Die historie vanden vromen ridder parijs ende van die schone vienna des dolphijns dochtere

¶ Dit is dinhout vanden brieue die hy seynde sijnen trouwen gheselle eduwaerde.

BEsonder lieue broeder ende vrient eduwaert. die crancke auentuere van parijs die werdt verladen met allen crancken geluck Ic paris groet v alsoe seer als ic mach ende can Ghelijck als wij pleghen malckanderen te scriuen brieue van minnen ende van ridderschapen. soe beualt mi nv te scriuene brieuen van bitterheiden ende van crancker auentueren. want helacen ick ongeluckich ben alleen in vremden landen, ende verdreuen van allen ghenuechten. peynsende dach ende nacht op die schoone vienne want ick duchte datse om mijnen wille sterflijcke smerte geleden heeft. Ende ick segghe v ouerwaer wiste ick int sekere datse om mijnen wille in alsulcken swaren verstranghen ende lijdene gheweest waer. ick soude my seluen bederuen. want ick ben weerdich daeromme alleene ende niemant anders te lidene. Ende hieromme soe bidde ick gode ende allen sinen heylighen dat syse doch behueden willen van allen quade. ende haer verleenen voerspoet in allen eeren ende goede. ghelijc sy wel ende sonder twifel weerdich is ende ick des beghere Mijn alder liefste broeder ende gheselle. tghene des ick beghere bouen alle dinck is ten eersten male dat ghi der lieuer viennen segghen wilt, hoe dat ick alnoch leuende ben te geneuen leyddende al dair mijn leuen in soe grooten drucke ende verdriete. dat ick duchte dat ict besteruen sal, om dat ick haren liefliken persoen deruen moet. ende dat mij mijn auentuere aldus cranckelijcken veruolcht Ende niet te min. bidt doch haer van mijnent weghen vriendelycken dat sijt my vergheuen wille alle tghene datse om mijnen wille so onverdientlicken gheleden heeft. och god weet mijn herte ende in wat tribulacien dat ick leue Nae dien dat gode ons voirnemen niet ghelieft en heeft, so behorent wi in paciencyen te verdragen. Ick bidde v dat ghi haer wilt seggen, dat sy gheenen man nemen en wille tot dat sye hoe dat ons auentuere eynden sal. Voerdane myn lieue broeder ende gheselle ick bidde v dat ghi mynen vader ende moeder vermaken wilt. ende dat ghi hem wesen wilt gelijc een sone. want gemerct die vrientscap die wi altijt tsamen gehadt hebben, so heb ic mijnen vader ende moeder ghescreuen dat sy in de stede van mi v nemen ende ontfangen willen voir haren sone. ende dat si v na hem haer erfghenaem maken willen Hierom bidde ic v mijn lieue broeder dat ghi hem gehoirsam ende onderdanich wesen wilt ende ghi sulles te bat hebben. Ende oft ghi mi bi auentueren wederom scriuen wilt soe bestelt den brief in

[fol. d4v]

mijns heer vaders huys. die heylighe gheest wil v behueden. Desen brief gaf hi eenen loopere die binnen cortten tyden in dolphinoys was. ende daer gaf hi desen brief al heymeliken den goeden riddere eduwairde Doen eduwaert desen brief ontfanghen hadde ende wiste dat paris leuende was. verblide hi hem so seere dattet niet en ware te vertellen Hi behielt den looper tsijnent op dats de dolphijn niet vernemen en soude Ende als hi sijnen brief ouerlesen hadde, so ghinck hi tot heer iacob paris vadere. ende seide hem hoe dat hi hem tijdinghe brachte van paris synen zone. Heer iacob en conste niet versaden den brief te lesen van groter genuechten Daer na als hi den brief tsynen passe genoech ghelesen hadde so badt hi eduwaerde dat hi hem int lange ouerscriuen woude alle tgheene dat hem na syn vertrecken ghebuert was: hier nae ghinck eduwaert totter schoonre viennen die hi seer droeuich vant peynsende op haren lieuen paris. haer segghende aldus. Eerwerde vrouwe hoe sijt ghi in desen punte. Ende vienne antwoerde Helaes ick hebbe wel redenen bedruct te wesen. want mijn herte blyft nacht ende dach peynsende op mijnen goeden ridder parijs. want ic niet en weet weder hi leuende oft doot is. na hem en lust mi niet te leuene. Woude mi onse heere god anders syn gracie doen dat ic mocht weten op dat hy noch leeft in wat lande dat hi wesen mach. op dat ic hem een luttel ghelts seynden mochte om te onderhoudene synen persoen. Doen sprac eduwaert. vrouwe wat suldi mij gheuen dat ic v van hem goede niemare segghe ende die warachtich Vienne antwoirde. bi mynder trouwen ten is gheen dinck ter werelt dat ick behouden mijnre eeren v daer voer weygheren woude. Doen seide eduwaert Siet hier eenen brief die hi my gesonden heeft Sy deden open. ende dien ghelesen hebbende. was sy so blide, dattet scheen datse gode onsen heere ghenaeckt hadde. Ende voerwaer die blijschap die si hadde in thertte, scheen haer wel int aenschijn Want sy noyt alsoe en gheliet syndert datse met parijse haren lieuen vrient ewech track. Ende als die blischap langhe ghenoech geduert hadde. so hiesch eduwairt den brief wederomme om parijse daer op antwoerde te scriuene Vienne seyde voerwaer mi ghelieft wel dat ghi hem antwoerde scrijft maer den brief moet mi wedercomen. Doen seide eduwaert. mijn vrouwe en hebt ghi mi niet gheloeft te geuene alle dat ic v heysschen soude. Iae ick sprack sy. Doe seyde eduwaert wederom. ick en wille niet anders dan dat ghi mi mijnen brief weder gheeft Sy antwoerde hem aldus Van nv voerdane en vermaent my niet van dien brieue. want ick v alsoe lief mijn leuen gaue. maer gelieft v yet anders te heysschene dat is my lief Ende hier na ordineerde eduwairt wederom eenen brief aen parijse in deser manieren