Die historie vanden vromen ridder parijs ende van die schone vienna des dolphijns dochtere

[fol. c6r]

¶ Hoe die dolphijn viennen dede suecken bi sijne dieners.

LAet ons nv af laten van paryse te sprekenne. enspreken vanden dolphijn Des ander daechs doen vienne ewech was wardet den dolfyn gheseyt die daeromme meynde sijn sinnen te gemissen. ende tgheheele hof werdt daeromme wt dermaten seer verslagen Ende doe schicte die dolfijn terstont wt volck te peerde ende te voete tot allen canten. so sy heymelicsten conste. ende bat hem dat sij hem doch viennen brachten het ware leuende oft doot Het gheuiel dat een van desen lieden te voete bi auontueren gheraecte in dit dorp daer die cappellaen ghecomen was sueckende yemant die de ponte maken mochte Dese man vraechde elckerlick ofte sy niet en hadden ghesyen twee ioncfrouwen die wt des dolphyns houe ghevloden waren. Doen seyde die capellaen dat niets langhe gheleden en was dat hijer twee hadde syen passeren met meer ander lieden Die bode meynende dat die capellaen met hem ghebourdet hadde. ende seide voert hoe die dolfijn sijn doot ghezworen hadde. diese verstaec oft wiste ende niet en openbaerde. De capellaen dit hoorende wert vervaert ende hiet den man dat hi al daer vertoeuen woude. hi soudse ter liefden vanden dolfijn gaen suecken. ende alsoe gerin-

[fol. c6v]

ge als hier af vername soude hijt hem te weten laten Ende also schiet hi van dair ende vertelde parijse dit dat hi ghehoort hadde, seide oec voert dat hi hem beduchte dattet waren die ioncfrouwen van synen gheselschape diemen sochte. ende bat hem daeromme dat hi van daer vertrecken woude ende hem niet stellen in de sorghe van sijnen liue. ende hiet hem te nemen den besten raet die hi nemen mochte. want sij waren hurer wel viftich gewapender mannen te perde die hem sochten Men en derf niet vragen oft parijs onghestelt van herten was doen hi dit hoorde. hi ontverwede van grooter bedructheit ende seide totten capellaen Ic bidde u dat ghi wat verbeidet dat ic v antwoirden mach. ende mettyen ghinc parijs totter schoonder viennen om haer dit te vertellen En als vienne parijse sach comen so onghedaen, so bleec: sprack sij aldus. O paris wat tijdingen brengt ghi dat ghi alsdus ongedaen sijst van verwen Doe seide paris met bedructer herten. O schoon bloeme die tijdinge die ick brenge, en is niet goet voer v noch voer my. want onse suete auentuere sal cortelinghe verkeeren int suere. ende woude daeromme dat ick doot ware Ende al beclaghende sprac hi voert aldus. O lieue heere hoe bedrueft ende hoe rouwich is my myn herte dat ick dusdanigen hooghe vrouwe als ghi sijt ghestelt hebbe in desen noode. Och god hoe en waes ick niet ghestoruen die doot eer ic v wt uwes vaders huyse gehaelt hadde Och myn lieue vader ende moeder hoe salt mit v wesen als die dolfyn weten sal dat ic hem sijn dochter soe ontvuert hebbe. Och eduwaert myn trouwe gheselle hoe en ben ick v niet te rade ghegaen gheweest. eer ic dese dwaesheyt bestaen hadde Ende daer nae keerde hi hem wederomme te vienne waert segghende. wat sal uwes gheschieden als v de dolphijn v vader sien sal Ic hope hoe hert dat hi is. als hi uwen edelen persoen sal aenschouwen dat hi v gheen arch doen en sal Och here god verleent mi doch dat ic die pyne van desen wercke alleene dragen mach ende niemant el Och goede weerde vrouwe wat ongeluckiger dach was dat voer v ende voer my doen ghi mi ierstwerf leerde kennen Ende als parijs syn clachte voleyndet hadde ghinc hi viennen vertellen alle tghene dat hi van den capellaen ghehoort hadde Ende met dien nam hi syn zweert als een desperaet mensche ende soude hem seluen doersteken hebben en hadt gedaen vienne dye als de vrome hem dat mes benam. ende trooste parise segghende aldus O francke ridder, myn vruechde, myn leuen, ende myn solaes wat wilt ghi maken. en weet ghi niet die hem seluen doot dat hy lyf ende siele verliest. sterf dy. ic seg v voirwaer dat ick mede steruen sal. ende soe sult ghi sijn oersake van mynder doot alsoe wel als vander uwer. O paris waer is nv uwe wijsheit ende vroemicheit. nv ghi alder manlicst wesen soudt nv hebdi anxst O ridder ten is niet nieuwe dat die lieden inder werelt verkerende tribulacien hebben, hoe groot dat sij oic zyn Voerwaer dit en is gheen herte van alsulcken vromer ridder. want nv ghi mi

[fol. d1r]

troosten soudet, nv behoeuet dat ick v seluen trooste Ende hierom mijn lieue vrient ick bidde v. dat ghi van hier sceidet, ende eest dat ghijs niet en doet so sal ic mi met uwen zweerde bederuen: niet uwe scheiden en is mi emmers so swaer alstuwe wesen mach, maer men moet van tween quaden het beste kiesen. ghij sult weten dit al eest dat ic mijnen heere vader gefailleert hebbe. dat hi mi nochtans daerom niet mysdoen en sal aen mijn leuen. aengesien die grote liefde die hi te my waert oyt gedraghen heeft ghehadt. mer waert dat ghi dair wairt ick segghe v voerwaer dat wi daerom beyde steruen souden. ende noch hebbe ic goet betrouwen dat mijn meyninghe ten goeden eynde comen sal. ende syt des seker eest dat hijt mi vergheeft nemmermeer en sal ick anderen man nemen dan v. ende dat so gheloue ick v op my trouwe Ende dairom soe biddick v dat ghi my om gheen andere vrouwe vergheten en wilt. Ende als ghi in vreemden landen syt dat ghi my doch ouerscrijft van uwen auontueren Ende op dat ghi mijnder te bat gedencken moecht siet hier is eenen rinck met eenen dyamante die ick v bidde dat ghi ter liefden van my verwaren wilt.