Die historie vanden vromen ridder parijs ende van die schone vienna des dolphijns dochtere

¶ Hoe ende in wat manieren dat parijs van viennen schiet in die kercke met grooten drucke

[fol. d1v]

NAe dese woerden so nam hi viennen ende custese seer suchtende ende weenende. ende sij die troostede hem ten besten dat sy mochte. biddende onsen heere dat sijen in cortten tijden weder sien mochte: gelijc haer herte begherde meer dan eenich dinc ter werelt Ende mettien soe schiet paris van viennen in groten drucke Ende nam den wech met synen knechte ter riuieren waert daer sij niet en hadden mogen passeren. ende al sonder eenich achterdencken reden sy daer dore. ende reden twee daghen lanc sonder eten ende drincken, want sy en dorsten doir die steden niet passeren, ende also ghinc hi tot aiguemoirte. ende al daer vant hi die galeye die iorijs gehuert hadde, daer mede dat hi voer tot genueuen toe. Parijs hadde hem so messelicken op die galeije dat sy alle meenden dat hi dwaes waer gheweest. want hi niet en dede dan hi doirgaens peynsde sonder een woert te sprekene. Daer na als hi te geneuen quam zo huerde hi een casteel daer hij een wile woende in drucke ende groter onghenuechten. Nu keeren wi weder segghende hoe vienne inder kercken geuonden was ende hoe sy voer haren vader gebracht wart

ALs parijs van vienne gesceyden was, bleef sy alleene met ysabeelen inder kercken driuende soe grooten rouwe dattet niet te vertellene en ware. want sy hadde wel alzoe lief gehadt te steruene als te leuene, ende als sy wenens moede was. ende dat si sach datse emmers weder keren moeste tot haren vader den dolphijn. so sette sy haer seluen te vreden so sy best conste. ende streeck eensgancs den capellaen halen den man te voete, ende leydene in die kercke Ende terstont so ghinc die cappellaen haer vertellen hoe dat sij van menigen riddere gesocht wart. Doe sprac die schone vienne siende datter ghenen raet meer en was sy en moeste wederom thuyswaert keeren seggende. ganc henen segt den ridders dat ghi mi gheuonden hebt ende brengtse met v hier. ende hi dede also. Ende als die ridderen daer quamen groetteden sy viennen ende seyden haer hoe dat die dolfyn haer vadere alle die werelt dore haer liet suecken. Ende daer na begonsten sijse te troosten ende seiden haer toe. dat huer vadere haer niet mesdoen en soude. want hi sal so blide sijn als hi v sien sal dat hi sijns torens al vergheten sal. Ende mettyen ghinc sij te paerde ende leidde den cappellaen mede om dat hijse voer haren vader ontschuldighen soude. ende seyde hem hoe sij van haren lichame noch net ende suuer ware