Die historie vanden vromen ridder parijs ende van die schone vienna des dolphijns dochtere

¶ Hoe parijs die schone vienne ende ysabeelen heymelicken bi nachten ewech vuerde.

[fol. c5v]

ALs paris hem aldus versien hadde van ghelde ende alle ander dinghen die hy meende dat hi behoeuen soude. soe ginc hij henen heymelijcken ende alleene ter plaetsen die sy begrepen hadden. ende daer dede hij viennen een teeken. ende mettien ghinghen haer vienna ende ysabeele cleeden in mans cleederen ende stalen hem vanden casteele ende quamen ter plaetsen al dair die peerden stonden. ende reden voert henen also gheringe als sy emmermeer mochten Ende iorijs ginc stedevast voir henen om des wille dat hi den wech wiste Ende binnen desen dat sy dus reden so hief daer op eenen grooten wint ende eenen grooten regen die geduerde al tot des anderen daechs te vespertijde dat si quamen aen een cleen dorpken. maer sy en quamen binnen den dorpe niet. op dat sij niet bekent en souden werden. ende namen haer logijs in een cleen capelleken niet verre vanden voerseide dorpken. daer sij vonden eenen capellaen diese seer willichlick ontfinc ende onthaelde soe hi best conste Ende alst ten auonde quaem sliepen parijs ende die cappellaen te gader in een cleen huysken neffens tvoirseyde cappelleken. Joris ende paris knape sliepen biden stal bi die beesten Ende vienne ende ysabeele sliepen int cappelleken. Ende tsmergens saten sij weder op te perde, ende reden henen tot datse quamen op een riuiere die met allen seer als doen ghewassen was biden reghen dyer geuallen hadde. des paris seere tonpasse was. ende bat iorijse dairomme dat hi eenighe lidinghe suecken woude dair si doer passeren mochten Doe schiet iorijs van hem ende reet in de riuiere op een plaetse daer hem dochte datmen wel passeren soude. ende als hi in die middel vanden water quam soe viel sijn paert. ende dair verdranc beyde man ende peert Paris dat siende was seer tonpasse. nochtans en dorste hij hem alsoe niet ghelaten van anxte dat die schone vienne daer ongenuecht in nemen soude Daer na vraechde vienne wel na iorijse. mer paris die antwerde haer dat hyen geseynt hadde om den besten wech te verspiedene ende seyde voert tot viennen dattet beter ware dat sij weder keerden ter kercken wert daer sij voren gheweest hadden Vienne die seyde dattet haer wel gheliefde. want sij hair vervaerde te passeren doir die riuiere Paris en bleef dair niet seer gherne om des willen dat hem dochte dat hi daer niet al te seker en was. Ende vraechde dairomme den cappellaen ofte men in gheenre manieren die riuiere passeren en mochte op dat pas. Daer op die cappelaen hem antwoerde. dat neen. emmers niet in drien daghen eer dat water verschoten ware Doen bat paris den cappellaen dat hi woude gaen int dorp ende besien oft hi daer gheeu sceepluden ghevinden en conste die een cleen pont brochten. daer sy niet ouer lijden mochten. want hi daer om gheenderhande goet bliuen en woude op dat hijs anders verby mochte. ende seyde dat hijt vterlicken wel loonen woude. Die capelaen seide dat hijt gerne proeuen woude. also en peynsde paris niet anders dan hoe hi wech geraken mochte ende ghepasseren doer die riuyere.