dat mense inder gheuanckenissen ghehouden heeft een lange wile, maer gode lof sy isser weder vte. uwen brief dien heb ic hair laten sien ende oyt syndert soe heeft syen gehouden ghehadt. alsoe dat icken nie weder ghecrighen en conste. ende seide my datse lieuer hadde te verliesene alle tghene dat sy hadde. dan alleen dien brief Ende weet oeck dat die dolfyn tracteert van haer eenen man te gheuene, te weten shertogen sone van bourgoendien. ende hoept van dage te daghe dattet voert gaen sal Niet te min. na dat ghene dat mi vienne geseit heeft so en betrouwe ick hair nemmermeer datse eenen anderen man nemen sal dan v.

[fol. d5v]

daerom leeft blijdelicken op hope Myn lieue broeder ick danck v so seer als ick emmermeer dancken mach vander presentacien die ghi mi gedaen hebt V siele behoude god onse here. den welcken ick bidde dat hi v in sijn gracie nemen wille Doen dese letteren ghescreuen waren langdese eduwaert eenen lopere die terstont dese letteren droech te geneuen tot den ridder parijs

ALs hi desen brief gesien hadde ende dat hi wiste dat vienne gheuangen was geweest was hi te mael seer tonvreden ende vermalendide den dolfijn haren vader segghende aldus. O wreet ende onbekent vadere hoe heeft v herte dat connen gedogen te houden geuangen alsulcken edelen creatuere die vol is alre duecht. sij en is geen sake van desen stucke mer tis alleen myn werck. ende daerom behoor ic te liden ende niemant anders. och hoe en gaf dat god niet dat ic voer haer geuangen gheweest hadde. o schone vienne wat redenen hebt ghi doer mi also vele geleden te hebben Ende als hi hier na sach dat sy wederomme in haren iersten punte was. soe was hy te bat te vreden Ende doen hi den wissel vant die hem vienne seynde: huerde hi een schoon huis ende cleede hem rijckeliken ende maeckte kennisse ende vrientscap metten besten vander stadt also dat sij hem alle groote eere bewesen. ende altijt wies hem syn liefde te viennen waert. ende en was noyt maent sy en screuen malckanderen brieuen. dinhout vanden welcken te vele lanc waer al hier te verhalen.