Die historie vanden vromen ridder parijs ende van die schone vienna des dolphijns dochtere

¶ Hoe ende in wat manieren dat parijs eduwaerde synen gheselle van synen state ontboet.

[fol. d3v]

NV so houden wi op hier af meer te sprekenne. ende keren ons redenen weder tot paris die sijn leuen seer druckelic leyde in de stadt van geneuen die wijle dat men van desen huwelic tracteerde doer de liefde die hi te viennen weert droech. hij gedeech so deuoet ende oetmoedich teghens gode dattet een wonder was. ende also dat hem alle tvolc vander stadt lief gecrech ende hielden voer enen edelen man. segghende dattet daer sonder niet wesen en mochte hi en moest eens groot heeren sone wesen Parijs die creech seer groot verlanghen na viennen. ende hoe dattet met harer auentueren vergaen mocht wesen Ende ordineerde hieromme twee brieuen: den eenen aen synen vader. ende den anderen aen synen gheselle eduwairt. vanden welcken syns vaders brief luyde aldus

HArde lieue ende eerweerde heer vadere v ghelieue te weten hoe dat ic ben in groten dogen ende seer bedruct van mijnder crancker auentueren. ende also woen ic alleen te geneuen in een casteel beroeft van allen vruechden ende solaze der werelt. want al myn gepeys is te dienen gode ende onser vrouwen. ende en meyn niet dat ghi mi oec emmermeer sien sult. want ic wille gaen pelgrymagie alle die werelt dore. Ende oft gebuerde dat ic storue eer ghi mi weder gesaecht. so biddic v dat ic emmers niet steruen en moet in uwen euelen moet. maer wilt mi myn misdaet vergheuen.

[fol. d4r]

ende geeft my uwe benedictye. Ic bidde v dat ghi mynen lieuen broeder ende gheselle eduwaert in mijnen name ontfangen wilt. ende dat hy v sy gherecommandeert als zone in dye stede van my. also wel in uwe erflicheyt als in anderen dinghen. Die heylige geest sy met v. Ghebiet mij tot mijnre vrouwen moedere